Lagolago Ta’ita’i Katoliko taumafaiga foia fa’afitauli fualaau fa’asaina

Ua tu’uina atu e le Ta’ita’i aoao o le Ekalesia Katoliko i Amerika Samoa ia Bishop Peter Brown sana tusi i le afioga i le ali’i kovana ia Lolo Matalasi Moliga, e fa’ailoa atu ai le lagolagoina e Ta’ita’i atoa ai ma le Ekalesia atoa o taumafaiga a le malo, e foia le fa’afitauli o fualaau fa’asaina i totonu o le atunu’u.

O le kopi o le tusi a Brown na tu’uin atu lea i le afioga Lolo, o le Failautusi o le Ofisa o Mataupu Tau Samoa, le afioga i le Maoputasi ia Mauga Tasi Asuega, o le Fa’atonusili o le Matagaluega o le Puipuiga o le Saogalemu Lotoifale (DHLS), ma le afioga Samana Semo Ve’ave’a.

“E fai a’u ma sui o Ta’ita’i ma tagata lotu uma o le Ekalesia Katoliko i Amerika Samoa, matou te fa’ailoa aloaia atu ai lo matou lagolagoina o fuafuaga uma a le malo e pei ona fa’asalalau, ina ia foia ai le fa’afitauli lea ua fa’atupulaia i totonu o Amerika Samoa i tulaga o fualaau fa’asaina”, o se vaega lea o le tusi a Brown.

“Ou te iloa ua mae’a ona tofia se Vaega Faapitoa e gafa ma le sailia o auala e foia ai lenei fa’afitauli, ae i le avea ai o le mafutaga fa’a le Ekalesia o se tasi lea o faalapotopotoga e pito sili ona to’atele tagata e mafuta atu i ai, ou te talitonu ai o le isi lea la’asaga e tatau ona uia ina ia fesoasoani ai i le taumafaiga”.

Mai aulotu eseese e 18 fa’apea ai ma aoga e 5 a le Ekalesia i totonu o le atunu’u, o le isi lea auala na taua e Brown ua matua lagolagoina ai le talitonuga, e le tatau e fanau talavou ona latou umia nei fualaau oona e a’afia ai o latou olaga.

O le aano atoa o lenei tusi e pei ona taua e Brown, o le ofoina atu lea o le fesoasoani a le Ekalesia ma ona Ta’ita’i i le malo, i soo se auala e mafai ai ona latou galulue fa’atasi e foia le fa’afitauli o fualaau fa’asaina i le atunu’u, e aofia ai le tutu fa’atasi lea o Ekalesia o lo o i totonu o le afioaga e tasi e saili polokalame ma auala eseese e fesoasoani ai i le foiaina o lenei fa’afitauli.

O le fa’afitauli i fualaau fa’asaina i totonu o le atunu’u, o se tasi o fa’afitauli ua fautuaina e le ali’i kovana lana Kapeneta ina ia ave i ai la latou fa’amuamua, i le sailia lea o auala e foia ai lona fa’atupulaia.

Ona o nei fuafuaga uma, ua tofia ai e le kovana se Vaega Faapitoa o lo o aofia ai le Komesina o Leoleo atoa ai ma fa’auluuluga o Matagaluega ma Ofisa o le malo o loo galulue i le fa’amalosia o tulafono i le atunu’u, mo le taumafai lea e sailiili polokalame eseese e taumafai ai ina ia taofia le sosolo fa’a fa’ama’i o fualaau fa’asaina i le atunu’u.

I se fa’atalatalanoaga a le Samoa News ma le Komesina o Leoleo i le 2 masina talu ai, le tofa i le Tootoo ia Le’i Sonny Thompson, sa ia fa’amaonia mai ai le taliaina lea e Ta’ita’i o le Ofisa o Leoleo a Honolulu o se talosaga sa ia tu’uina atu, ina ia fesoasoani mai sui o le latou Ofisa i le a’oa’oina o ali’i ma tama’ita’i Leoleo a le atunu’u i auala e saili ai ma fa’atamaia tulaga o fualaau fa’asaina i le atunu’u.

O se tasi o la’asaga na taua e Le’i ua amata ona galulue i ai le Ofisa o Leoleo a Amerika Samoa, o le toe tatalaina lea o le Ofisa o loo gafa ma le Su’esu’eina o Mataupu Tau Fualaau (Vice & Narcotics Unit), atoa ai ma le toe fa’aopoopo o ali’i ma tama’ita’i Leoleo e galulue ai, ina ia malosi ma mausali taumafaiga e foia ai fa’afitauli tau fualaau fa’asaina lea ua amata ona oo atu i totonu o aoga maualuluga i le atunu’u.

O atugaluga o le malo e pei ona saunoa i ai le afioga i le ali’i Kovana i le tele o fonotaga a lana Kapeneta, afai ae fa’atupulaia le fa’afitauli o fualaau fa’asaina ma a’afia ai fanau aoga, o le a’afia atu ai fo’i lea o le lumana’i o le malo, aiga ma le atunu’u atoa, aua o tupulaga talavou, o i latou ia o lo o fa’amoemoe i ai le lumana’i o le malo, aiga ma le atunu’u atoa.