Filifilia Logoai Siaki Logoai senatoa fou Manu’a #1

O le masina ua te’a na filifilia ai e ali’i ma faipule o Manu’a Numera 1, le afioga ia Logoai Siaki Logoai mai le itumalo o Fitiuta e avea ma senatoa fou mo le  Manu’a #1 i le Maota Maualuga, ina ua avanoa le nofo o le itumalo ona o le tu’umalo i le masina o Oketopa 2018 o le afioga i le Senetoa ia Galeai Moaali’itele Tu’ufuli.

I le taimi o le tuumalo o le afioga ia Galeai, e toe lua tausaga o lo’o totoe i lana nofoaiga e 4 tausaga. O Manu’a #1 e aofia ai Ta’u, Faleasao ma Fitiuta. E toalua senatoa o Manu’a #1 i le Maota Maualuga. O le isi tofi senetoa o lo’o uumia e le afioga ia Nuanuaolefeagaiga Saoluaga T. Nua - ma o ia foi lea o le Sui Peresitene o le Maota Maualuga.

I sana tusi ia Tesema 27, 2018 sa fa’ailoa ai e le afioga i le Failautusi o Mataupu Tau Samoa, Mauga T. Asuega i le Peresitene o le Maota Mauga, afioga Gaoteote Tofau Palaie le fa’aiuga a le itumalo sa faia ma filifilia ai Logoai. O le kopi o le tusi a Mauga ua tuuina atu foi i le afioga i le Kovana Sili, Lolo Matalasi Moliga.

O lo’o tuufa’atasia i le tusi a Mauga, pepa fa’amonia o le filifilia o Logoai, o lo’o sainia e ali’i ma faipule o Manu’a #1, fa’atasi ai ma fa’alupega o Ta’u, Faleasao ma Fitiuta.

“Ua ia i matou le fa’aaloalo tele, e fa’ailoa atu ai i lau Afioga ma le mamalu o le Ofisa o Mataupu Tau Samoa, ua ma’ea nei ona usuia le fonotaga a le matou Itumalo - Ta’u, Faleasao, Fitiuta - [Manu’a] Numer 1,” o se vaega lea o tusitusiga o pepa fa’amonia mai le itumalo sa tuuina atu i le afioga i le Maoputasi ia Mauga.

Ma “ua tasi ai nei, ma ua filifilia ai le afioga ia Logoai S. Logoai e avea ma Senetoa o le matou Itumalo i le Maota Maualuga i le Fono Faitulafono a le malo o Amerika Samoa,” o se isi vaega lea o tusitusiga a le itumalo.

I lalo o le fa’avae o Amerika Samoa o lo’o manino mai ai le filifili ina o senetoa o le Maota Maualuga e ala lea i le fa’aSamoa, i fonotaga a itumalo eseese ma o le fa’aiuga e fa’amonia e fa’alupega o ia itumalo.

O le afioga ia Logoai sa avea fa’amasino i le Fa’amasinoga Maualuga a Amerika Samoa ma o le aso 2 o Ianuari 2015 sa litaea mai ai o ia i le fa’amasinoga, ina ua silia ma le 50 tausaga o lana tautua i vaega eseese o le malo o Amerika Samoa.

Ina ua litaea o ia sa galuega loa i le Ofisa o le Kovana, o se tasi o sui o le afioga i le kovana sili, i matapu i le va o le Kovana ma le Maota Maualuga.

E le o mautinoa i le taimi nei pe o afea e fa’atautoina ai le afioga ia Logoai i lona tofiga fou o le Senetoa.

Ae o le aso 14 o Ianuari, e tatala aloaia ai le Nofoaiga Fou lona 36 a le Fono Faitulafono, lea e saunoa fa’apitoa ai le kovana sili i lana saunoaga i le amataga o tausaga taitasi i le tauaofiaga muamua a le Fono Faitulafono - e pei ona aiaia mai i le fa’avae o Amerika Samoa.

O lea saunoaga a le kovana, e fa’alauaitele ai tulaga o le malo ae maise le atunu’u atoa i le tausaga ua mavae fa’apea se tagai a le faigamalo i le tausaga 2019. O nisi o ia mataupu e aofia ai le tulaga o le tamaoaiga, fuafuaga a le malo o le tausaga 2019, fa’atasi ai ma nisi o mataupu o lo’o fuafua le afioga i le kovana sili e tuuina atu i le Fono Faitulafono e iloiloina ma faia i ai sa latou fa’aiuga.