Iloiloina e le Senate lafoga a le Pago Wings mo oloa faaulufale mai

Pago Pago - AMERIKA SAMOA 

I se iloiloga a le Maota o le Senate sa faataunuuina i le amataga o le masina, i lona nofoaiga lona 38, sa fa’ailoa atu ai e le Tausitupe a le Malo, le susuga Malemo Tausaga, i afioga i Senatoa le le’i totogia e le kamupani vaalele fou o le Pago Wings, ia le lafoga i le latou vaalele fou lea ua i totonu o le teritori.

E tusa ai ma se lipoti maua mai i le ‘ch-aviation.com’ i luga o ‘upega tafa’ilagi, o lo o ta’ua ai le leai o se lafoga totogi mo le faaulufaleina mai o le va’alele fou (Tecnam P2012)  #N12Il02P, a le Pago Wings.  O lo o ta’ua foi i luga o le ‘FlightRadar’, na taunuu mai i laufanua o Amerika Samoa ia lea vaalele, ia Setema 29, 2023.

Na fesiligia e nisi o sui faitulafono ia Malemo, i le mafuaaga ua fa’ataga ai ona aumai le vaalele, pe afai e le i totogia se lafoga.  Sa tali le Tausitupe a le malo, o se tulaga masani lea a le Customs o le tatalaina atu o oloa a faipisinisi po o tagata e ana nei oloa, pe afai ua mae’a ona faia se feutagaiga mo le faia o peimeni o lafoga.  E ui lava e le o faatulafonoina lea tulaga.

O le amataga o le masina sa amata ai ona faia ni malaga fa’ata’ita’i a le Pago Wings, mo le amatalaia o lana tautua i totonu o le teritori.

Sa saunoa le afioga i le Senatoa ia Magalei Logovii, na ia maua se faamatalaga e le i iai se kilia a le Pago Wings, e lele mai ai lana vaalele i Amerika Samoa, ma e taunu’u mai le vaalele, e le i iai ni faamaumauga ua kilia mai e le FAA.

E ui ina e le o ta’ua i le lipoti a le ‘ch-aviation’ pe moni lea tulaga, ua na ona lipotia le masalomia o le tupu o lea tulaga.

Sa saunoa foi Magalei, na taumafai le aufaigaluega a le ofisa o Tiute e taofi le tatalaina i tua o le vaalele, seia mae’a ona totogi lana lafoga, ae peitai, sa faaleaogaina lea taumafaiga.

O lo o ta’ua i fa’amaumauga a le FAA, o lo o lesitala le vaalele #N1202P i lalo o Paramount Builders, Inc., lea e pulea e le susuga ia Papali’i Laulii Alofa.  E lua nisi vaalele Tecnam P2012 o lo o lesitala foi ia Paramount (N1203P & N1214P) ma o lo o faatalitali le taunu’u mai i le teritori.  O le vaalele #N1203P lea o lo o ta’ua mai, o lo o i Honolulu.

Ia Novema o le tausaga ua mavae, na lipotia ai e le Samoa News le taunuu mai o le vaalele muamua (9-seater Tecnam Traveller) i le faaiuga o Oketopa ma o le fuafuaga a le ofisa vaalele, o le fa’afaigaluegaina o ni pailate e to’a 10 pe 12, mo faimalaga i le va o Amerika Samoa ma Hawaii, ae to’atasi se pailate o le a faamautu i totonu o le teritori.