Filifilia Vaiaitu avea ma Failautusi mo le Maota o Sui

Ua filifilia nei e le Maota o Sui a le Fono Faitulafono le tofa a Vaiaitu Mulinuu Maluia, e avea ma Failautusi a le maota, e sui tulaga i le Faletua ia Fialupe Felila Fiaui Lutu sa ia tauaveina le tofi mo le tele o tausaga, a o lea ua filifilia o ia e avea ma Faipule o le Itumalo o Sua #1.

O le vaiaso nei a o le i tapunia galuega a le maota o sui mo le Fono Faitulafono lona lua na valaauina e le ali’i Kovana, na filifilia ai loa Vaiaitu i lenei tofiga, e ala i le palota fulisia e 12-0.

O Vaiaitu sa tautua o se faiaoga mo le Matagaluega o Aoga a le malo mo le tele o tausaga, a o le i filifilia o ia e avea ma sui Faipule o lona itumalo o Ituau i le nofoaiga lona 34 a le Fono Faitulafono ua mavae atu mo le umi e tasi le nofoaiga.

O le amataga o le tausaga nei na amata galue ai loa o ia mo le maota o sui i le tofiga o le Sui Failautusi.

O le tofiga o Vaiaitu o le a amata aloaia i le aso 8 Ianuari 2018, o le aso lea o le a tauaofia ai galuega a le Fono Faitulafono mo le tausaga lona tolu o le nofoaiga lona 35 o lo o nofoia nei, ae o le aso fo’i lea ua fa’atulaga e fa’atauto aloaia ai loa le Faletua ia Fialupe mo le tofi Faipule a lona Itumalo, lea na avanoa ina ua filifilia le susuga a Puleleiite Li’a Tufele Jr sa ia tauaveina le nofoa, e avea ma Pulesili o le Ofisa o Fa’asalalauga a Amerika Samoa (ASTCA)

E silia i le 10 tausaga sa avea ai Fialupe ma Failautusi o le maota o sui. A o le i galue o ia i lea tofiga, sa avea o ia ma sui failautusi a le Senate. O le tausaga nei lea na aloaia ai loa le malolo litaea o Fialupe mai le Fono Faitulafono, ae filifilia ai loa o ia e avea ma sui o le itumalo, mo le fa’aauauina o le nofoa sa tauaveina e le susuga a Puleleiite.

O le mae’a ai ona filifilia o Vaiaitu i le tofiga o le Failautusi, na tu’uina atu ai loa ma fa’amanuiaga a le maota, atoa ai ma le saunoaga mai le afioga i le Fofoga Fetalai, tofa Savali Talavou Ale.