Kovana: Tatau ona i ai Soifua Maloloina i aoga pe a toe ‘ae i le masina fou

Ua fa’atuaina e le afioga i le Kovana Sili, Lolo Matalasi Moliga, le Matagaluega o le Soifua Maloloina ina ia i ai ni fomai ma teine tausima’i i aoga eseese i le atunu’u pe a toe ‘ae aoga i le masina o Ianuari 2020.

E pei ona silafia sa tapunia uma aoga i le atunu’u ina ua sainia e le kovana lana poloaiga fa’alauaitele, e aofia ai le tapunia aoga, ona o le pepesi o le misela i Amerika Samoa. Ma e o’o mai i le taimi nei o lo’o tapunia pea aoga, ma e fa’atasi atu ai ma le lua vaiaso i le fa’aiuga o le tausaga mo malologa o le Kerisimasi ma le Tausaga Fou.

I le fonotaga a le kapineta a le kovana i le aso Gafua, sa fa’ailoa ai e le fa’atonusili o le Soifua Maloloina, Motusa Tuileama Nua, le tulaga ua i ai le pepesi o le misela i Amerika Samoa, fa’atasi ai ma isi galuega a le matagaluega i tui puipui o le misela.

Saunoa Motusa e faapea e to’a 10 i latou i le atunu’u ua fa’amonia maua i le misela, ae leai nisi fa’amaumauga fou talu mai le tolu vaiaso ua te’a i nisi fou ua lipotia ua maua i le misela - e pei o le lipoti a le Falema’i o le LBJ.

Mo fanau aoga, e tusa i le 400 o i latou o lo’o mana’omia ona faia tui puipui muamua, ae silia ma le 1,000 o fanau aoga e mana’omia ona faia le tui puipui lona lua. Mo fanau i Day Care Centers, o le 90% o i latou ua ma’ea faia tui puipui o le misela.

Sa saunoa le kovana, ma fa’atonuina Motusa ina ia fa’atulaga fomai ma teine tausima’i e i ai i aoga mo le faia o tui puipui o fanau o lo’o mana’omia i le taimi e toe ‘ae ai aoga i le masina fou.

Ua le gata i lea sa fautuaina foi e le kovana lana kapineta ina ia faia tui puipui o tagata faigaluega uma o le malo. I le Ofisa o le Kovana, ua ma’ea tui puipuia o tagata o lo’o galulue i lea ofisa.

I le vaiaso ua te’a sa maua ai le avanoa o tagata faigaluega a le malo e faia ai a latou tui puipui o le misela i nofoaga e lua sa fa’atulaga e le Soifua Maloloina.

Sa fa’ailoa foi e le Soifua Maloloina nofoaga fa’atulagaina e faia ai tui puipui o le atunu’u lautele i lenei vaiaso. Ae peitai o le aso Lua sa fa’ailoa ai e le matagaluega suiga mo le aso Lulu ma le aso Tofi, ae fa’atalia ai le taunu’u mai i e po anapo o tui puipuia fa’aopoopo mai le fetarale.

Mo tui puipui sa fa’atulaga i nofoaga mo le aso Lulu, Tesema 18, ua toe fa’atulaga i le aso Faraile, Tesema 20; mo le aso Tofi, Tesema 19, ua toe fa’atulaga mo le aso Toana’i, Tesema 21; mo le aso 20 Tesema ua toe fa’atulaga mo le aso Gafua, Tesema 23, ae mo le aso Toana’i, Tesema 21 ua toe fa’atulaga i le aso Faraile, Tesema 27.

Ua fa’ailoa foi e le Soifua Maloloina o lo’o tatala pea falema’i itumalo i Fagaalu ma le Tafuna mo le faia o tui puipui mo fanau.

E o’o mai i le taeao ananafi e leai nisi suiga fou mai le Soifua Maloloina.