Ioe ali’i 56 tausaga i lona faia o uiga mataga teineititi 10 tausaga

O le ali’i e 56 tausaga le matua lea na tu’uaia e le malo i lona faia o uiga le taupulea i se teineititi e 10 tausaga le matua, ua ia ta’utino i le Fa’amasinoga Maualuga i le vaiaso nei, e moni ma fa’amaoni tu’uaiga fa’asaga ia te ia.

O le aso Lulu na tula’i ai Ioakimo Felise i luma o le afioga i le ali’i Fa’amasino ia Elvis P. Patea mo le fofogaina o se maliliega ua mae’a ona latou sainia ma le malo. O le ali’i loia fautua ia Rob McNeill na tula’i mo ia, ae o le tama’ita’i loia sili lagolago ia Christy Dunn na tula’i mo le malo.

Na taofia pea lava i le toese i Tafuna ia Felise e aunoa ma se tupe na fa’atulaga e tatala ai o ia i tua, ona o le matuia o le tu’uaiga sa faia fa’asaga ia te ia.

E 10 moliaga mamafa na ulua’i molia ai e le malo ia Felise. O ia moliaga mamafa e aofia ai moliaga e 3 o le faia o amioga mataga i fanau e i lalo o le 12 tausaga le matutua; 1 le moliaga o le fai’aiga fa’amalosi; 2 moliaga o le faia o uiga mataga fa’asotoma, ma moliaga e 4 o le tagofia o itutinosa o se teineititi e laititi i lalo o le tulafono.

Ae i lalo o se maliliega na sainia e Felise ma le malo, na ia malie ai e tali ioe i moliaga mamafa e 2, le moliaga o le faia o uiga mataga i fanau e i lalo o le 12 tausaga le matutua, o se moliaga e mafai ona fa’asala ai o ia i le toese mai le 10 e oo atu i le 30 tausaga, faapea ai ma le moliaga o lona tagofia o itutinosa o se teineititi e laititi i lalo o le tulafono, o se moliaga e mafai ona fa’asala ai o ia i le toese mo le umi e mafai ona oo atu i le 5 tausaga, poo le salatupe e oo atu i le $5,000, poo le fa’asala fo’i i fa’asalaga uma ia e lua.

I le tali ioe ai o Felise i moliaga e pei ona ta’usala ai o ia, sa ia tautino ai e fa’apea, i le aso 25 o Aperila, 2018 i Amerika Samoa, sa ia faia ai ni uiga le taupulea i se teineititi e 10 tausaga le matua.

Na fa’ailoa e Felise i le fa’amasinoga e fa’apea, o ia sa aoga i le setete o Kalefonia i Amerika, lea na nofo ai ina ua fa’atoa 13 ona tausaga. I le tausaga e 2001, na toe taliu mai ai loa i Amerika Samoa.

O fa’amaumauga o le maliliega a Felise ma le malo, na mafai ai ona fa’amatala auiliili tulaga uma o le fa’alavelave sa tula’i mai.

Na taua e le malo e fa’apea, o le mataupu lenei na mafai ona tofu atu i le Ofisa o Leoleo, ona o se galuega lelei sa faia e ni tama’ita’i se to’alua sa la vaaia le teineititi na a’afia o loo tamo’e mai i se auala e aga’i i luga o se mauga i Nu’uuli, ma lona tino e palapala uma. E lei umi ae toe vaaia e tama’ita’i lava nei se tamaloa matua o lo o tamo’e mai ai i tua, e palapala uma fo’i lona tino.

O lagona masalosalo na tutupu a’e ai loto o tama’ita’i nei na mafua ai loa ona la fa’atuina se ta’avale Leoleo na ui ane i luga o le auala i le taimi lea, ma la fa’asino loa i ai le teineititi ma lona tino palapala o lo o savali atu i luga o le auala, ina ia siaki ma fesiligia o ia i le mafua’aga o le palapala o lona tino.

E le i fa’atuai Leoleo e to’alua sa i totonu o le ta’avale, ae ua fa’anatinati atu loa ma taofi le teineititi ae tu’u i totonu o le ta’avale. Ina ua fesiligia e Leoleo le teineititi ao i ai i totonu o le ta’avale, sa ia fa’amatala i Leoleo le Tamaloa na faia uiga mataga ia te ia o loo savali mai i luga o le auala.

Na vavave gaioiga a Leoleo ma maua atu ai ia Felise toeititi lava lilo atu lona tino i tua o se tasi o Faleoloa i Nu’uuli, ma taofia mai ai loa o ia ae tu’u i totonu o le Ta’avale Leoleo, ma aga’i atu ai loa i le Ofisa o Leoleo i Tafuna mo suesuega.

E eseese potu na fa’atalatalanoa ai e Leoleo ia Felise ma le teineititi na a’afia. Na taua e le teineititi i Leoleo e fa’apea, e fa’alima ona ave e Felise o ia i luga o le mauga ma fa’amalosi ai. O taimi uma e 5 sa fa’amalosi ai e  Felise o ia, na te tuuina atu ai se tupe ia te ie e fa’atau ai lana meaai i le aoga. O le aofa’i atoa o le tupe na avatu e Felise ia te ia e $100.70

Na taua atili e le teineititi i Leoleo e fa’apea, o taimi e tuua ai le aoga i le aoauli e alu atu ai Felise ma ave o ia i luga o le mauga ae fa’atino ai gaioiga mataga e pei ona ia fa’amatalaina.

Ina ua fesiligia e Leoleo ia Felise, sa ia ioeina ai fa’amatalaga uma a le teineititi e fa’atatau i le fa’alavelave sa tula’i mai.

Na taua e Felise i Leoleo e fa’apea, e fa’atolu ona ia faia uiga mataga i le teineititi i le masina o Mati ae fa’alua i le masina o Aperila. Sa ia ta’utino i Leoleo e faapea, o le taimi lava la te taunu’u ai i luga o le mauga, na te fa’amalosia ai loa le teineititi, a mae’a, ona ia ave lea i ai o tupe mo ia.

Na taua i fa’amaumauga a Leoleo le malosi o le manogi pia i le tino o Felise i le taimi na fesiligia ai o ia e uiga i lenei mataupu.

Ina ua fesiligia e le afioga i le ali’i Fa’amasino is Patea ia Felise, pe na te ioeina vaega uma o le tagi a le malo fa’asaga ia te ia, aemaise ai mau fa’amaonia ia sa fuafua le malo e tuuina atu i luma o le vaega iloilo iuga i le vaiaso fou pe ana faapea e fa’ataunu’u lana fa’amasinoga autu, na tali le ua molia, “o lea lava”.

Na fa’ailoa e Dunn i le fa’amasinoga e fa’apea, ana faapea e fa’ataunu’u le fa’amasinoga autu a Felise i le vaiaso fou, e le gata e molimau le teineitiiti na a’afia, ae molimau fo’i le tama’ita’i Leoleo Suesue ia Det. Vasa Wells mo le itu a le malo.

O le tausaga e 2011 na ta’usala ai Felise i lona faia o uiga mataga i se teineititi e 10 tausaga le matua, ina ua ia toso le teineititi i tua o le Fale Talimalo a le aiga ma taumafai e fa’amalosi ina ia fa’amalie ai ona lagona tu’inanau, ae na taofi lana gaioiga ina ua valaau atu i ai se tagata o le aiga.

O loo taofia pea Felise i le toese i Tafuna e fa’atali ai le aso 3 o Ianuari o le tausaga fou lea ua fa’atulaga e lau ai lana fa’asalaga.