Iloiloina e le Senate le mafuaaga o le le aofia o le ‘veto override’ i le palota o loma nei

Pago Pago - AMERIKA SAMOA

O le taeao o le aso Gafua na se’i mavae atu nei, sa molimau ai le susuga ia Uiagalelei Lealofi, le Komesina a le Ofisa Palota, i luma o le Komiti o Faamasinoga a le Senate ma ia ta’ua ai e faapea, i sona manatu, ua fai sina tuai o le fa’aopoopoina o le suiga mo le ‘veto override’ i le pepa palota mo le palota lautele, o loma nei ia Novema 5.

O se fa’amaninoga lea a Uiagalelei, ina ua fesiligia e le Peresetene o le Senate, le afioga i le Senatoa ia Tuaolo Manaia Fruean, po o aofia ia suiga i pepa palota mo le palota lautele ia Novema.

Sa saunoa Uiagalelei, o lenei mataupu, o se mataupu taua tele ae sa ia faamamafaina lona tu’uto i le mulimulita’i i tulafono tau palota, ma ia faailoa mai e faapea, o lea ua amata palotaga mo ‘absentee voters’, po o i latou o lo’o palota mai i atunu’u i fafo po o tagata o le atunu’u o le a iai i le teritori i le aso palota, e pei ona faatonuina mai e le tulafono.

Ae sa toe fesiligia e Tuaolo pe ua le toe aoga lenei fa’aopoopo taufa’aofi, ona o lea ua amata palota ‘absentee’.  Sa tali faamaonia mai Uiagalelei i le fesili a le afioga i le Peresetene, e tusa ai ma tulafono tau palota.

Na fesiligia e le Taitaifono o le Komiti, le afioga i le Senatoa ia Soliai Tuipine Fuimaono, pe iai se fa’afitauli pe afai ae meli lenei fa’aopoopoga ia i latou ua mae’a ona palota, ina ia mafai ona o latou palota mai ai.

Sa toe saunoa mai Uiagalelei, o lenei mataupu o se mataupu taua tele ma e manaomia ona malamalama lelei ia tagata palota i nei faaopoopoga taufa’aofi, ma sa ia toe faamamafaina foi le fa’afaigata o le finagalo a le Taitaifono, ona o fa’asea o le a tula’i mai ai, mai i le mamalu lautele.

Ae peitai, sa le’i faamalieina le finagalo o le afioga ia Soliai i le tali a Uiagalelei, ma ia liliu ai i se manatu mai i le loia a le Ofisa Palota, lea na auai faatasi atu ma Uiagalelei, le susuga ia Nathaniel Sotoa Savali.

Sa faamalamalama mai e Savali, e le o fa’amaoti mai i totonu o le Faavae se taimi e fa’atapula’a ai le tufatufaina atu o ni faaopoopoga taufa’aofi i tagata palota.

Na saunoa Savali, o so’o se faaopoopoga taufa’aofi, e pasia i le tolu vae lima o sui faitulafono, palota eseese, e ao ona talosagaina loa le Kovana ina ia fa’ao’oina atu nei faaopoopoga taufa’aofi, i tagata palota, i le palota lautele o soso’o ai.

Sa saunoa foi Savali, o fa’afitauli e pei ona saunoa ai Uiagalelei, e fa’atatau lea i tiute faaopoopo o le a fafa i luga o le aufaigaluega a le ofisa palota faapea ai ma se vaegatupe o le a manaomia, e faatino ai le fautuaga a le Taitaifono o le Komiti a le Senate, le afioga ia Soliai.

Na fesiligia e le afioga i le Senatoa ia Togiola T.A. Tulafono ia Uiagalele, pe mafai ona lomia ia faaopoopoga taufa’aofi i ni pepa, e ‘ese mai i pepa palota, sa tali Uiagalelei, e mafai.

Sa saunoa Togiola, sa ia mauaina mai se tusi mai i le Kovana o lo’o auiliili mai ai lona manatu e uiga i lenei mataupu, ae e le o aofia mai ai le tulaga e pei ona sa saunoa ai Uiagalelei.

O lea na fesiligia ai e le afioga i le Senatoa ia Uiagalelei, pe na lagolagoina ia le vaega o le Faavae lea o lo’o ma’oti mai ai le tatau i le Kovana ona fa’ao’oina atu ni fa’aopoopoga taufa’aofi i tagata palota, i le palota lautele e soso’o ai, pe a mae’a ona pasia e le Maota Fono nei faaopoopoga.

Sa tali Uiagalelei, e na te lagolagoina le manatu fa’aalia a le Kovana, lea o lo’o ta’ua ai le tuai ona aofia o faaopoopoga taufa’aofi i le palota o loma nei, e pei ona ta’ua e le Kovana i lana tusi sa fa’ao’oina mai i le Peresetene o le Senate ma le Fofoga Fetalai.

Sa toe fesiligia e Togiola ia Uiagalelei, pe na te usita’ia le faatonuga a le Kovana ae le o aiaiga o le tulafono.  Lea sa tali mai ai Uiagalelei, i sona talitonuga, o lo’o i le Kovana le pule ma o le a ia usiusitai i ana faatonuga.

Na toe fesiligia ai Uiagalelei e Togiola, pe na te usiusitai i le Kovana, e tusa lava pe solia ai le tulafono.  Sa toe faapea atu Togiola ia Uiagalelei, le Komesina a le Ofisa Palota.  O ia e faia fa’ai’uga e fa’atatau i mataupu tau palota.  O ia foi e faia faaiuga e fa’atatau i tulafono tau palota. 

Ma na toe fesiligia ai e Togiola ia Uiagalelei pe le o ona tiute ia.  Ae peitai, sa le’i tali mai Uiagalelei i le Ioe po o le Leai, ae sa ia taumafai e toe fa’amalamalama, ma o iina na fa’atonuina ai o ia e Togiola ina ia tu’u mai se tali sa’o.  Lea sa tali mai ai loa Uiagalelei, e le mafai ona ia tu’uina mai se tali o ia ituaiga fesili.

Ina ua fesiligia o ia e Togiola, pe aisea, sa toe saunoa Uiagalelei e tusa ai ma sona manatu, o lo’o i le Kovana le pule, ae peitai, e le’i mae’a le saunoaga a Uiagalelei, ae toe faauilavea atu Togiola ma ia fesiligia po o fea e aumai ai le pule a le Kovana, e faatonuina ai o ia (Uiagalelei) e fai le mea o lo’o ia (Kovana) fa’atonuina mai, ae le mulimuli i le tulafono.

Na fa’alalolalo mai Uiagalelei i sui o le Senate, i lona faapea mai, e tusa ai ma sona manatu maualalo, ona o le le’i mautu le faavae o le tulaga faafaigamalo (political status) a le malo, ae e le’i mae’a lelei mai lona manatu ae toe faauilavea atu foi Togiola, i lona fia malamalama, po o le a le uiga o le saunoga a Uiagalelei, e tusa ai ma le ‘political status’ a le malo.

Sa fesili Togiola po  o le saunoaga a Uiagalelei, e le o manino le tatou ‘political status’ , o lona uiga, e mafai e le Kovana ona fai so’o se tulaga e finagalo ai o ia, e o’o lava i le solia o le tulafono.  

Na toe tali mai Uiagalelei, e fai sina fefeu o lenei mataupu.   Sa ia faamalamalama mai e faapea, i tulaga faapenei, o lo o i le Kovana le pule e faia ai faaiuga taua, aua se lelei mo tagata o le atunu’u ma le malo o Amerika Samoa.

Sa toe fesili Togiola, po o fea e aumai ai le pule lea a le kovana.  Na ia ta’ua e faapea, e sefulu tausaga na avea ai o ia ma kovana, ma e na te le i vaai lava i se vaega o le Faavae, po o se vaega o Tulafono Teuteuina a Amerika Samoa, o tu’u mai ai lea ituaiga pule i le Kovana.

Sa toe taumafai Uiagalelei e faamanino mai le sili atu o le pule a le Kovana i lo is ilala e lua a le malo, ae peitai, na faauilavea lana saunoaga e le Taitaifono a le Komiti ia Soliai, lea na fesiligia Uiagalelei, po o ona silafia, e tuto’atasi lona ofisa, e ui lava ina sa filifilia o ia e le Kovana, ae o ia e faia fa’ai’uga i mataupu e patino i palota lautele.  

Sa saunoa Soliai, e le tali Uiagalelei i le Kovana, e le o ia o se sui o lana kapeneta.

Na toe soso’o mai ai ma nisi fesili a Togiola i le alii loia ia Savali, po o iai se vaega o le Faavae ma Tulafono a Amerika Samoa po o le Iunaite Setete, o lo’o ta’ua mai ai pe afai, e iai se fete’ena’iga i le va o le tulafono ma faaiuga a le Kovana, e tatau ona fa’amuamua le faaiuga a le Kovana.

Sa tali le alii loia, e leai.

O lea na toe fesili ai Togiola, po o fea o sau ai le pule o le Ofisa Palota ma le manatu, e mafai e le Kovana ona faia o so’o se faaiuga e mana’o ai, ae le amanaia le tulafono.

Sa faamalamalama mai e Savali e faapea, ina ua pasia e le Maota Fono ia nei faaopoopoga taufa’aofi, ma fa’ao’oina atu le I’ugafono Aufa’atasi a le Senate i le Kovana e pei ona fa’atonuina mai e le tulafono, sa faapea loa ona soalaupuleina e le Kovana ma le Komesina o le Ofisa Palota ia lenei mataupu.

Na saunoa Savali i le iloiloina e le Kovana o le faigofie ona faatinoina o lenei i’ugafono, aua o lea ua amata ia palota ‘absentee’.  Ma o le fa’ai’uga o le latou iloiloga lea e pei ona sa ta’ua i totonu o le tusi mai i le Kovana, i taitai o le Maota Fono.

Na fa’amanino mai foi e Savali, o lenei fa’ai’uga, e le’i faia to’atasi e le Komesina o le Ofisa Palota.

Na toe fesili Togiola, pe afai ae suia le manatu o le kovana ma ioe i le fa’ao’oina atu o nei suiga taufa’aofi i tagata palota mo leisi palota lautele, mata e ioe iai le taitai o le Ofisa Palota.  

Sa tali Savali, e tusa ai ma le tulafono, e mafai, ae e sili ona tu’u atu ia Uiagalelei, e na te tali sa’o mai i lea fesili.

Na fa’ailoa mai e Uiagalelei, e na te ioeina.

Ona talosagaina lea e Togiola ia se fa’amaoniga mai i molimau, i le leai o se taimi fa’atapula’aina i totonu o le Faavae, e mafai ai ona fa’auluina atu ni fa’aopoopoga taufa’aofi, ua pasia e le Maota Fono, i le Kovana, ina ia aofia i totonu o leisi palota lautele e soso’o mai.

Na fa’amaonia e Savali ia le saunoaga a Togiola, e tusa ai ma la gagana a le Faavae, e leai se taimi faatapula’aina, o lona uiga, e tusa lava pe fa’ao’oina atu i se aso a’o loma le palota, po o le aso foi o le palota, e mafai lava ona aofia i totonu o le palota.

Sa fesili fia malamalama foi Togiola, po o le a le mea e tupu i so’o se faaopoopoga taufa’aofi e le aofia i totonu o le palota lautele, po o le uiga o lea tulaga, ua fa’aleaogaina nei suiga.

Na toe tali mai Uiagalelei, ona o le taua tele o lenei mataupu, i sana fautuaga, e mafai ona toe fa’aulu atu nei faaopoopoga taufa’aofi i leisi nofoaiga a le Fono Faitulafono, ina ia mafai ona aofia i totonu o le palota lautele 2026.

Sa le’i ta’oto lelei le saunoaga a Uiagalelei i le fa’afofoga a le afioga i le Senatoa, lea na ia saunoa mai ai e faapea, e foliga mai ua faatonutonu e le Faigamalo ia le faatinoga o le tiute a le Fono Faitulafono, e pei ona fa’ata’oto mai e le tulafono.  

Na saunoa Togiola, o lo’o manino mai lava i le Faavae le tutusa o le malosiaga o lala e  tolu a le malo.

I le tusi a le Kovana sa ia fa’ao’oina mai i le Peresetene o le Senate ia Setema 26, sa fa’ailoa mai ai e le kovana le le mafai ona aofia o fa’aopoopoga i le Faavae i le palota lautele ia Novema 2024, ona ua mae’a ona lolomi ia pepa palota ma ua mae’a ona tufatufaina, ina ia mafai ai ona faia iai le palota.

Ma na ta’ua e le afioga i le Kovana Lemanu P.S. Mauga, o le a ia mataituina le sauniaina o nei fa’avae faaopoopo, e tufatufaina i tagata palota, i leisi palota lautele o tua atu.  Ina ia leai se fa’afitauli e ono tula’i mai i le palota o loma nei, ae ia lava ai foi se taimi ma le avanoa e nofo malamalama ai tagata palota i le taua o lenei fa’aopoopoga taufa’aofi i le Faavae.

O lenei fa’aopoopoga taufa’aofi (veto override) o le a tu’uina atu ai le pule i le Fono Faitulafono, e toe suia se faaiuga e faia e le kovana i so’o se pili, e pasia mai e le Fono, ae te’ena e le Kovana.  Ma e avea ai lea tulaga, ma auala e mafai ai ona fa’atulafonoina pea se tulafono, e ui ina te’ena (veto) e le kovana, pe a mafai ona toe pasia e le Maota Fono i se palota lua vae tolu, mai i maota ta’itasi.

I le taimi nei, afai ae te’ena (veto) e le kovana ia se pili, ae toe pasia faalua e le Maota Sui ma le Senate, ona aga’i lea o le pili i le Failautusi o le Initeria mo le faaiuga.

I le masina ia Ianuari, na pasia ai e le Senate ia se i’ugafono aufa’atasi ma fa’ao’oina atu i le Maota o Sui.  Na ta’atia ai iina le pili, seia o’o i le aso Faraile o le vaiaso ua mavae, lea na fa’ato’a pasia e le Maota o Sui.  Ae o le aso Tofi sa maua ai e le Senate se fa’amaoniga mai i le Maota o Sui, ua pasia le SCR 38-2.

I le amataga o le iloiloga i le aso Gafua, sa fa’ailoa atu ai e le Komesina o le Ofisa Palota, i le Taitaifono o le Komiti a le Senate, le afioga i le Senatoa, e to’a 15,284 tagata palota ua mae’a ona lesitala, ae e to’a 280 tagata palota ‘absentee’, ua mae’a ona palota.