Finagalo ni isi Senatoa ave fa’amuamua i aiga na mafatia i le ‘afa

Ua manino i finagalo fa’aalia o ni isi o afioga i Senatoa lo latou naunau e tatau i le malo ona ave le fa’amuamua i aiga na mafatia i le ‘afa o Gita na se’i mavae atu nei, nai lo le soona fa’aalu o tupe i polokalame eseese o le fu’a mo lenei tausaga.

I le taimi o folafolaga a le Senate i le ulua’i aso o le latou fonotaga i le vaiaso nei, na fa’aalia ai e ni isi o Senatoa le tatau lea ona ave se fautuaga a le Fono i le Kovana o le malo, mo se avanoa e fa’aitiitia ai polokalame fa’atino mo le fu’a o lenei tausaga ma le soona fa’aalu o tupe a le malo, ae fa’asao mai tupe e fesoasoani ai i aiga mafatia.

O le afioga i le ali’i Senatoa ia Tuiagamoa Tavai na fa’aleoina le mataupu, i se avanoa e ave ai le fautua i le Kovana, ua lava se saunigalotu o le fu’a, ae taofi uma isi fa’agaioiga e pei ona masani ai mo lenei tausaga.

Saunoa Tuiagamoa e fa’apea, e ui lava o lea ua taoto fesoasoani mai le malo tele mo tulaga na faaleagaina i le ‘afa, ae tatau lava fo’i ona silasila mai le atunuu o loo i ai se sao a le malo e fesoasoani ai mo i latou.

Na lagolagoina e afioga i ali’i Senatoa ia Satele Galu Satele ma Alo Fa’auuga le finagalo o Tuiagamoa.

Saunoa Satele e faapea, o lea e tau su’e ni tupe e fesoasoani ai i aiga na mafatia, ao lea o le a sauni le malo e fa’ataunuu pea isi fuafuaga o le fu’a e aofia ai tuugava’a ma pese ma siva.

Sa ia taua e fa’apea, e mafua ona tutupu nei tulaga faapea, e le o lagona e le malo le oi o aiga matitiva i le tau sailiina lea o ni tupe e tua i ai o latou aiga.

Saunoa le afioga i le ali’i peresetene o le Senate ia Gaoteote Palaie Tofau e faapea, e tatau ona silafia e le maota, o tupe o le fu’a ua mae’a ona pasia e le fono i le paketi o le tausaga lenei, ma o loo taoto i lalo o le paketi a le Ofisa o Mataupu Tau Samoa.

I lona taofi, e le mafai ona tupu se tulaga faapea o le aumai o tupe ua uma ona pasia i le paketi o le fu’a e foa’i mo aiga mafatia i le ‘afa. Sa ia fa’ailoa i afioga i Senatoa e fa’apea, e taua tele lo latou finagalo fa’aalia, o le a maua fo’i se avanoa na te fa’aooina atu ai i le Kovana.

Sa ia toe fa’amanatu i le maota e fa’apea, e ui lava o lea ua tulaga pagatia le atunuu, ae le mafai ona avea matagi ma ‘afa fa’atoa tutupu e taofia ai fuafuaga o le fu’a a le malo e fuafua ma faapaketi i tausaga ta’itasi.

Sa ia faafetaia afioga i Senatoa e tusa ai o lo latou naunau e faamuamua fesoasoani mo aiga mafatia, ae i lona taofi, e tatau fo’i ona mulimulita’i le Fono i le tulafono o le paketi sa latou pasia atu.

Na lagolagoina e le afioga i le ali’i Senatoa ia Faiivae I. Godinet le saunoaga a Gaoteote, i le tulaga o le paketi ua uma ona pasia mo le fu’a. O lana fautuaga, pe maua se avanoa e fautua ai i le Kovana ina ia fa’aitiitia polokalame o le fu’a, ina ia mafai ai ona fa’atino le tulaga e pei ona naunau i ai ni isi o afioga i Senatoa, o le ave lea o le fa’amuamua i aiga mafatia.

Pau le tulaga na taua e Faiivae na te le lagolagoina, o le tufa lea o tupe mo aiga mafatia.

Sa ia fautuaina fo’i afioga i Senatoa ina ia silasila toto’a i se tasi o mataupu taua ua maitauina i le taimi nei, ona o le gagana ua fa’aaoga i asiasiga i maota ma laoa o aiga na mafatia, e pei ona fa’aigoa ai ni isi o maota ma laoa o aiga i le gagana peretania o ni ‘shack’ poo ni tama’i fale.

Na taua e Faiivae e faapea, e tatau ona fautua i alii mautofi o loo galulue ma sui o le feterale i taimi o asiasiga, e le o ni shack maota ma laoa o aiga, ae o fale nofo.

Na lagolagoina e le afioga i le ali’i Senatoa ia Galea’i M. Tuufuli le finagalo o le ali’i peresetene e faatatau i tupe ua mae’a ona fapakaeti mo le fu’a.

Saunoa Galea’i e fa’apea, e le tatau i le Fono ona toe aapa i tupe ua uma ona taoto atu i le faigamalo e fa’atino ai fuafuaga a le malo ma le atunu’u.