Folasaga a sui tauva i le Fonotele a le Asosi a Loia

Pago Pago - AMERIKA SAMOA

LEMANU: “Pe soli e maua le tulafono ae maua ai se lelei o le atunuu, o la ma sao lena”

O le vaiaso ua mavae na faia ai se Fonotele a le Asosi a Loia o le teritori a Amerika Samoa, mo sui tauva uma o lo’o tausinio mo le tofi Kovana ma Lutena Kovana, i le palota lautele ia Novema 5, 2024.

Sa maua ai le avanoa a sui tauva taitoatasi, e faaleoina lagona, manatu ma fuafuaga faataatia e tusa ai ma nisi o mataupu taua.

I le tele o fesili ma tali, o le tulaga na faate’ia ai le toatele o i latou na aofia potopoto, o le taimi o le folasaga a le afioga i le Kovana Lemanu P.S. Lemanu, e uiga i le $36 miliona lea sa faaaoga e lana Faigamalo, e aunoa ma le faatagana a le Maota Fono.

O le $36 miliona lea sa saunoa ai Lemanu, o le mataupu lea o lo’o suesueina e le SSIC, lea ua tofia ai se Loia Tutoatasi, e na te iloiloina.

E silia ma le 200 fesili na aoina e le ASBA mai i le mamalu lautele, e pei ona sa faalauiloa mai e le Tausitupe a le asosi ia Lornalei Meredith Fanene, lea na avea ma Fofoga o le afiafi.  Ae na filifilia e le ASBA na’o fesili e 87 mo le latou polokalama.

Ma o nei fesili, sa fesiligia ai sui tauva, i mataupu eseese, e aofia ai le filifiliga o Faatonusili, o fuafuaga mo le fofoina o le faafitauli i Fualaau Faasaina, faaleleia o le gaosiga o taumafa, fuafuaga mo le siitia o tulaga mo fanau aoga K5-K12, o le agai i lalo o le fuainumera o tagata o le atunuu, suiga i tulaga o le tau, faaleleia o femalagaiga I Manu’a, auaunaga tau i le Soifua Maloloina, fofoina o faafitauli i le suavai faapea ai ma le tulaga faapolokiki a le teritori.

O sui tauva na mafai ona auai i lenei fuafuaga, na aofia ai le laga a Lemanu P.S. Mauga ma Laapui Talauega E. Ale, o le paga a Vaitautolu Talia Faafetai ma Maefau Dr. Mary Taufetee faapea ma Pulaalii Nikolao Pula, se’i vagana ai le agioga Pulu Ae Ae Jr, lea sa i atunuu i fafo.

Pe a ma le 300 i latou na auai atu i lenei fuafuaga.

I le faasologa o saunoaga faai’u sa faapea ona muamua ia sui tauva ia Vaitautolu ma Taufetee, ona sosoo ai lea le vaega a Pula ma Pulu ae mulimuli i Lemanu ma Laapui.

I saunoaga faai’u a Vaitautolu ma Taufetee, faapea le afioga Pula, na o latou faaleoina ai lo latou agaga faafetai i Aiga ma i latou uma o lo’o lagolagoina la latou taumafaiga.

Ae peitai, o le saunoaga mulimuli a le afioga a le Kovana, mo le itu a Lemanu ma Laapui, sa faapea ona faate’ia ai le toatele ona sa le’i saunoa patino se tasi o i latou i lea mataupu.

I le saunoaga a Lemanu, sa ia ta’ua ai e faapea, “pe soli e ma’ua le tulafono, pe ua aitalafu I ma’ua i tulaga o le seleni, ae a maua ai se manuia o le atunuu, o le ma ofo lena.”

 Na saunoa foi Lemanu, “Ua tu’u mai atoa lo ma loto ma lo ma agaga e tautua le atunuu.  Pe loka a’u i le falepuipui, e pei ona ou iloa na tou te mafaufau I le $36 lea e pisa so’o ai tatou.”

Sa ia ta’ua le le natia o lea mataupu, aua o lea foi na tau aliali a’e I faasoa I lea aso.

Ma sa ia saunoa, “A loka a’u ona o le faaaogaina o le $3 miliona, ae e le’i faia tulaga o le tulafono, se na manuia ai le atunuu, o la ma tautua lena i le atunuu.”