Fuafua le toe fa’afo’iina mai o Steven Tuato’o i Amerika Samoa

Ua fa’amaonia mai e se sui so’oupu o le Ofisa o le Loia Sili i se aai o Uosigitone, le sauni lea o le Faamasinoga i le aai o King County Court e toe fa’afo’i mai le ali’i lea na sola ese atu ma Amerika Samoa talu mai le masina o Novema o le tausaga na te’a nei.

O le susuga a Steven Tuato’o, lea sa avea muamua ma Leoleo a le malo, na sola fa’atopetope ese atu ma Amerika Samoa i le mae’a ai lea ona faila e le malo o se tagi e fa’asaga ia te ia, e mafua mai i le fa’alavelave lea na osofa’ia ai e Leoleo lona fale i Alofau ma maua ai ni isi o fualaau fa’asaina.

Na taua e le sui sooupu o le Ofisa o le Loia Sili mai le aai o King County i le Samoa News e fa’apea, o le masina na te’a nei na tauaao ai e le itu a le malo se kopi o le tusi saisai mai Amerika Samoa nei, lea na sainia e le afioga i le ali’i Kovana ia  Lolo Matalasi Moliga, e talosagaina ai le toe fa’afo’i mai o Tuato’o e tali i ona moliaga i Amerika Samoa nei.

O le kopi o lea tusi saisai na tuuina atu lea ia Tuatoo, ina ua tula’i o ia i luma o le fa’amasinoga i le aso 13 Iuni mo le isi ana iloiloga.

I le tau aaoina ai o le kopi o le tusi saisai mo Tuatoo, na fa’aleaoga ai loa e le malo le latou tagi fa’asaga ia Tuatoo, i lona sola ese mai lea ma Amerika Samoa, se’i vagana ai le tagi e fa’asaga i lona le usitaia o se poloaiga a le fa’amasinoga, e mafua mai i le fa’alavelave lea na ia faaoolima ai i lona to’alua, o lo o fa’aauau pea lea tagi i le taimi nei.

E le o iloa tonu le taimi ua fuafua le itu a le malo e toe fa’afo’i mai ai Tuato’o i Amerika Samoa.

Na ulua’i molia Tuatoo i le moliaga mamafa o lona le usitaia lea o se poloaiga a le fa’amasinoga, e mafua mai i le fa’alavelave lea na ia faaoolima ai i lona to’alua i le aso 12 Aperila, 2018, ae i lalo o se maliliega na latou sainia ma le malo, na ia tali ioe ai loa i le moliaga mama o lona le usitaia lea o se poloaiga a le fa’amasinoga.

O le aso Faraile o le vaiaso nei, Iulai 6 lea ua fa’atulaga e lau ai le fa’asalaga a Tuato’o.

Ae pei ona taua i fa’amaumauga a le fa’amasinoga i King County, na ulua’i taofia e Leoleo ia Tuato’o i le aso 21 Mati 2018, ina ua ia faaoolima i lona to’alua, ma molia ai o ia i lona faia o sauaga i lona to’alua.

O le fa’aiuga o lea mataupu, na tuuina mai ai loa le poloaiga a le fa’amasinoga e fa’asa ai ona ia toe faafesoota’iina lona to’alua, faasa fo’i ona ia toe faia i ai ni sauaga mo le umi e 10 tausaga. O le poloaiga na tuuina mai i le aso 21  Mati 2018, ma le faamoemoe fa’atoa mae’a i le aso 21 Mati 2028.

E na o le 3 vaiaso talu ona mae’a le tuuina mai o le poloaiga a le fa’amasinoga, ae toe loka e Leoleo ia Tuatoo ina ua ia toe fa’aoolima fo’i i lona to’alua i le aso 21 Aperila 2018, ma molia ai loa o ia i le moliaga mamafa o lona le usitaia lea o le poloaiga a le fa’amasinoga.

O le toe taofia ai o Tuatoo e Leoleo, na fa’atulaga ai loa e le fa’amasinoga le $185,000 e totogi ona fa’atoa mafai lea ona tatala o ia i tua.

O le aso 13 Iuni na te’a nei na malie ai Tuatoo e sui lana tali ioe, mai le moliaga mamafa i le moliaga mama o lona le usitaia lea o le poloaiga a le fa’amasinoga. O le aso 6 Iulai lea ua fa’atulaga e lau ai lana fa’asalaga.

O Tuatoo, o ia lea e to’atolu i ai ali’i na pu’e faapagota e Leoleo ina ua latou osofaia ni fale se lua i Taputimu ma Alofau.

O le osofaiga i Taputimu na pu’e faapagota mai ai Cody Wood. O le osofaiga i Alofau na pu’e faapagota mai ai Tuatoo, ma le isi ali’i na pu’e faapagota ina ua taofi e Leoleo lana taxi i luga o le auala.

O ia gaioiga a Leoleo, na afua mai lea i se poloaiga mai le fa’amasinoga e sailia ai fale ma meatotino a i latou uma nei e to’atolu. I lea osofaiga, na maua ai e Leoleo se vaega tele o fualaau faasaina o le aisa ma le mariuana, o se vaega tupe e tusa ma le $54,003, atoa ai ma le tele o mea e fa’aaoga e i latou e tuleiina fualaau faasaina.

Na taofia uma i latou nei e to’atolu i le falepuipui mo le ta’i 48 itula, e fa’atali ai le taimi e mae’a ai ona fa’agasolo pepa molia faasaga ia tei latou, peita’i ane, na toe tatala Tuatoo i tua ina ua mae’a le 48 itula na loka ai, ae lei mae’a lava ona saini moliaga fa’asaga ia te ia, ma mafua ia loa ona ia tuua le atunu’u.