Foa'i tusi polokalama faitau tusi aiga Aoelua - Cynthia Moliga

Ua tu’ufa’atasia se galuega e le Faletua o le Kovana Sili, Cynthia Malala Moliga, ua ia foaia ai le tele o le tusi faitau, e aoga mo le fanau iti se’ia o’o i fanau talavou o le atunuu, ia lelei le faitau ma ia fiafia fo’i e faitau tusi, e faalautele ai lo latou silafia e fa’amatala o latou lagona ma manatu i le gagana peretania ma tusitusi fo’i i lea lava gagana.

O lea foa’i taua o le anoanoa’i o tusi faitau, ua fa’ailoa mai e Dr. Aoelua, o le Aoelua Family Reading Program ma le INSPIRE Community Cancer Coalition Program, “O se foai ua talafeagai ma le matou avega o le polokalama faitau tusi i le Manu’atele. Ua maua taimi lelei e galulue fa’atasi ai ma le fanau a’oga i le A’oga Maualuga i le Manu’atele e fefa’asoa’i ai i fa’amaumauga uma tau le INSPIRE po’o suesuega taua mo togafitiga o le Kanesa ma sailiga fo’i po’o le a le ituaiga o kanesa o maua ai so’o se tasi ua po’ia i lea ma’i mata’utia. O le taimi muamua lenei ua fa’ao’o ai lenei Polokalama Faitau Tusi i le Manu’atele, ma ua fa’afiafiaina le tama’ita’i Pule A’oga o le Laumua o le Segaula Donna Mataese, ina ua o’o atu i latou e fesoasoani tele i le faitau tusi a le fanau a’oga.”

E ese mai lena polokalama na saunoa fa’apitoa fo’i le tamaita’i Dr Aoelua i le tulaga o le sauaina o fanau i totonu o le vasega po’o a’oga. O lea tulaga e matele ina avea ai nisi o fanau a’oga ma tamaiti ua le fia o i le a’oga ona ua so’ona fai i ai ulaga a nisi o fanau i totonu lava o latou vasega.

O fa’asoa a Dr Aoelua, e aoga uma i fanau a’oga fa’apea ma faia’oga, ina ia matauina e i latou ni uiga maasiasi pe matafefe o le fanau ma le tautala pe afai o le a fa’atasi atoa le vasega ma faia ni fetufa’iga i mataupu o le a’oga.

I lea fa’atasiga i Manu’a ma fa’atofala’iga sa feagai ai ma le Aoelua Reading Program ma le INSPIRE, ua matauina le fiafia o le fanau e fa’alogo ma fesiligia nisi o mea sa latou fia malamalama atili ai.

E lua aso o faia nei polokalama i le Manu’atele ma sa mafai ona aoga le polokalama i le to’a 45 o le fanau a’oga ma sa faia faitauga tusi a i latou na tofia fa’aitoa mo vasega eseese e ono i nei aso e lua, ae maise fo’i sa i ai le taimi atofa mo faia’oga ina ia fetufa’i ai i ala fo’i e fa’aleleia atili ai le so’otaga ma fanau a’oga i le taimi o lesona, ma nisi o auala e fa’afaigofie ai ona a’oa’o le fanau i potu a’oga.

O le auau o le fa’amoemoe maualuga o le AFRP, ina ia lelei atoatoa le faitau a le fanau a’oga i le latou vasega ua aoaoina ai.