Ioe le ali’i 22 tausaga i moliaga e 3 o le talepe fale

O le ali’i e 22 tausaga le matua lea na tu’uaia e le malo i moliaga eseese e 20, e mafua mai i le fa’alavelave lea na ia osofaia ai fale o aiga e to’atolu i se taimi o le po ma le fa’amoemoe e fa’ataunu’u ai ni solitulafono eseese, ua ia ta’utino i le fa’amasinoga e fa’amaonia tu’uaiga fa’asaga ia te ia.

I le tali ioe ai o le ali’i o Uatau Falana’i i moliaga mamafa e 3 o le talepe fale i le tulaga muamua, na talia ai loa e le fa’amasinoga maualuga se talosaga na fa’aulu e le malo, ina ia solofua isi uma moliaga o lo o totoe ai i le pepa o tagi sa latou fa’aulu.

O le aso Gafua na te’a nei na fa’atulaga e amata ai le fa’amasinoga autu a le ali’i o Falana’i, e ala i le filifilia lea o ni ali’i ma ni tama’ita’i iloilo iuga latou te iloiloina se fa’aiuga o lana mataupu, peita’i a o fa’agasolo taualumaga masani a le fa’amasinoga e sailia ai i latou e avea ma ali’i ma tama’ita’i iloilo iuga, na fautuaina ai loa e le afioga i le ali’i fa’amasino sili ia Michael Kruse loia a itu e lua mo sa latou talanoaga fa’apitoa.

E talitonu le Samoa News, o le talanoaga sa faia i le va o ali’i fa’amasino ma loia a itu e lua, na mafua ai loa ona fa’amuta le sailia o ni ali’i ma ni tama’ita’i iloilo iuga, ae galulue loa itu e lua fa’atasi ai ma le ali’i o Falana’i mo le tu’u fa’atasia o le latou maliliega lea ua mae’a ona tolaulauina i luma o le fa’amasinoga ma ua talia fo’i e ali’i fa’amasino.

I le tali ioe ai la o Falana’i i le moliaga muamua o le talepe fale i le tulaga muamua e pei ona taua i le latou maliliega ma le malo, sa ia ta’utino ai e fa’apea, pe tusa o le itula e 4:00 i le vaveao o le aso 16 Aperila 2016, sa ia ulufale fa’amalosi ai i totonu o le fale a le ulua’i aiga na a’afia e aunoa ma se fa’atanaga, ma le fa’amoemoe na te fa’atinoina ai se solitulafono i totonu.

Na ta’utino Falana’i e faapea, na avea lona ulufale fa’amalosi i totonu o le fale o le aiga na a’afia ma itu na fefefe ai i latou, ma tula’i mai ai le isi moliaga o le fa’atupu vevesi i totonu o se aiga.

I le tali ioe ai o le ua molia i le moliaga lona lua o le talepe fale i le tulaga muamua, sa ia ta’utino ai e fa’apea, i le aso 16 Aperila 2016 pe tusa o le itula e 4:15 i le vaveao, sa ia ulufale fa’amalosi ai i totonu o le fale o le aiga lona lua na a’afia. O lona ulufale fa’amalosi i totonu o le fale o lea aiga na mafua ai ona tutupu lagona fefefe i le aiga, ma atagia mai ai lo latou matata’u ia te ia.

I le tali ioe ai o Fanala’i i le moliaga lona tolu o le talepe fale i le tulaga muamua, sa ia ta’utino ai e fa’apea, i le aso 14 Me 2016 pe tusa o le itula e 5:15 i le vaveao, na ia ulufale fa’amalosi ai i totonu o le fale o le aiga lona tolu.

Ina ua fesiligia e le afioga i le ali’i fa’amasino ia Michael Kruse ia Falana’i pe aisea na ia ulufale fa’amalosi ai i totonu o fale o aiga na a’afia, ae na tali le ua molia, na ia ulufale ona o lona manatu e fa’atino ai ni solitulafono i totonu o fale o aiga na a’afia.

Na fa’ailoa e le loia a le malo ia Jerard Murphy ma le loia a le ua molia ia Karen Shelly i le fa’amasinoga e fa’apea, o le maliliega ua latou sainia ua talafeagai lea ma le manaoga o aiga na a’afia i lenei fa’alavelave

O lo o taofia pea Falana’i i le toese i Tafuna e fa’atali ai le aso 20 o Ianuari 2017 lea ua fa’atulaga e lau ai lana fa’asalaga.