Filifilia se Failautusi fou a le Senate

Pago Pago - AMERIKA SAMOA

O le vaiaso ua mavae na autasi ai afioga i Senatoa o le Maota o Senate, e filifilia le tina ia Motusaga Peleti e avea ma Failautusi fou i totonu o le Senate, e sui tulaga i le susuga ia Leo’o Va’a Ma’o, lea ua silia ma le tausaga talu ona si’i ma’i i atunu’u i fafo, ona o gasegase o le tino.

O lenei mataupu sa uluai faatulai e le afioga i le Senatoa ia Soliai Tuipine Fuimaono, i le uluai vaiaso o tauaofiaga a le Senate, i le amataga o le tausaga.

O le afioga i le Senatoa ia Magalei Logovi’i sa fa’atula’ia se mau ina ia filifilia le tina ia Motusaga Peleti, lea sa avea ma Failautusi Lagolago talu ona malaga Leo’o, e avea ma Failautusi fou.

Sa saunoa Magalei, ua lava le tomai ma le poto masani ia Peleti, aua ua leva foi ona galue i totonu o le Maota Fono, e faatinoina ai lenei galuega.

Sa fa’auluina loa le suafa a Peleti mo le palotaina, ma na autasi uma Senatoa e pasia lona tofiga fou.

I se faatalanoaga a le Samoa News ma le Failautusi fou a le Senate, sa fa’aalia ai e Peleti lona agaga fa’afetai i le Peresetene o le Senate faapea afioga i Senatoa uma, mo la latou lagolagoina ma le fa’atuatuaina o ia i lenei tofiga.

Sa fa’aalia e Peleti lona agaga fa’afetai mo lenei faamanuiaga ae le gata i lea o faamanuiaga ma taitaiga a le Atua ia te ia, i lenei vaega o lona soifuaga.  Sa faaleoina foi e Peleti lona agaga fa’afetai ia Leo’o Va’a Ma’o mo lana taitaiga i tausaga e tele sa o la galulue ai.  Ma na ta’ua e Peleti lona tatalo pea i le Atua, mo faamanuiaga ma fa’amalologa mo le susuga ia Leo’o, ina ia mafai ona toe taliu manuia mai le faigamalaga.

Na ta’ua e Peleti, e le’i iai sona manatu o le a filifilia o ia mo lenei tofiga taua ma sa ia fa’aalia le taua o le Maota Fono ia te ia, ma o le faatumutumuga lenei o le 36 tausaga o lona tautua i totonu o le Fono.

O le tina ia Peleti sa faau’u mai i le aoga maualuga a Leone i le 1983, ma fa’aauau ai ana aoaoga i le Kolisi Tu’ufaatasi a Amerika Samoa (ASCC) ae peitai, sa ia tu’ua ana aoaoga ona o galuega e fesoasoani i ona matua, i le tausiga o le latou aiga.

O Peleti, o le lona ono o se fanau e to’asefulu (10), a le susuga ia Saufo’i Alopepe ma le faletua ia Motusaga, mai i le afioaga o Iiili.  O Peleti sa faaigoaina o ia i le igoa o si ona tina.

Sa amata mai le soifua galue a Peleti i kamupani i’a i Satala, ae ina ua ia tu’ua lana a’oga i le ASCC, sa maua sona avanoa e galue ai i le Faletusi a le Malo i Utulei (Feleti Barstow Library) ma soso’o atu ai ma le Ofisa o Taavale (OMV).

Sa apalai Peleti mo se galuega o le fa’asa’osa’o upu i le Maota Fono ma sa amata ona ia galue i lea tofiga ia Setema 29, 1988, o lona totogi sa iai, e $5,000 i le tausaga.

Na ta’ua e Peleti, e toatolu ni Failautusi sa iai, a’o ia galue i le Maota Fono, na aofia ai Salilo Levi, Fialupe Lutu ma Leo’o V. Ma’o.

Ma o lona tomai i lenei galuega sa aoaoina lava i totonu o le Maota Fono.  Sa ia ta’ua le u’una’ia o ia e Leo’o ina ia faatino tiute fa’a failautusi i taimi o tauaofiaga a le Senate, ma sa faalototeleina o ia e Leo’o ina ia leotele ma faamanino ana faamatalaga.

Sa faamatala e Peleti, o le ulua’i taimi na ia faatinoina ai le galuega o le Failautusi mo Leo’o, o le taimi lea na peresetene ai le afioga Gaoteote Palaie Tofau, i totonu o le Senate.  

O le tina ia Peleti o lo o faaipoipo atu i le susuga ia Va’a Peleti ma o i la’ua o ni matua i ni fanau se to’atolu, ma se tina matua i se alo e toatasi.