Iugafono toe faafoi ai i le 10% tapula’a o tupe fa’aaoga a le Litaea

Ua i luma nei o le Maota o Sui a le Fono Faitulafono se iugafono sa fa’aulufaleina i le aso Faraile o le vaiaso na te’a nei, o le aso mulimuli fo’i lea o galuega a le Fono a o lei alo atu mo lana malologa e 4 vaiaso, e talosagaina ai le Komiti Faafoe o le Tupe a le Litaea ina ia usitaia aiaiga ua mae’a ona pasia i tulafono tuai, atoa ai ma le toe fa’afo’i o aseta i le tapula’a ua pasia mai le 17% i le 10%.

O lenei iugafono sa faaulufaleina e le afioga i le ali’i Faipule ia Samuel Ioka Ale Meleisea, o ia fo’i lea o le Ta’ita’i o le Komiti o le Litaea a le Maota o Sui.

I le tino o le iugafono o loo taua ai e fa’apea, i le aso 16 o Aperila 2007, na sainia ai e Kovana Togiola Tulafono se tulafono e faamaonia ai le nonogatupe e $20 miliona mai Tupe o le Litaea e fa’atupe ai le tele o atina’e a le malo.

A o le i pasia lea tulafono, sa 10% le maualuga o le tapula’a o aseta uma a le Litaea i le tupe e fa’aaoga. Ona o lea tulafono, na suia ai loa le tulafono i lalo o le Tulafono Toe Teuteu a Amerika (7.1444) ina ia sii i le 17.5% le tapula’a o aseta uma a le Litaea e fa’aaoga.

I totonu o le tulafono, sa i ai ma le aiaiga e toe fo’i ai le tapula’a o aseta o tupe e fa’aaoga i le 10% i le taimi lava e mae’a ai ona toe totogi le nonogatupe e $20 miliona.

Ia Aperila 10, 2008 na toe suia ai fo’i le Tulafono ina ua pasia le pili 30-14 ma avea ai ma Tulafono, ina ia toe faaopoopo isi galuega e fa’atupe mai i le nonogatupe e $20 miliona, peita’i sa tumau pea e lei suia le aiaiga lea na mua’i pasia i le Tulafono 30-5, ina ia toe fo’i i le 10% le tapula’a o aseta o tupe e fa’aaoga a le Litaea pe a mae’a ona toe totogi le nonogatupe e $20 miliona.

I le aso 29 o Oketopa, 2008, na toe pasia ai fo’i le isi Tulafono 30-29 ina ia toe faaopoopo isi galuega e faatupe mai i lalo o le nonogatupe e $20 miliona a le malo. I le Tulafono lea 30-29, sa aofia ai fo’i le aiaiga ina ia toe fo’i i le 10% pe a mae’a ona toe totogi le nonogatupe e $20 miliona.

Ia Tesema 19, 2008 na sainia ai e Kovana Tulafono le Tulafono 30-34 e toe faaopoopo ai fo’i isi galuega faatino mo le nonogatupe e $20 miliona. O le Tulafono la lea, e le’i tuuina ai i totonu o le aiaiga  lea e toe fo’i ai le tapula’a fa’aaoga o le tupe o le Litaea i le 10% mai le 17.5%, ma o iina tonu lea na mafua ai loa ona feeseesea’i finagalo fa’aalia o le Fono Faitulafono ma le Komiti Faafoe o le Tupe o le Litaea i le mataupu lenei.

I se finagalo fa’aalia o le afioga i le Loia Sili ia Talauega Eleasalo E. Alo i le aso 4 o Setema 2018 i luma o le Komiti o le Litaea a le Senate, fai mai, o le le aofia ai o le aiaiga lenei i le Tulafono 30-34, ua aveesea ai fo’i ma le aiaiga lea i Tulafono na muamua atu.

“O loo tete’e le Komiti o le Litaea a le Maota o Sui i le finagalo fa’aalia a le afioga i le Loia Sili a le malo,” e pei ona taua i le tino o le i’ugafono.

“Na pau le auala e suia ai le tulafono o le auala mai lea i se pili e pasia e le Fono Faitulafono ma sainia ma faamaonia e le Kovana.”

O le le aofia ai o le aiaiga taua lenei i le Tulafono 30-34, e le mafai ai ona suia pe soloia ese le aiaiga na pasia mai i Tulafono e tolu (3) na mae’a ona pasia ma sainia e avea ma Tulafono. O loo tumau fo’i le talitonuga, e tatau lava ona toe fa’afo’i i le 10% le tapula’a o tupe fa’aaoga pe a uma ona toe totogi le nonogatupe e $20 miliona.

“O lea ua manino i le taimi nei e ala mai i fa’amaumauga a le Tupe o le Litaea, ua mae’a ona toe totogi atoa le nonogatupe e $20 miliona, ma ua alaga tatau ai loa ona aloaia le aiaiga e pei ona tauave mai i Tulafono e 3 na mua’i pasia, ina ia toe fa’afo’i loa le tapula’a o tupe fa’aaoga a le Litaea i le 10%, ina ia suia mai ai i le aofaiga e 17.5% e pei ona i ai i le taimi nei,” o se vaega lea o le i’ugafono.

O lenei iugafono ua mae’a ona tauaao atu i le Komiti o le Litaea a le maota o sui, ma ua fa’amoemoe e fa’atulaga i ai se iloiloga pe afai ae toe tauaofia le Fono Faitulafono mai lana malologa e 4 vaiaso o loo fa’agasolo i le taimi nei.

O le mataupu lenei e fa’atatau i le toe fa’afo’i o le tapula’a o tupe faaaoga a le Litaea, na alia’e mai ina ua fuafua le afioga i le ali’i Kovana ia Lolo Matalasi Moliga e fa’atulaga se isi suiga i tupe a le litaea i le masina o Aokuso 2018.

I se tusi sa tuuina atu e Lolo i ta’ita’i o le Fono Faitulafono, sa taua ai le fuafuaina lea o se siuga mo le si’itia o le tulaga o tupe fa’atapula’a e fa’aaoga mai tupe o le Litaea, mai le 17.5% i le 35%, ina ia mafai ai ona inivesi tupe a le Litaea i le atina’eina o le galuega tele o le  Uaea o Fesootaiga sa toso mai i lalo o le sami (Hawaiki Cable Project).

Ina ia mafai ai ona agava’a tupe a le Litaea e inivesi i lea atina’e tele, na taua e Lolo i lana tusi i Ta’ita’i o le Fono le tatau lea ona suia le maualuga o tupe fa’atapula’a.

I lea taimi ina ua iloilo suiga e pei ona fuafuaina e Lolo, na manino mai ai, e le gata ua silia i le 17.5% le tupe ua nono atu mo le Kamupani o Fesootaiga a Amerika Samoa (ASTCA), ae o le tapula’a fo’i o tupe fa’aaoga mai tupe o le Litaea talu mai le taimi o Kovana Togiola, e 10% ae le 17.5%.

I felafolafoaiga a afioga i Faipule e fa’atatau i lenei mataupu i le vaiaso mulimuli ao lei malolo le Maota o Sui, na taua ai e sui o le maota le taua tele o le fa’amanino o le mataupu lenei, ina ia mafai ai ona manino tulaga o le tulafono ua amata ona nenefu.

O popolega o ni isi o afioga i Faipule, ina ne’i avea le fa’atumauina pea o le maualuga ua oo i ai le tapula’a o tupe a le litaea e mafai ona nono atu i tua ma auala e tula’i mai ai ni fa’aletonu i le teugatupe i le lumana’i.

Saunoa nisi o Faipule e fa’apea, o le isi lenei mataupu e tatau ona fesiligia i le Fonotaga Faaletausaga a le Litaea lea ua faamoemoe e usuia i Hawaii i se taimi o le masina lenei o Fepuari, o le fesiligia lea o le tulaga malosi ma le mausali o teugatupe a le litaea a le malo o loo i ai.

“O tupe o le litaea, o le faamoemoega lea o tagatanu’u uma o Amerika Samoa. Afai e fa’aletonu ona tatou tausia lenei teugatupe i le taimi nei, e aafia alo ma fanau o loo tutupu mai i le lumana’i,” o le saunoaga lea a le afioga i le ali’i Faipule mai Saole ia Titialii Kitaea Vaiau.