Fono Aumua Amata ma vetereni i Amerika Samoa

O le afiafi o le aso Lulu na te'a nei, sa fono ai vetereni ma le faipule o Amerika Samoa i le Konekeresi, Aumua Amata, ina ia fa'amalamalama nisi o mataupu aoga mo i latou, ua mae'a afuafua mo lenei tausaga, atoa ai ma mataupu fo'i ua mae'a ona fa'atulaga i le tausaga ua mavae, ma nisi o fa'afitauli o lo'o feagai pea ma vetereni i Amerika Samoa.

Sa mua'i fa'ailoa e Aumua le tele o alofaaga o le fanau sa tiute i le tafa o taua i Afakanisitana, Iraki, Pakisitana lea sa latou asia i le vaitau fiafia o le Kerisimasi. E to'a 70 le aotelega o fanau a Samoa sa feiloa'i i ai o ia ma ua molita'i mai o latou alofaga i o latou matua ma aiga pe a ou toe taliu mai i o tatou laufanua saogalemu.

"I le taunu'u atu, e ese lava le nofoaga o lo'o fa'apotopoto i ai tatou fanau, o lo'o faia le latou BBQ sasala lava, ma ua faia fo'i le latou Volleyball, a'o totonu o le maota o lo'o fa'atautaia ai mea'ai mo le aotelega o fitafita a Amerika. Ua foliga mai ua o'o atu o latou tina ia i latou i lea nofoaga, ina ua va'aia lo'u tino, o la'ei fo'i le Puletasi Samoa, e vave lava na latou iloa mai a'u, ma vala'au leo tele mai lo'u igoa! O se lagona ese lea ia te a'u, e pei o se meaalofa sili lea ua latou maua i lenei tausaga, fa'afetai mo le latou tautua, fa'afetai mo le avanoa sa ou maua i le va'alele na fa'atulaga mo lea asiasiga e nisi o sui faipule o le Konekeresi. O lo'o momoli mai o latou alofa'aga i o latou matua uma lava. O lo'o manuia lava i latou ma le galuega o lo'o latou fa'atinoa i na atunu'u toafa ma le oneonea."

Sa ia saunoa e tusa ai o le taofiga o galuega a le Malo tele i le taimi nei, ma ia fa'ailoa ai, "O le fete'ena'iga i taofi i le va o le Peresetene Trump ma le vaega a le Konekeresi lea o lo'o malosi ai le finau ma fa'aiuga e faia e le Temokalasi, lea ua afua ai, ona o lo'o eseese taofi e tusa o le Pa e si'omia ai le tuaoi i saute o Amerika, i lona va ma Mexico.”

Sa ia fa'ailoa lana fainauga i lea mataupu e le o le pa lea i lena tuaoi, a'o o le malosi o tulafono tau le siomaga o le atunu'u i ona setete ma ona teritori e ao lava ina fa'amalosia ma mataituina i taimi uma."

"Ua tutusa lelei lava le tuaoi lea ma le toaoi fo'i o i tatou ma le tatou usoga ia Samoa Tuto'atasi. Peita'i e le o solituina lava e Samoa Tuto'atasi po'o i tatou fo'i lea feagaiga tau tuaoi, a'o i tatou o tagata Samoa uma lava. Ona o lea tuaoi o lo'o alia'i ai le tele na'ua o fa'afitauli tau tagata ua osopa atu e aunoa ma se fa'atulafonoina, na mua'i pasia uma lava e ao ina fausia se pa, peita'i e le o mailoa le toe suiga o le manatu fa'atu o sui temokalasi o le Konekeresi, ia le pasia le fausia o le pa o lo'o mana'omia e le Peresetene ona fa'atuina. Tatalo ia lata mai se aso e soalaupule fa'atasi ai se maliliega mo lea mataupu, ina ia mafai ona fa'atupe ma totogia tagata faigaluega o matagaluega o lo'o tapunia ona o lea taofiga."

I le toe vaega o lana folasaga, sa ia fa'ailoa ai, "E le o i ai ma se taofiga o polokalama tau mea taumafa o lo'o tufaina mo tagata lautele ona o lenei taofiga le tumau o galuega a latou matagaluega. Ua fa'atupe mai le Food Stamp ma isi polokalama uma mo fanau se'ia o'o ia Fepuari 2019. O lo'o ua mae'a ona fa'atulaga totogi o Vetereni ma latou penefiti e le afaina i lenei taofiga le tumau a le malo tele, ma ua o'o ia Oketopa 2019 lona fa'atupega. Ua le a'afia fo'i totogi o fitafita tiute uma i so'o se vaipanoa o le lalolagi ma le Malo tele i lenei taofiga le tumau o galuega."

Sa fa'ailoa fo'i e Aumua, "O la outou tatalo i le Atua e mafai ona suia manatu, e ono fa'apu'upu'uina ai aso o lenei taofiga. Ia mafai ona fetu'una'i muniao, i loto ma finagalo o sui uma o le Konekeresi, po'o le Peresetene fo'i i lana pitola'au, ona fa'ato'a mafai lea ona fa'agasolo ma le toto'a galuega uma mo le tatou malo tele. Manatua, pe itiiti pe tele le a'afiaga o le matagaluega o le Malo tele i fafo, e o'o mai lava lona tiga i o tatou malo laiti e pei o tatou o teritori o Amerika."

Sa fa'ailoa e ia nisi o mataupu ua amata ona fa'atino mai le fa'aiuga o le tausaga ua mavae, o le tulaga lea o le toe feoa'i mai o Mac Flights i le va o i tatou ma Honolulu, e mafai ai fo'i ona sui atu i ai avanoa o fitafita tuai e malaga mo latou talavai.

"O lo ua talosagaina e tatau lava ona i ai se malaga a Mac Flights i le va lenei o i tatou ma Honolulu e fa'atasi i le masina. Ma ua matua ou unaia lea mataupu ina ia matua fa'amautuina lava lea tautua, ua tamau fo'i ina ia fa'aauau aua ne'i toe motusia,” o se talanoa lea a Aumua i Vetereni.

Ina ua mae'a lana folasaga mo fitafita tuai sa fa'atumulia ai le potu fono o le VA Office i Tafuna, ona faliu loa lea ina ia fa'afofogaina nisi o mana'oga tupito o le a folasia mai e Vetereni ia te ia, e mana'omia ai sana fesoasoani.