Foai Leone High School nofoaga tausia ai latou leai ni aiga

E i ai nofoaga fa’apitoa e tausia ai nisi ua fa’amaonia i suesuega a le Matagaluega o Alamanuia mo Tagata e leai ni aiga, poo i latou fo’i ua a’afia i nisi o soligatulafono ua tatau ai ona tausia fa’apitoa i latou i nofoaga nei, se’ia mae’a sologalemu nei fa’afitauli i totonu o latou aiga.

O nofoaga nei ua fa’aautu i ai le foa’i i le vaiaso ua te’a a le Aoga Maualuga a Leone. O lea foa’i sa tu’u i le 16 ato o mea’ai eseese.

O lea galuega fa’aosofia lea e le Alofa Foa’i Fua mai le fa’aiuga o le masina o Novema 2019 ae na toe taofia ona o le vavao o le Misela na fa’amalosia mai i le poloa’iga fa’alaua’itele a le Kovana Sili i le amataga o Tesema 2019, ma ua fa’atuai ai ona fa’ataunu’u lea foa’i.

Ma o lea ua mafai ai ona fa’ataunu’u le fa’amoemoe e le Kalapu a le Close Up, Polokalama a le Junior Statesman, ma le HOSA.

I le aso Tofi na te’a nei, sa o’o atu ai ni sui o fanau a’oga ma nisi o faia’oga o Leone, Mikaela Saelua ma Neesha Masoli ma fa’ao’o atu lea foa’i i le Nofoaga Fa’apitoa mo i latou ua le nonofo i le malu o latou aiga.

O le tama’ita’i o Pa’ulia Pelenato, na avea ma sui o le fa’atonu o le DHSS ma lea nofoaga na talia lea foai. “Ou te fa’afetaia lenei foa’i taua mai le Laumua i Leone ma le mamalu o fanau a’oga uma, i latou na foa’i mo lenei fa’amoemoe. O se fe’au taua ua tatou molimauina nei, ona ua a’oa’oina lelei a tatou fanau o lo’o saili le atamai, i ala uma e mafai ona fa’asoa atu ai lou alofa i se tasi o lo’o pagatia, ae o loo soifua manuia pea le to’atele o i tatou. Ua fa’afetai le alofa, e moni lelei lava, e le mafai ona iloa le alofa se’ia fai lona tino.”

Saunoa le fa’atonu Muavaefa’atasi John Suisala, “O se mea lelei tele ua fa’atino e le fanau a’oga i Leone, ua latou fa’aalia mai lo latou agaga foa’i ma ua avea fo’i i latou ma ni tagatanu’u ua tapua fautuaina lelei ina ia latou ta’ita’ia le atunu’u i tausaga o lumana’i.”

“O le fa’afetai e tatau ona fa’ao’o atu i le Pulega ma le vasega o faia’oga ae maise lava le vasega o fanau a’oga sa latou foa’i fa’apitoa mo lea fa’amoemoe. Ua outou va’ai i le pagatia o feagai ma nisi, ua outou le tuua ai le alofa fa’atino ma fa’ailoa atu i ala e fa’afaigofie ai ona tu’ua le malu o aiga, ae fa’anofo esea. Tau ina ia fa’amanuia le Atua i fanau ma le Laumua o lo’o latou fa’asoa mai le alofa.”