Gaoi tupe mai lona Tina ma le Fale Faigaluega e fa’atau ai fualaau fa’asaina

O le tama’ita’i talavou lea na ia gaoia tupe mai lona Tina atoa ai ma le Kamupani sa galue ai ae fa’atau ai fualaau fa’asaina, ua fa’asalaina nei o ia e le Fa’amasinoga Maualuga e nofosala i le falepuipui mo le 28 masina.

Na ulua’i tu’uaia e le malo ia Nicole Maxey i moliaga mamafa o le gaoi atoa ai ma le faia o fa’amaumauga tau fa’asese. Ae i lalo o se maliliega sa latou sainia ma le malo, lea fo’i na talia e le fa’amasinoga, na tali ioe ai Maxey i moliaga e 2 o le faia o fa’amaumauga tau fa’asese, ae solofua e le fa’amasinoga isi moliaga sa totoe ai i le pepa o le tagi sa fa’aulu e le malo.

I le tali ioe ai o Maxey i moliaga mamafa e lua e pei ona ta’usala ai o ia e le fa’amasinoga, sa ia tautino ai e fa’apea, i se taimi o le aso 23 Aperila 2017, sa ia gaoia ai tupe mai le kamupani o le CSL Cargo Services sa galue ai, ma le fa’amoemoe e fa’atau ai fualaau fa’asaina mo ia ma ana uo.

Na taua e Maxey lona gaoia o ni siaki se tolu mai le kamupani ae saini fa’amalosi ai le igoa o le pule o le kamupani e aunoa ma se fa’atanaga. O siaki e 3 e aofia ai le $650, $650 ma le $375. Sa ia taua atili e fa’apea, i le aso 16 Me 2017, sa ia sainia ai le isi siaki e tusa ma le $632 mo ia lava e aunoa ma se fa’atanaga a le kamupani.

Na ta’utino atili fo’i le ua molia e fa’apea, sa ia gaoia fo’i tupe mai lona Tina e fa’atau ai fualaau fa’asaina mo ia ma lana uo.

Ina ua maua le avanoa o Maxey mo sana fa’amatalaga fa’ai’u a o le i tuuina mai se fa’aiuga a le fa’amasinoga, sa ia fa’atoese ai i le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia e toe fo’i atu ai i lona aiga e fa’aleleia lona olaga.

Na tautino Maxey i le fa’amasinoga, o le fa’afitauli i lona tagofia atoa ai ma le fa’aaogaina o fualaau fa’asaina, na mafua ai ona unaia o ia e gaoi mai tupe mai lona Tina atoa ai ma le kamupani sa ia galue ai.

Sa ia tautino atili e fa’apea, o tupe uma sa ia gaoia ma maua na fa’aalu e fa’atau ai fualaau faasaina mo ia ma lana uo tama, lea o loo la nonofo fa’atasi i le taimi nei. Ua ia fiu e saili se auala e alu ese mai ai i lea ali’i ae ua le mafai lava. Na te fasi ma fa’apologa o ia peita’i ua le maua lava se avanoa e alu ese mai ai.

Na ia ta’utino atili i le fa’amasinoga e fa’apea, e leai sana alofaga e toe faia mai lana solitulafono, pau lana vaega e fai o le saili lea o se auala e maua ai se fesoasoani mo ia mai le fa’afitauli o le tagofia o fualaau fa’asaina.

Na valaau e lana loia fautua ia David Vargas le tama’ita’i foma’i o le mafaufau ia Dr. Jean Anderson i luga o le nofoa molimau, mo le tuuina atu o sana fa’amatalaga e tusa ai o le la mafutaga ma Maxey i le 4 vaiaso lea sa ia faia ai ni suesuega faapitoa i lona mafaufau.

Na taua e le tama’ita’i foma’i ia Anderson e fa’apea, e fa’a 8 ona ia faia suesuega i le mafaufau o Maxey i totonu o le 4 vaiaso sa la mafuta ai. I le mae’a ai o le suesuega sa ia faia mo Maxey, na fa’amaonia ai le a’afia o ia i fualaau fa’asaina.

Na taua e le tama’ita’i foma’i e fa’apea, na mafua ona gaoi e Maxey tupe mai lona Tina ma le kamupani sa galue ai, ona o se taumafaiga e fa’atau ai fualaau fa’asaina mo ia ma lana uo o loo la mafuta. Na taua atili fo’i e le tama’ita’i foma’i e faapea, o le fa’afitauli o le fa’aaogaina o fualaau fa’asaina o lo o a’afia ai Maxey, ua silia i le 3 tausaga o a’afia ai o ia.

Na fautuaina e le tama’ita’i foma’i le fa’amasinoga, mo se avanoa e fa’ataga ai Maxey ona auai atu i se polokalame fa’a faufautua mo i latou o loo fa’aaogaina fualaau fa’asaina i Hawaii, ina ia mafai ai ona fesoasoani i lona mafaufau.

Sa ia taua atili fo’i e fa’apea, na pau le auala e mafai ona faia ina ia taofia ai Maxey mai lona toe fa’atasi atu i le ali’i o loo la mafuta, atoa ai ma le toe fesoota’i atu i tagata o loo latou fa’aaogaina fualaau fa’asaina, o le taofia lea o ia i le falepuipui, a o tau sailiili ai se polokalame i Hawaii a auina atu i ai o ia mo togafitiga.

O le solitulafono a Maxey e pei ona taua e le tama’ita’i foma’i, ua fa’apopoleina ai lona aiga aemaise lona Tina. Talu mai lava le taimi na gaoia ai e le ua molia tupe mai lona Tina, ua le toe fa’atamala lona Tina i soo se taimi ina ia mautinoa o loo malu puipuia ana meatotino, o lona fale atoa ai ma lana credit card, mai le alu atu o le ua molia ma gaoi.

Na taua e le ali’i loia ia Vargas i le fa’amasinoga le tatau lea ona aloaia le fautuaga a le tama’ita’i foma’i, ina ia taofia Maxey i le falepuipui mo se taimi e fa’atalitali ai se avanoa e mafai ai ona auina atu o ia i Hawaii mo ni togafitiga.

Na lagolagoina e le loia a le malo ia Christy Dunn le fautuaga a le tama’ita’i foma’i atoa ai ma le ali’i loia ia Vargas. Saunoa le loia a le malo e fa’apea, o le tulaga matuia o lenei solitulafono, o le gaoia lea o meatotino a matua aemaise ai le kamupani ina ia fa’atau ai fualaau fa’asaina.

O ni isi o tuutuuga o le nofovaavaaia a Maxey ua tuuina mai e le fa’amasinoga, o lona tuliina lea o masina e 28 i le toese i Tafuna. Ae afai ae vave maua se polokalame e auina atu ai o ia i Hawaii mo togafitiga, ona tatalaina loa lea o ia i tua ae malaga atu i lea polokalame.

Ua poloaina fo’i o ia ina ia aua ne’i ona toe tagofia fualaau fa’asaina, pe toe mafuta atu i tagata o loo tagofia fualaau fa’asaina e aofia ai ma lana  uo tama.