I’ugafono fou a le faigamalo e fa’asoasoa ai le $3.1 miliona mai tupe totoe o le tausaga tupe 2022

Pago Pago - AMERIKA SAMOA

Na taulimaina e le afioga i le Peresetene o le Senate, ia Tuaolo Manaia Fruean, i le aso Gafua o le vaiaso ua mavae, ia se talosaga mai i le afioga i le kovana, ia Lemanu P. S. Mauga, mo se i’ugafono fa’asoasoa mo le $3.1 miliona mai, lea na totoe mai i tupe maua i le tausaga tupe o le 202, e fa’aaopoopo ai i le paketi mo lenei tausaga tupe.

O lenei i’ugafono e mo le faasoasoaina o tupe lea na aofia i totonu o le Pili a le Maota Fono 38-30, lea na te’ena (vetoed) e le kovana ia Fepuari 1, 2024.

Sa ta’ua e le afioga i le kovana i lana tusi sa fa’ao’oina atu i le peresetene o le Senate, sa faaulufaleina lenei i’ugafono e tali mana’oga i lena taimi, ae o lea ua iai foi nisi mataupu taua ua tula’i mai.

Saunoa Lemanu, sa fua uma nei manaoga ma ua faatulagaina ai lenei iugafo’aaoga no fou, i sona talitonuga, o le a mafai ona fa’aalu aoga ai lenei tupe.

E tusa ai ma faaupuga i le tomuaga o le iugafono fou e pei ona sa faauluina e le kovana, o lo o ta’ua ai e faapea, o lenei i’ugafono fou e mafai ona fesoasoani i le faatupeina o galuega a le malo, ma o le a faatulafonoina lenei I’ugafono, pe a mae’a ona pasia mai e le maota fono, ma sainia e le kovana.

 E lima ni poloketi fou sa aofia i totonu o le i’ugafono, o lo o fuafua e fa’aaogaina ai lenei tupe, e aofia ai le;

1. $1,000,000 mo le Sisiga Fu’a o lenei tausaga (2024).
2. $1,500,000 mo meafale, masini ma isi tulaga mo le fale Fono fou.
3. $400,000 mo poloketi faapitoa a le Kovana
4. $75,000 mo galuega a le Criminal Justice
5. $125,000 mo galuega faaleleia i le fale mata’aga a le malo (Jean P. Hayden Museum).

O poloketi sa aofia i le pili muamua lea na pasia e le fono, ae teena mai e le kovana, sa aofia ai le;

1. $1 miliona mo le Iupeli Siliva a le Fono Faitulafono
2. $1.5 miliona e faatau ai meafale mo le fale fono fou
3. $400,000 mo le Ofisa o Femalagaiga
4. $75,000 mo le Ofica a le Criminal Justice
5. $50,000 mo le Ofisa Tosova’a a le malo (Shipyard)
6. $75,000 mo le fale mata’aga a le malo (Jean P. Hayden Museum).

E pei ona va’ai i le i’ugafono fou, o le $1 miliona lea sa faasoasoa mo le Iupeli Siliva a le Fono Faitulafono i le pili muamua, lea o le a fa’aaogaina mo le Sisiga Fu’a o lenei tausaga.  Ae o le $400,000 lea sa fuafua mo le Ofisa o Femalagaiga, lea ua fuafua mo galuega faapitoa a le kovana, ae o le toe faaopoopo le $50,000 mo le fale mata’aga a le malo (Jean P. Hayden museum).