FOLASAGA DOH TOBACCO/DIABETES COALITION

 - LE AU FAI FALE'AIGA

I le taeao o le aso Lulu na fa'apotopoto ai e le Koalisi a le DOH Tobacco/Diabetes ma nisi o le Au Faipisinisi o fale'aiga i le atunu'u, ina ia feso'ota'i ma ia fetufa'i i ala e mafai ai ona fa'aleleia atili mea tausami paleni o loo tautuaina ai le atunu'u.

O le fetufa'iga lea, na folasia lagona o le tama'ita'i Sapi Galea'i, le sui o lo'o nafa ma le Mataituina o Mea Tausami Paleni a le Fanau A'oga i le Polokalama o le Mea'ai a Fanau A'oga. O ia lea sa fa'atulaga e saunia le folasaga e fa'ailoa ia i latou, e ao ina tu'uina atu ma le atoatoa le auaunaga, ia le mama'i le atunu'u ona o mea tausami ua latou tautuaina ai i latou.

"Ona o lenei mataupu e ta'ua o Mea Tausami, e aotelega fa'atasi ai mea taumafa ma le suavai suamalie, e ao lava ina silafia e le atunu'u, o mea tausami ua tatou fa'aaogaina, ua mafua ai ona maua i tatou i le anoanoa'i o gasegase, ma o gasegase fo'i e le faigofie ona togafitia,” o se tasi lea o ana fa'amatalaga.

"Peita'i, afai e tapena e le mamalu o fale'aiga tausami paleni, ua fa'apea fo'i ona maua e tagata uma tausami ua alagatatau ona tausia lelei ai o latou tino. Ae o le ala fo'i e mafua ai ona taumafai le au fale'aiga e saunia taumafa fa'apitoa, ona o taumafa ia e masani ona sili ona alumia, ae o taumafa fo'i na e ala ai ona fa'agasegasea le mamalu o le atunu'u, ona ua tele taimi ua taumamafa ai i na mea'ai."

Sa ia fa'ailoa patino mai nei tausami, "O mea'ai lolo, o'ona toe fiafia tele i ai tagata e aofia ai le povimasina, le pisupo, le mamoe tao, le siusiupipi tao i le soya, o mea ia e le mafai ona aluloa ai le tupulaga talavou, ae le tago atu e aumai i luga o lana ipu. Ua fa'apena fo'i le mamalu o matua ua mae'a maua i gasegase o le gugu ma le suka ae maise o le toto maualuga."

"I fa'amaumauga ua mafai ona taulimaina mo le mamalu sa auai i lea fonotaga fa'apitoa e talanoaina ai le ituaiga tausami paleni e mana'omia mo le tausiga o le soifua maloloina, na iloga ai, e le o fa'aitiitia le fa'ateleina o le mamafa o pauna o tagata ae maise mai le vasega o talavou se'ia pa'ia le avea ma tagata matutua ua avea ma matua i totonu o aiga. Ua si'isi'i pea i luga i tausaga ta'itasi le faitau aofai o i latou e maua i le ma'i suka, ua le aga'i i lalo lea fua, ae fa'asolo lava i luga. O le aotelega fo'i o tagata uma maua i le fa'amama toto, e le o fa'aitiitia i tausaga ae ua soloa'i i luga. O le ma'i fatu fo'i ua numera tasi ai le tatou tama'i atunu'u, ae ua fesiligia pea le afuaga, o le tali lava o le tausami,” o se tala lea a Galea'i.

"I le polokalama o le Mea Taumafa a le Fanau A'oga, ua fa'aofi atu i ai ma le fa'i ma le talo, fa'apea ma le tele o fuala'au 'aina mata, o le esi, fa'ipula ma le fala. Peita'i o le to'atele o le fanau, ua matauina e le tausamia le esi, po'o le moli e avatu ai po'o le meleni fo'i i le vaitau na aumaia ai le Meleni i le ipu. O le a le mea a fai ina ia mafai ai ona tausami lelei fanau i mea'ai paleni, ae le o le fiafia e 'ai le araisa, ae tausami sana fa'i?"

Ina ua fetufa'i manatu, sa maua le aotelega o le manatu, e le o fale'aiga le mafuaga o le mamafa tele o pauna o le tagata, pe ua fa'ateleina ai le mamafa o tagata lautele. Ua fa'aalia le manatu o nisi o sui sa auai, "Afai o oe ua fetaia'i nei ma le fa'afitauli ua amata ona e iloa ua e gasegase i le ma'i suka, aua ua le lava le fa'amalositino ae ua matele ina na'o le tausami i mea'ai lololo ma ua mafua ai lou gasegase i le Ma'i Suka, o oe lava e toe faia le suiga, a le fia faia se suiga, o oe fo'i e toe fetaia'i ma ma'i tigaina i lou soifuaga."

O le manatu fo'i o le sui mai le au fa'asalalau, o se tasi o totino o le Koalisi a le DOH Tobacco Diabetes sa ia fa'ailoa atu ai, "Seiloga lava ua manatu le tagata e fia faia se suiga, ua va'ai atu i le fa'ata, o ia ua lapo'a ma ua amata ona maua i gasegase faigata, o ia fo'i e faia le suiga e toe fa'aleleia ai le mea ua i ai lona tino ma lona soifua maloloina. A mana'o loa i ai le tagata, e fa'asaga ane loa saili le togafitiga e ao ina mafuli e fai."

"Se'i vagana lava ua mana'o le tagata i le suiga va'aia i lona tino, ona fa'ato'a mafuli lea e fa'atino lea suiga, ae a fa'atamala ai fo'i i lana taumafaiga lea, e le a'e manumalo lava lona fanoga sa mua'i manatu i ai, ia maua."

O nei faiga uma, ua le lafo ai le pua i le itu e tasi o e o lo'o nafa ma le tapenaga o mea'ai mo le fofoga taumafa o le atunu'u, i le vasega lea o le au faipisinisi fale'aiga. Pe ua lafo atu fo'i le fa'asea ma le afuaga o le fa'afitauli i le Polokalama o Mea'ai a le Fanau A'oga, aua ua matua'i va'aia toto'a lava le soifua maloloina o le tupulaga talavou i le lisi o mea taumafa e tautuina i le fanau a'oga i le taeao ma le aoauli.

Ua kuka fo'i ina ia le ga'oa taumafa uma ua laulauina. Ua fa'aaoga fo'i le araisa ua i ai ma le porotini, ua avatu fo'i ma le mea'ai suamalie o fua o la'au 'aina mata. O lona uiga, ua faia lava le fa'amamafa ma le fa'ataua e lea polokalama ina ia mataituina le paleni o le mea'ai mo le fanau a'oga mai le talavou.

"I le tatou malo, ua iloga ua tele polokalama o lo ua tautuaina le aiga i ona itu tau le taumafa ia lelei ona tausasami le atunu'u. Ua fesoasoani polokalama uma ina ia le soifua falolo le lotoifale o aiga lima vaivai ae ia tagolima ia lelei tausami e laulauina mo i latou e ala i le polokalama a le WIC. So'o se tina ma'itaga se'ia o'o i fanauiti e o'o i le 7 tausaga e tausasami lava i lea polokalama, ia le soifua fa'agasegasea ona ua le lava mea'ai ua laulauina i le lotoifale o lona aiga. Fa'afetai mo le tautua a le malo,” o se tasi lea o saunoaga.

Soso'o lea ma le taga'i toto'a i e mama'i tumau, ina ia lelei latou tausami ae maise pe afai e le lava fo'i le tamaoaiga mo le fagaina o i latou faalemasina. Ua i ai le polokalama o le Food Stamp.

“Ina ia fa'aitiitia le tino mamafa tele o tagata, e ao ina fesoasoani i ai tatou sui faufautua mo le tausia lelei o tino i mea'ai paleni, ina ia fa'ailoa ia i latou, ia fa'aitiitia le tele o le aiga e tausami i le 'aiga e tasi. Taofi fo'i ma le 'ai'ai so'o, ae fa'atulaga lelei taimi e tolu o le aso e ao ina tausami ai.”

"Ua tatou faia le tele o fa'asalalauga ina ia utagia e le mamalu lautele o le atunu'u fautuaga ina ia tausami i mea'ai paleni i aso ta'itasi, ae le o fa'aitiitia ai le faitau aofai o i latou e maua i le ma'i suka ma le tele o isi gasegase e le o maua ni togafitiga e soloia ai. Ua atili lava ona fa'ateleina.”

“O lona uiga, ua tatau ona suia le ala o le fa'alauilaoga o lenei fa'atofala'iga, ia fa'ailoa atu, ‘Va'ai i le Fa'ata’, fa'alogo i lou tino po'o e masalo pe ua amata ona e gasegase.”

“Ae afai ua e mana'o i le suiga lelei mo oe, amata vave ona e taumafai e suia lau 'aiga masani i le 'aiga paleni, o mea'ai ua fa'amauina e maua ai le soifua maloloina, fa'aitiiti le a'ano o manu e tausamia, ae fa'atele ia inu le suavai auli ma fa'aafu i le tele o taimi, e fa'amu ai le ga'o mai mea'ai."

Ua taua'aoina e Sapi Galea'i le tele o fa'amaumauga mai le tatou Malo, ua matua fa'amaonia ai le fa'atuputeleina o le aotelega o i latou ua maua i le ma'i suka i le 9 tausaga ua tuana'i i Amerika Samoa. Ua ia umia fo'i ma tufaina mai le lisi o mea'ai paleni ma le faapalenia fo'i o lau 'aiga e tasi, i mea'ai ma le tele e tatau ona e tausamia i lea aso ma lea aso.