Fuafuaina le faia o se suiga i pepa taumafa (Food stamp)

Pago Pago - AMERIKA SAMOA

Sa faaleoina i le molimau a le Faatonusili o le Ofisa o le DHSS, le susuga ia Muavaefaatasi John Suisala, i luma o le komiti o Tautua faalesoifua maloloina ma tagata, a le Senate i le aso Lua na se’i mavae atu, Ianuari 6, 2024, e faapea, o lo o iai se fuafuaga a lo latou ofisa e taofi le toe tufatufaina o pepa taumafa (stamp) lea e masani ona fai i masina taitasi, ae o le a tu’usa’o atu i totonu o ni pepa e ta’ua faaperetania, o Electronic Benefit transfer (EBT).

Ma o le a avea lea suiga fou ma tulaga o le a le toe tau malaga mai ai le mamalu o le atunu’u o lo o tali a latou ‘food stamps’, i le ofisa i Utulei.

Na mafua ona loteina lenei mataupu, ona o se faagaualofa a le afioga i le Senatoa Uti Petelo Uti lea sa ia faaleoina ai lona va’ai ma le alofa i tina ma tama matutua o le atunu’u, faapea i latou o iai mana’oga faapitoa tumau o le tino, lea e tau o mai lava i le ofisa i Utulei i masina ta’itasi, e piki a latou ‘food stamps’.

Sa faamatalaina e le afioga Uti se tasi o aso, sa ia molimauina ai se tasi ua po le va’ai, o tau ta’ita’i mai i le ofisa o le ‘food stamp’ i Utulei, ae atoa le afa itula, po o le itula foi, o faataitali se’i valaau mai o latou igoa..

Sa talosagaina e le afioga i le Senatoa ia le Faatonusili a le DHSS, pe mafai ona fai ni pepa (cards) pei o ‘cards’ ia e fa’aaoga i ATMs a faletupe, e mafai ai ona tu’u iai i totonu ‘food stamps’ a tagata, e latou te o sa’o ai lava i faleoloa, ma le tau aga’i mai o le mamalu o le atunu’u i Utulei, aemaise lava nai tama ma tina matutua o lo o malaga mai i luga o pasi mai nu’u mamao. 

Sa faaleoina e le susuga i le Faatonusili ia Muavaefaatasi lona agaga alofa mo i latou o lo o feagai ma nei faigata, e pei ona sa saunoa ai Senatoa Uti, ae sa ia toe faamanatu mai e Muavaefa’atasi, o lo o iai le avanoa e filifili ai e tama ma tina matutua, faapea i latou o iai manaoga faapitoa o le tino, se tasi e mafai ona avea ma o latou sui, e malaga mai e piki a latou ‘food stamps’.

Ae o nisi o tama ma tina matutua, e manana’o lava e o mai latou e piki a latou ‘food stamps’ on aua le faatuatuaina fanau po o aiga, e fai mo latou sui.

Sa fa’ailoa mai e Muavaefaatasi, i totonu o le paketi a le ‘Food Stamp’, ua iai se vaegatupe ua ta’ua o le ‘ASNAP EBT ARPA’ e $3,880,000 lona aofaiga, sa maua mai i le tausaga e 2021 ma ua ia talosagaina le Ofisa o Faatoaga a Amerika (USDA) mo le fa’aaogaina o lea tupe e fa’atulaga ai le fa’aaogaina o ‘EBT Cards’ ina ia faafaigofie ai ona maua e tagata o le atunu’u a latou penefiti i masina taitasi, e aunoa ma le toe tau o mai i lo latou ofisa i Utulei.

Na ta’ua e Muavaefaatasi, o nei ‘EBT Cards’, na amata ona fa’aaogaina e le polokalama a le WIC talu mai le 2017.  

Sa fa’aalia foi e Muavaefaatasi le fa’aaogaina o se vaega o le $3.8 miliona e saili ai se kamupani e mafai ona galue faakonakarate e mataituina lenei polokalama mo le vaega a le ‘Food Stamp’ ma e lua ni kamupani Amerika ua lava lo latou tomai i le faatulagaina o le EBT.

Ua mae’a ona filifilia lea kamupani ma o lo o faatalitali nei ina ia pasia mai e le USDA ma ua talosagaina le faatulagaina o lenei suiga fou, ae e le’i o’o atu i le faaiuga o le tausaga.

Na fesiligia e le afioga Senatoa Uti ia le mafuaaga o lo o faamalosia ai le fa’aaogaina o le 20 pasene o ‘food stamps’ e faatau ai taumafa lotoifale, ae o le toatele o faifaatoaga a le atunu’u, e latou te le taliaina ‘food stamps’, ona fai mai a latou, e leai se latou taimi e ave ai ‘food stamps’ i le ofisa i Utulei, e maua mai ai a latou tupe.  Sa fia malamalama le afioga i le Senatoa, pe o se tulafono lea a le USDA.

Sa faamanino e Muavaefaatasi, na talu lava ona faavae le polokalama a le ‘Food Stamp’ i le 1994, sa fa’aalia ai e le afioga Kovana Lutali, lea na kovana i lena vaitaimi ma o ia foi o se totino o le Asosi a Faifaatoaga, o se avanoa lelei lenei e atia’e ma fesoasoani ai i faifaatoaga a le atunu’u.

O lea na patino ai le 30% o ‘food stamps’ mo taumafa lotoifale.

Ae peitai, ona o le tulai mai o le faafitauli e pei ona sa faaleoina e le afioga i le Senatoa, o lea na toe tu’u ai i lalo i le 20%. 

Na faamanino mai e Muavaefaatasi, e le faapea e na’o taumafa mai faatoaga, e aofia i lea 20%.  E mafai ona faatauina ai foi ma oloa mai fale gaosi apa tuna, o falaoa, o I’a faapea ma taumafa e gaosi i kamupani tao falaoa.