Ioe se Tina moliaga o lona umia fa’asolitulafono o mariuana

O le Tina lea o lo o tu’uaia e le malo i lona umia fa’asolitulafono lea o vaega o le laau fa’asaina o le mariuana, ua ia sauni e tu’uina atu lana tali ioe i luma o le fa’amasinoga maualuga e tusa ai o tu’uaiga fa’asaga ia te ia, i lalo o se maliliega ua mae’a ona latou sainia ma le malo, lea fo’i na fofogaina i luma o le fa’amasinoga maualuga i le taeao ananafi.

E ui o lea ua toe tolopo le tu’uina mai o se fa’aiuga a le fa’amasinoga maualuga fa’asaga i le maliliega lea ua mae’a ona sainia e Musu Failauga ma le malo, peita’i o le mea mautinoa, ua mae’a ona fofogaina i luma o ali’i fa’amasinoga tuutuuga uma ma aiaiga o le maliliega a itu e lua.

O le mataupu e pei ona tu’uaia ai e le malo ia Failauga na alia’e mai lea aso 13 Aokuso 2016, ina ua alu le ua molia i le lala o le Ofisa o Leoleo i Tafuna e talanoa ai ma se isi Leoleo e uiga i se tasi o mataupu, ae tula’i mai ai se vevesi i le va o ia ma se tasi o tama’ita’i Leoleo, ma i’u ina taofia ai loa o ia ae molia i le moliaga mama o le fa’atupu vevesi i nofoaga faitele.

Na sailia e Leoleo le ato ma le tino o le ua molia, ma maua i ai se fasi pepa o lo o afifi ai vaega o le laau o le mariuana, atoa ai ma se paipa e ula ai le pauta oona o le aisa, ma mafua ai loa ona tu’uaia o ia i le moliaga mamafa o lona umia fa’asolitulafono o vaega o le laau fa’asaina o le mariuana.

Sa maua fo’i e Leoleo i lana ato se tusi siaki o lo o tusia ai le igoa o le kamupani o le A & E Coporation, atoa ai ma fa’amaoniga o se siaki e $180 mai le tusi siaki sa i lana ato sa ia talaina i se faleoloa i Nu’uuli i le aso 3 Aokuso 2016, e ui sa ia iloaina lelei lava e le o i ai se tupe i totonu o le teugatupe o le tusi siaki o lo o ia tauaveina.

I le maliliega ua mae’a ona sainia e Failauga ma le malo, ua ia malie ai e tali ioe i le moliaga o le umia fa’asolitulafono o vaega o le laau fa’asaina o le mariuana.

I lona tali ioe ai i le moliaga e pei ona ia sauni e tali ioe ai i luma o le fa’amasinoga, sa ia ta’utinoa ai e fa’apea, i se taimi o le aso 13 Aokuso i le nofoaga o le Ofisa o Leoleo i Tafuna, ao alu atu e talanoa i se ali’i Leoleo, sa ese se tulaga sa tula’i mai ai, ina ua la vevesi ma se tama’ita’i Leoleo, ma i’u ina taofia ai o ia ma molia i le moliaga mama o le fa’atupu vevesi i nofoaga faitele.

Ina ua taofia o ia e Leoleo, sa sailia e Leoleo lana ato ma ana meatotino, ma maua i ai se afifi pepa o loo i ai vaega laiti o le mariuana, fa’apea ai ma se paipa e fa’aaoga e ula ai le pauta o le aisa.

Ua sauni fo’i Failaugau e ta’utino i luma o le fa’amasinoga maualuga, e fa’amaonia sa ia te ia se tusi siaki mai le kamupani a le A & E Coporation.

Ua malie le malo o le a latou le failaina se moliaga fa’asaga ia Failauga e tusa ai o le siaki e $180 lea sa ia sainia ma tala i le faleoloa i Nu’uuli, ae o le a latou finau i le fa’amasinoga ina ia fa’atonu Failauga e toe totogi le tupe e $180 i le faleoloa, o se tasi lea o tuutuuga o lana nofovaavaaia.

Ina ua mae’a ona faitau e le loia a le malo ia Bob Pickett tuutuuga uma o le maliliega i luma o ali’i fa’amasino, lea fo’i sa fa’aliliu e le sui o le Ofisa Fa’anofovaavaaia, na faia ai loa se malologa puupuu a afioga i ali’i fa’amasino, ae i le mae’a ai o le malologa a ali’i fa’amasino, na faia ai loa sa latou feiloaiga puupuu ma loia i luma o le nofoaga a ali’i fa’amasino, ma faia ai loa le fa’aiuga ina ia toe tolopo le fa’aauauina o le maliliega i le va o Failauga ma le malo, e toe fofogaina i le taeao o le aso 23 Novema.

O lo o taofia pea Failauga i le toese i Tafuna e fa’atali ai le aso lea ua fa’atulaga e toe valaau ai lana mataupu.