I’u manuia a’oga a alo ma fanau e to’a 59 mai i le a’oga maualuga a Fa’asao ma Malisi

Pago Pago - AMERIKA SAMOA

O le taeao o le aso To’onai, Iunin 8, 2024 sa alo atu ai fa’auluuluga o le ekalesia Katoliko i Amerika Samoa, o le susuga i le puleaoga ma aiga faiaoga, mo le fa’aeaeaina o alo ma fanau e to’a 59 mai i le latou aoga, i Fa’asao ma Malisi, i le latou fa’au’uga sa faaatunuuina i le fale a le DYWA i Tafuna.

O le manulauti sa ta’ita’ia ai lea aso fiafia, o le “Tu’uto i le Alii ona faamanuia ai lea o oe.”

Sa maualuga lea aso i le auai o matua, aiga ma uo, e aloaia ai foi le faai’uina o la latou galuega taua sa faia i le 12 tausaga ua mae’a atu nei, aua le u’una’ia ma le lagolago malosi, i alo ma fanau i a latou a’oa’oga.

O le afioga i le Fa’aao o le malo, le afioga i le kovana ia Lemanu P. S. Mauga sa avea ma lauga faapitoa o le sauniga fa’au’u.

Ma sa ia fautuaina le vasega fa’au’u ina ia “aua ne’i galo, e fa’amanatu pea lava pea, po o fea lava le mea e o iai.”

Na fesiligia e le afioga Lemanu ia le ‘au fa’au’u pea ua o latou sauni” mo lo latou aga’i i luma.

Aua e pei ona sa saunoa le fofoga autu o le aso i lea taeao, le susuga ia Tavita “Uncle Dave” Tautai, “o taeao ua e le toe vasega 12, o taeao ua fai oe ma ‘alumni’ a Faasao Marist.”

Sa toe fesili le afioga i le kovana i le vasega fa’au’u, “Ua e sauni?  O la’u tali, Ioe.”

E tolu lava ni vaega ma’oti sa saunoa iai le afioga i le kovana, e fa’amautu ai le lava saunia o alo ma fanau fa’au’u.

Muamua, o Tu ma Agaifanua, Aiga, Nu’u ma Afioaga.  O le lona lua, o le Lalolagi lea, A’oga a malo ma A’oga a ekalesia.  Ma le lona tolu, o le Fa’aleagaga, o le Ekalesia.

Sa faapupula atili le afioga i le kovana e faapea, “Ua outou tuputupu a’e i tou aiga, nu’u ma afioaga, o a’oa’i outou, o fafaga outou, fa’aa’o’oga outou, i Tu ma Agaifanua a si o tatou atunu’u.  O outou o Samoa, pe te sau mai o ma o, o oe o le Samoa.”

E le gata i lea sa saunoa atu le afioga i le kovana i le fanau fa’au’u e faapea, “Ua e a’oga i a’oga maualuluga, o lou soifua a’oa’oina.  O le galuega a le malo, ia a’oa’o, fafaga ma saunia oe mo le aso a taeao.  O lena le i’u o lenei aso, i la outou saili i la outou savaliga.”

Ma le lona tolu,  o le Fa’aleagaga, lea sa toe fa’atepa ai e le afioga i le fa’aao o le malo ia le fanau fa’au’u, i le 4 tausaga na se’i mavae atu, sa o latou a’o’oga ai i a’oga a le ekalesia ma sa fa’amuamua ai a’oa’oga fa’aleagaga.

I sana fa’alototelega, sa saunoa ai le afioga Lemanu, “Aua e te popole.  O mea uma la e a’oga ai taeao, ma faia a taeao, ma luma atu, ua uma ona e sauni, ua uma ona a’oa’o ai oe, lou 12 tausaga a’o e soifua.”

Na ia faapea atu foi i le fanau fa’au’u, ina ia “a’ua ne’i galo o oe o le Samoa.  O oe o le Fa’asao Malisi.  Aua ne’i galo, o oe o tama ma teine na soifua atu iinei i Amerika Samoa.  Tautuana ma oe lou faasinomaga.”

O lana toe upu i le vasega faaupu, “A manuia, iti pe tele, toe fo’i mai, aua le lumana’i o si o tatou atunu’u.”

Manuia, iti pe tele, toe fo’I mai, aua le lumanai o si o tatou atunu’u.

E to’alua i la’ua ua fa’amanuiaina i le tulaga muamua o le vasega fa’au’u a le 2024 (co-Valedictorians), o Elizabeth Tuitasi ma Princess Chiselle Franco Viesca.

O Wendy Lynn Numongong Parango sa ausia le tulaga lua (Salutatorian).

Ma sa o la maua foi se avanoa e fa’amatu’u atu ai ni o la’ua manatu ma faamoemoega e tusa ai ma lenei aso faapitoa.  Sa o la ta’ua foi tulaga na maumaututu ma tasi ai le latou vasega fa’au’u.

Sa tau’a’aoina e le tamaitai o Nari Florence Elizabeth Zandrowki se fa’ailoga faapitoa o le ‘General Excellency’ ona o lona tulaga maualuga i maka i totonu o le a’oga.

Sa tele foi nisi fa’ailoga ma sikolasipi a le fanau sa tufatufaina, na aofia ai ma se aloaia faapitoa mai i le afioga i le sui Faipule a le malo i Uasigitone, le afioga Uifa’atali Aumua Amata.