Galuega o faleta’alo 4 a’oga elementary & VOCTECH High

I le fa’atasiga e tatala aloa’ia faitoto’a o le faleta’alo tele o Tafuna Elementary poo le Laumua o le Blue Angels, sa suaina ai ma le eleele mo le amatalia o galuega o faleta’alo o a’oga Elementary e fa, lea e aofia ai le Gov. Uifa’atali Peter Coleman i Pago Pago, le A’oga Tulaga Muamua a le Manulele Tausala i Nuuuli, ma le A’oga Tulaga Muamua a le Lupelele i Iliili, ae maise o le A’oga Tulaga Muamua a Leone Midkiff.

Peitai e fa’aopoopo atu i ai o le galueaina lea o le Faleta’alo o le A’oga Maualuga Matata Eeseese i Nuuuli, le Voch-Tech ma o le a’oga maualuga mulimuli fo’i lea a le Malo sa tatalia lava fa’afatualavai le taimi e fa’atu ai se latou faleta’alo.

Na auai Pule A’oga uma mai nei a’oga ina ia latou suaina le eleele fa’atasi ma sui iloga o latou PTA, o ali’i ma tamaita’i Faipule nei o latou afio’aga, ina ia latou molimauina se amataga o se galuega lelei mo le fanau ma le latou lumana’i e ala i ta’aloga.

I le saunoaga fa’apitoa a le Kovana sa ia faailoa ai, lona naunauta’iga ia lelei nofoaga e ta’a’alo fiafia ai fanau a’oga, ae maise oni nofoaga tetele fa’apea e mafai ona faia ai latou fa’atasia o fa’auuga ma fa’atasiga i taeao a’o le’i amatalia a’oga i aso poo vaiaso ta’itasi.

“O le tutula’i o ni fale tetele faapea i lotoa ta’itasi, o le mautinoa lea ua mafai ona fa’atasia fanau ae o malutia mai le la ma timuga pe a oo i aso louloua. E momomo lava le loto pe a va’ai atu i fanau o saofafa’i i ma’ama’a ma le mutia ma sisiva mai i luga o le sousou o le palapala pe a oo ina timuga, ae ua le tu’ua ai le fa’amoemoe ma le agaga me’eme’e o i latou e fa’atino latou polokalama eseese e fai soo.”

“Fa’afetai lea i le vasega fanau aoga sa uia mai lea ituaiga o olaga a’o aooga mai, peita’i o i latou o le a soifua a’e ua lelei nei nofoaga, e latou te le iloa lea ituaiga o mea na savalia mai i le gasu o le tai taeao a’o taumafai le Malo e faia se suiga lelei fa’apenei.”

Peita’i i se tasi o sui sa auai, o le PTA mai Nuuuli sa ia fa’ailoa lona taofi ina ua fesiligia, “Ua aeae nei manu ua ulu, ua afea fo’i le taofi o le fa’auluuluga o le malo ma le matagaluega ia va’ai ane ia Nuuuli, o le aoga foi lenei a le Manulele Junior High lea ua fa’amatu’u mai ia Tafuna, ae toe fausia ma le latou faleta’alo. Peitai o lo’o tele fo’i fanau a Nuuuli o loo aoaoina ai. E ui la ina o lea fa’ato’a sua le eleele mo le galuega a le Manulele Tausala, ae fa’atausala lava lagona o le Laumua, fa’afetai tele i le faleta’alo e toe tolu masina ona va’aia loa lea ua fa’aaogaina i le tausaga a’oga fou.”

O le aoga a Lupelele ua mautu mai ua malo le Kamupani a le Happy Trucking i le latou tauofoga mo lea galuega i le latou ofo e $550,000 ae tolu masina le umi e fausia ai lea faleta’alo. A’o le faleta’alo o le Aoga Maualuga a le Nuuuli Voctech High lea ua mae’a fa’atulaga ma ua amatalia fo’i le galuega ua fa’atino e le Nana’s Construction Company.

Ua faailoa e le Kovana sili, “Pule A’oga e ao ina i ai suiga e mafai ona talosagaina pe a magafagafa oe le Pule A’oga va’ai i mea e fa’aleleia atili ai le tou faleta’alo ma e talosagaina mai, ona fa’atonutonu atu lea o ni suiga, e pei ona i ai lenei faleta’alo, “Ms Lauleva Polu Gymnasium” ua mae’a nei.