Iai se faaopoopoga fou I tausimai a le LBJ

Pago Pago - AMERIKA SAMOA

Ua fa’alauiloa mai e le pulega a le maota gasegase autu a le malo i Faga’alu (LBJ-TMC) le faaopoopoina mai o ni tausimai fou se to’avalu mai i Thailand, i le latou aufaigaluega, a’o fa’aauau a latou taumafaiga e faalauteleina le tofa ma le faautaga loloto i totonu o le falemai.

E tusa ai ma le fa’aaliga fa’alauaitele a le LBJ, o nei tausimai e i le va o le 4 ma le 20 tausaga o la latou tautua.

Ma o se faamoemoega a le LBJ, o le tufatufaina lea o nei tausimai i vaega eseese o le falemai e mafai ona tele ai so latou aoga, e pei o le potu tipitipi, vaega faamama toto, talavai a fanau iti, potu fanau faapea le ER.

Na fa’aalia e le taitaifono o le komiti faafoe o faatonusili a le LBJ, le susuga i le fomai ia Malouamaua Tuiolosega, le agaga fiafia e fa’afeiloai atu i nei tausimai talenia mai Thailand, lea ua faaopoopo mai i le aiga tausimai a le LBJ.  Sa saunoa Tuiolosega, o le a aoga o latou agava’a i le tausiga o tagata gasegase a le atunu’u.

O lo o fa’aauau pea ona faamamafaina e le susuga i le taitaifono faapea totino o le komiti faafoe o faatonusili a le LBJ, le taua o le faatumuina o avanoa mo tausimai ina ia atoatoa le tautua a le falemai.  Ma i le aumaia o nei tausimai fou, o se laasaga tele lea agai i le faatinoga o lea faamoemoega aua le tautuaina o le atunu’u.

O lo o ta’ua foi i le fa’aaliga fa’alauaitele a le LBJ, o le faaiuga mo le aumaia o nei fomai mai i Thailand, sa faia ma se manatu ina ia mafai ona faalauteleina vaega o le tautua ma fa’aoaina feutagaiga faaleaganu’u eseese i totonu o le falemai.

Ma e le gata i lo latou tomai faaletausimai, ae faapea foi ona taulimaina e nei tausimai fou ia nisi o auala eseese ma auala fou, mo le tausiga o gasegase i totonu o le falemai.

Sa fa’aalia foi e le Faatonusili o le LBJ, le alii fomai ia Dr. Akapusi Ledua ia le agaga fiafia e faafeiloai i nei tausimai mai nisi o atunu’u i fafo, ma tulaga o le a latou aumaia i totonu o le falemai.  Na ta’ua e Ledua, e le gata ina faamalosia ai le aufaigaluega ae faapea foi ona maua ai se fegalegaleaiga o manatu ma aganu’u mo le faaleleia atili o le tautua i le tausiga o le soifua maloloina o le atunuu.