Iloiloga a le Senate mo le lagolagoina o le ofo a Amerika Samoa ina ia talimalo i ta’aloga o le Pasefika 2029

Pago Pago - AMERIKA SAMOA

O le aso Tofi o le vaiaso ua mavae, na soalaupuleina ai e le Komiti o Paka ma Malaeta’alo a le Senate faapea ma nisi o taitai o le malo, ia se I’ugafono Aufaatasi a le Senate, e lagolagoina ai le tauofoga a le malo o Amerika Samoa ma le Komiti o ta’aloga faaolimipeka a le teritori (ASNOC), ina ia talimalo Amerika Samoa i ta’aloga o le Pasefika i le 2029.

O molimau mai i le malo na auai mai i lenei iloiloga, sa aofia ai le afioga ia Loa Tauapai mai i le Ofisa o le Kovana, Ken Tupua, le Faatonusili o le Ofisa o Paka ma Malaeta’alo a le malo, le tofa ia Tuia’ana Ed Imo, le taitai sinia o le ASNOC faapea ma le Failautusi ia Vaiala Ethan Lake.

I lana ulua’i folasaga, sa faaleoina ai e Loa le le’i manuia o taumafaiga a Amerika Samoa i tauofoga o le 2018 ina ia talimalo i ta’aloga o le Pasefika i le tausaga fou.  O Palau lea na manumalo i lea tauofoga.

E tusa ai ma ripoti a vaega fa’asalalau i lena tausaga, sa fa’auluina tauofoga mai ia  Amerika Samoa ma Niue mo ta’aloga o le 2025 ae peitai, ina ua mae’a ona iloiloina e le Komiti autu o Taaloga o le Pasefika ia ofo mai i malo e lua, na fa’ailoa mai ai e Andrew Minogue le Faatonusili Aoao o le Komiti o Taaloga o le Pasefika (PGC) i se fonotaga na faia i Apia i le 2018, le le’i faamanuiaina o tauofoga a Niue ma Samoa, ona e le’i o gatasi ma tulafono fa’ata’atia a le PGC.

Ma na ta’ua i se ripoti a se tasi o vaega fa’asalalau, o nisi o mataupu sa le’i aofia i totonu o tauofoga a Amerika Samoa ma Niue, e ono mafai ona malo ai, o se fa’amaoniga mai i faigamalo ta’itasi, i lo latou lagolagoina lea o lenei tauofoga ina ia talimalo i ta’aloga mo le pasefika.

Ma na molimau ai Loa i le iloiloga a le Senate i le vaiaso ua mavae, na fa’ataunu’uina i le amataga o le tausaga nei ia iloiloga o ulua’i tauofoga mo ta’aloga o le Pasefika i le tausaga e 2029, ma mai lea iloiloga, ua na’o Amerika Samoa ma le atu Kuki sa filifilia mai ai.

O le masina o Me lea na malaga mai ai le Peresetene o le PGC o Vidya Lakhan faapea le CEO ia Minogue, e asia ia nofoaga o le a fa’ataunu’uina ai ta’aloga ma fa’amautu ai ‘au ta’a’alo, ma o le masina fou lea o le a faia ai se latou fa’ai’uga, i Palau.

Na saunoa Loa, e tasi lava le maka o lo’o pa’u ai Amerika Samoa.  Ma sa ia faamalamalama mai i afioga Senatoa, e foliga mai o lo’o alu le palota a taitai o le PGC i le atu Kuki ona o lo’o aofia i le latou faigamalo ia se itu Agai, e paleni ai le fa’afoeina o le malo.

Ae ona o Amerika Samoa e ese foi le fausaga o lona faigamalo, e leai sona itu Agai.  Ma na ta’ua e Loa le galulue so’otau’au o le afioga i le Lutena Kovana, le tofa ia La’apui Talauega E.V. Ale ma le ASNOC e tu’ufa’atasia o se tauofoga maumaututu.

Ma ua talitonu le afioga i le Kovana ia Lemanu P.S. Mauga, e mafai ona malosi le ofo a Amerika Samoa ma ono fa’amanuiaina ai lana taumafaiga, i le lagolago mai a le Fono, e ala i se I’ugafono Aufa’atasi.

Na fesiligia e le afioga i le Senatoa ia Muagututi’a Tauoa ia le paketi ua fa’aagaga mo nei ta’aloga ma pe ua gafatia ia ni fale e fa’amautu ai ‘au ta’a’alo o le a faimalaga mai.

Sa faamanino foi e le afioga i le Peresetene o le Senate ia Tuaolo Manaia Fruean, o le a fa’ao’oina atu le tauofoga a Amerika Samoa ina ia talimalo i ta’aloga o le 2029, pe a faimalaga atu le malo i Palau ia Oketopa mo ta’aloga o le Pasefika 2024.  Afai ae fa’amanuiaina lenei taumafaiga, e lima tausaga lea o le a mafai ona faamae’ae’a ai tapenapenaga a le teritori mo ta’aloga i le 2029.

Ae peitai, sa faaleoina e le afioga i le Senatoa ia Malaepule Saite Moliga lona lagolagoina o atugaluga na saunoa mai ai Muagututi’a ma ia ta’ua e faapea, o nei mataupu e tatau ona aofia foi i totonu o le tauofoga, e fa’ailoa atu ai i le PGC le tu’uto o le malo o Amerika Samoa i lenei fuafuaga.

Na fesiligia e le afioga i le Senatoa ia Satele Aliitai Lili’o ia taitai o le ASNOC po o latou galulue faatasi ma le Ofisa o Aoga, e sauni fanau talavou o le a faimalaga atu i ta’aloga, e avea ma sui o le teritori i nei fa’agatama fa’avaomalo.

Na saunoa Satele, e foliga mai o lo’o alu le faamamafa i ta’aloga e pei o le lakapi, soka ma volipolo, ae na te le o va’ai o fai ‘afeleti’ a aoga maualuluga, po o isi ta’aloga e pei o ‘sailing’ ma le ‘golf’ ma sa ia fautuaina le tatau ona aofia ma nei fa’agatama i totonu o ta’aloga o lo’o a’oa’oina i fanau talavou o le a tauva i le Olimipeka i le 2028 ma Taaloga o le Pasefika i le 2029 faapea ma Olimipeka o le 2032.

Sa saunoa le Failautusi o le ASNOC, ia Lake, na talu lava ona filifilia i la’ua ma le susuga i le Peresetene ia Tuiaana, ua mafai ona o la auai atu i taaloga o le 2019 ma le 2023 a le Pasefika, ma maitauina sitepu o lo’o mana’omia ona la’asia e tapenapena ai fanau ta’a’alo talavou, mo nei fa’agatama fa’avaomalo.

Sa ia faamamafaina foi le vaega taua o nei tapenapena o a’oa’oga tau ta’aloga ma o lo’o latou galulue malolosi ina ia mafai ona iai ni toleniga faapolofesa i totonu o ‘au ta’a’alo uma.

Na ia ta’ua foi e faapea, i ni nai vaiaso e le’i mavae atu, sa o latou aumaia ai ni faiaoga (coaches) faavaomalo mai i le Polokalama o le OSEP (Oceania Sports Education Program) mai i Fiti, ina ia mafai na toleni taitai ma faiaoga (officials) tau taaloga a le teritori.  

Sa ta’ua e Vaiala e 27 ‘au ta’a’alo o lo’o i lalo o le fa’amalumaluga a le ASNOC sa auai i lea polokalama ma ua mumu ai se naunautaiga i nei ‘au ta’alo faavaomalo, ina ia tu’uina mai la latou lagolagosua ia Amerika Samoa.  Ma sa ia ta’ua foi le leai o se tupe a le ASNOC e fesoasoani ai ia i latou.

Ae peitai, o lo’o latou galulue faatasi ma le Ofisa o le Kovana, le Ofisa o Aoga ma le Ofisa o Paka ma Malaeta’alo ina ia mafai ona fa’atoilaloina lu’itai o lo’o avea ma puniala o lo latou agai i luma, e pei o le leai o ni fale ta’alo mo asosi ‘ese’ese.  Sa ia ta’ua le to’alaiti o asosi o iai a latou lava fale ta’alo e toleni ai, e pei o le asosi soka ma le tenisi.

Sa fia malamalama le afioga i le Senatoa Togiola T.A. Tulafono pe ua mae’a ona tu’ufa’atasia se tauofoga.

Na fa’amalamalama mai e Loa, ua mae’a ona fa’aulufaleina le tauofoga faatasi ma isi atunu’u.  Ua mae’a ona iloiloina e le PGC nei tauofoga ma filifilia mai ai na’o Amerika Samoa ma le atu Kuki.

Sa ta’ua e Loa, o le taimi nei o lo’o vavalalata lava ia Amerika Samoa ma le atu Kuki, ae ua talitonu le afioga i le Lutena Kovana, o ia lea o le a ta’ita’iina le faigamalaga mo Palau i le masina fou, e mafai ona atili malosi le taumafaiga a Amerika Samoa pe a faapea e lagolagoina e le Maota Fono, e ala lea i se i’ugafono aufa’atasi.

Na fesiligia e Togiola pe aisea na fa’aulu ai le tauofoga muamua e aunoa ma se I’ugafono mai i le Maota Fono, e fa’amautu ai le mau a le faigamalo ina ia talimalo.

Sa tali Loa, sa pa’u lea tulaga taua i le komiti.

Na toe fa’aleoina e Togiola sona atugaluga ma ia saunoa tomanatu ai i le tulaga na tula’i mai i le taimi na ulua’i talimalo ai Amerika Samoa i ta’aloga o le Pasefika i le 1997, lea na fa’ailoa atu ai e le PGC i le afioga i le Kovana Tauese P.F. Sunia i lena vaitaimi, e mafai ona toe se’i ese ta’aloga mai i le teritori, pe a le mautu tapenapenaga ma se paketi pasia.

Sa ta’ua e Togiola, na o’o mai le fanoga a le PGC ia Ianuari 1997 a’o loma ta’aloga ia Aukuso 12, 1997.  Ma sa mafai ona fa’amautuina e Tauese ia tulaga uma sa mana’omia, i le va o le ono masina, ina ia mafai ai ona talimalo Amerika Samoa i lena tausaga.

Na ia ta’ua foi le taeao sa tatalaina ai ta’aloga i le Veterans Stadium, ae o lo’o taumafai lava le aufaigaluega e toso le tapoleni i luga e kava ai le fale i le Stadium, ona ua leai se tupe na totoe faatau ai ni apa mo le taualuga o le fale.

Ma na saunoa Togiola, e na te le mana’o e toe tupu mai lea tulaga.

Sa ia fesiligia ai le peresetene o le ASNOC po o iai se paketi faaopoopo mo le latou malaga i Palau.  Na tali mai le tofa ia Tuia’ana, o lo’o iai.  Sa faapea loa ona talosagaina e Togiola se kopi o le latou paketi faaopoopo ma le tauofoga ina ia mafai ona nofo malamalama le Maota Fono, po o le a tonu le mea lea o le a o latou lagolagoina.

Na faapea foi ona ia fesiligia le aofaiga o se vaegatupe mai i le ASNOC e fesoasoani ai i le malo i le taligamalo, pe afai ae faamanuiaina lenei taumafaiga.

Sa tali mai le alii peresetene, e leai se vaegatupe a le ASNOC o fa’aagaga mo lenei faamoemoe ae e $125,000 le tupe maua a le ASNOC i tausaga uma, e faatupe ai a’oa’oga mo asosi ‘ese’ese.

Na saunoa Tuia’ana, afai ae fa’amanuiaina taumafaiga a le malo i le latou tauofoga, e mafai ona talosagaina e le ASNOC ia se fesoasoani tau tupe mai i le IOC (International Olympic Committee) e fesoasoani i le taligamalo i le 2029.

Sa toe fesiligia e Togiola po o ai sa tu’ufa’atasia le uluai tauofoga.  Na tali mai Loa, o le Kovana ma le Lutena Kovana sa amataina ma na saunoa foi Loa, ua agava’a Amerika Samoa e talimalo i ta’aloga faavaomalo faapenei ma o le a faapea ona aoga mo le tamaoaiga a le atunu’u.

Na fa’aleoina e Togiola lona lagolagoina o le va’ai mamao a le kovana ma lona soatau, aua o le a aoga ma penefiti ai le teritori i lenei faamoemoe, i tulaga tau tupe ma e na te u’una’ia fanau talavou o lo’o fiafia i ta’aloga ina ia tausinio mo tulaga sili atu i ta’aloga e latou te auai ai, aemaise ai le maimoa atu o a latou jaiga.

Na saunoa Togiola, atonu o leisi Olimipeka lea o le a soso’o mai, o le toe faaopoopo le fuainumera o tagata ta’a’alo a Amerika Samoa, i le ono pe sili atu foi, ae le o to’a 40 o le aumalaga, o le a totogi uma a latou pasese, e o e lagolago na’o se tagata ta’alo e to’atasi o le a fai ma sui o Amerika Samoa.

Sa ia fa’aalia le mataga i le maimoa a o tatou tagata, le matamata atu i le to’atele o sui ma taitai o ‘au ta’a’alo na malaga i Falani, e lagolagoina le tagata ta’alo e to’atasi.

Ina ua saunoa le afioga i le Peresetene o le Senate, sa ia fautuaina afioga i Senatoa ina ia pasia lenei i’ugafono aua a faamanuiaina, o le a lava le taimi e mafai ona fa’amautu ai vaega uma.

Sa ia fa’ailoa atu foi i le Peresetene o le senate, le tele o fa’asea ua o’o atu ia te ia mai i le mamalu lautele, o fa’asea e faasaga i le ASNOC, e aofia ai le filifiliga o taitai o le komiti.  Saunoa le afioga Tuaolo, na talu lava ona iai o ia i totonu o le Fono, e na te le’i taga’i lava i se ripoti o tupe mai i le ASNOC, e faamanino ai tala o tupe mai i le malo mo polokalama ‘ese’ese tau taaloga.

Sa ia fa’atonuina le Peresetene o le ASNOC ina ia fofoina lea faafitauli.

I le tauaofaiga a le Senate na soso’o ai, sa fa’atu ai e le Taitaifono o le Komiti , le afioga i le Senatoa ia Ponemafua Tapeni, ia se mau ina ia pasia le iugafono, e ala i se palota.

Ae peitai, sa fa’atula’i e Malaepule se mau ina ia sui ai le mau muamua, ona e pei ona sa ia ta’ua, e na te le mana’o e lagolagoina se tulaga e le o lava tapena.  Ma ia fautuaina ai afioga i Senatoa ina ia faatali se’i fa’ao’o atu le tauofoga ma le paketi o tupe fa’aopoopo a le ASNOC, e pei ona faatonuina ai molimau.

Sa fa’aalia e Togiola lona lagolagoina o le mau a Malaepule ae sa ia fautuaina le faia o se palota e pasia le toe tolopoina o le I’ugafono mo le aso Faraile na soso’o ai pe a mae’a ona iloiloina e le Senate ia fa’amaumauga e pei ona fa’atonuina ai molimau.

Ae peitai, sa saunoa Tuaolo, ua manaomia ona pasia le iugafono ina ia mafai ona fa’aulu le tauofoga ma e mafai ona toe faaopoopo nisi suiga e manaomia, i leisi nofoaiga e soso’o ai.

Sa faapea loa ona taloina e Tuaolo ia le palota ma sa to’afitu i latou na lagolagoina le pasiaina o le iugafono, ae to’aono i latou na te’ena – e ui ina sa saunoa Tuaolo, e na’o le to’afa na tete’e.

O i latou sa palota i le leai, na aofia ai afioga i Senatoa ia Tuiasina Salamo Laumoli, Togiola T.A. Tulafono, Malaepule Saite Moliga, Magalei Logovi’i, Ma'o Faʻauma Gogo, ma le afioga i le Senatoa ia Muagututi’a Tauoa.