Filifilia le afioga i le Senatoa ia Tuaolo avea ma Peresetene o le Senate

Pago Pago, AMERIKA SAMOA

Ua fiifilia nei le afioga i le ali’i Senatoa mai le Itumalo o le Maoputasi i le afioaga i Pago Pago, le tofa a Tuaolo Manaia Eti Tuiletufuga Fruean e avea ma Peresetene o le Senate i le Fono Faitulafono a Amerika Samoa mo le isi 4 tausaga o loo lumana’i nei.

O le filifilia ai o le afioga i le ali’i Senatoa ia Tuaolo na te umia lenei tofiga taua i le Fono Faitulafono, na faia lea ina ua fulisia uma finagalo o afioga i Senatoa e avea o ia a Ta’ita’i o le Maota i le taimi na faatauto ai afioga i Senatoa mo le Nofoaiga lona 37 a le Fono Faitulafono a le atunu’u i le Aso Sa na te’a nei, aso 3 o Ianuari, 2021 i le itula e 12:00 i le aoauli.

Na molimauina e uo ma aiga o afioga i Senatoa e to’a 18 le faagasologa o lenei sauniga taua, lea fo’i na maua ai le avanoa o nisi o le atunuu mo le ulua’i taimi latou te molimauina ma faafofoga ai i le auala e fa’atautaia ai le Faatautoina o afioga i Senatoa mo le nofoaiga fou a le Fono Faitulafono.

O le Failautusi le tumau a le Senate ia Leoo Va’a Ma’o na ta’ita’ia le sauniga e tatala aloaia ai le Faatautoina o afioga i ali’i Senatoa. I le mae’a ai o le viiga ma le tatalo, na tofia ai loa e le Senate so latou Ta’ita’i le tumau na te faatautaia galuega a le Maota. 

Na tula’i le afioga i le ali’i Senatoa mai le Itumalo o Manu’a #2, le tofa i le Tootoo ia Malaepule S. Moliga na fa’atula’i le suafa o Tuaolo e avea ma Ta’ita’i le tumau, lea fo’i na faalua e le afioga i le ali’i Senatoa mai le Itumalo o Fofo, le afioga i le Malu a le Fale ia Faiivae Iuli Godinet, ma lagolagoina ai loa e le maota atoa e ala i le palota na latou si’i aao i ai.

O le mae’a ai ona filifilia o Tuaolo e avea ma Ta’ita’i le tumau o le Maota, na ia tofia ai loa se Komiti Iloilo (Credential Committee) e to’atolu ona sui latou te iloiloina tofiga a itumalo taitasi mo afioga i ali’i Senatoa e to’a 18, pe ua agava’a i latou e nofoia nofoa o le Senate i le Fono Faitulafono.

O sui o le Komiti Iloilo e aofia ai le afioga i le ali’i Senatoa, le afioga i le Maopu ia Uti Petelo mai le Falelima i Sasa’e; afioga i le ali’i Senatoa, le afioga i le Sa’o ia Magalei Logovi’i mai le Faleilma i Sisifo, ma le afioga i le ali’i Senatoa ia Malaepule mai le Falelima i Manu’a.

E silia i le 10 minute na iloilo ai e le Komiti Iloilo faamaumauga uma e fa’atatau i agava’a o afioga i Senatoa, ae tau aao atu loa le latou ripoti i luma o le laulau, ma latou faailoa ai i le latou ripoti le agava’a uma o afioga i Senatoa latou te nofoia nofoa o le Senate i le Fono Faitulafono.

O le itula e 12:00 i le aoauli na faataunuu aloaia ai loa le sauniga o le faatautoina o afioga i alii Senatoa, lea na faatautaia a le afioga i le  Faamasino Sili lagolago ia Muagututia Fiti Alexander Sunia.

O le mae’a ai o le sauniga faapitoa o le faatautoina o afioga i Senatoa, na alo atu ai loa le maota mo le sailia o se tasi e avea ma Peresetene o le Senate mo le isi 4 tausaga. 

O le afioga i le ali’i Senatoa ia Malaepule na tula’i ma fa’atu le suafa o Tuaolo e avea ma Peresetene o le Senate, lea fo’i na faalua e le afioga i le ali’i Senatoa ia Faiivae.

Ina ua fesili Tuaolo pe i ai se isi sui e fia fa’atula’i mo le sailia o le tofi Peresetene o le Senate, na tula’i ai loa le afioga i le ali’i Senatoa mai le Itumalo o Leasina, le susuga i le Tama Matua ia Tuiagamoa Tavai ma faaleo lona finagalo e fa’atatau i lenei mataupu.

Saunoa Tuiagamoa e fa’apea, ina ua toe filifilia o ia e lona Itumalo na te toe nofoia le nofoa mo le isi 4 tausaga, sa fautuaina ai o ia e le Itumalo ina ia faaleo le mataupu lenei i luma o le Fono Faitulafono, le mataupu e fa’atatau i le sailia o le Ta’ita’i mo le Maota Maualuga o le Senate.

Na taua e Tuiagamoa e faapea, talu ai o le maota o le Senate e filifilia mai ona sui i auala faaleaganu’u, ma filifilia mai ai Faasuaga ma Tamali’i maualuluga o le atunu’u latou te nofoia nofoa o le Senate, e talitonu ai fo’i lona taofi, e tatau fo’i ona faapena le filifilia o se Ta’ita’i mo le Maota Maualuga, e tatau fo’i ona filifilia mai i Tapaau ma Tamali’i maualuluga o le atunu’u.

Sa ia taua e faapea, o loo afio i totonu o le Nofoaiga lenei 37 a le Fono Faitulafono le afioga i le ali’i Senatoa ia Satele, ua na o ia lava le Faasuaga i totonu o le Maota, atoa ai fo’i ma nisi o Tamali’i maualuluga o le atunu’u. I lona taofi, e tatau ona ave le fa’aaloalo ia Satele mo le tofi o le Ta’ita’i o le Maota, poo isi fo’i Tamali’i o le atunu’u, ae afai latou te teena lea fa’aaloalo maualuga, ona faatoa tu’u atu ai loa lea o le avanoa i le Tofa a Tuaolo e pei ona finagalo i ai le maota.

Na faamanino e Tuiagamoa e faapea, e leai ma se mea e ita ai ia Tuaolo pe aafia ai lona lagona i le afioga i le ali’i Senatoa, o ia o se uo mamae ia te ia, o ia fo’i o se tasi o Ta’ita’i ua loa lana tautua i le malo ma le atunu’u, e le fefe fo’i e finau mo se mea lelei mo le atunu’u. Sa ia taua atili fo’i lona taofi, e le tatau ona avea le tupe ma auala e punitia ai le fa’aalia o lagona moni e fa’atatau i mataupu faapenei, leaga o le tupe, o le faapogai lea o mea leaga uma o le olaga.

Na faauilavea le afioga i le ali’i Senatoa ia Magalei ma fautua ia Tuiagamoa, ina ia mulimulita’i i tulafono a le maota, e ala i le faatula’i mai o sana sui e tauva mo le nofoa o le Peresetene, ona o lea e faalaua’itele lana saunoaga ia Satele ma isi Tamali’i, ae le o maoti mai poo ai lana sui fa’atu. O le mafua’aga lea na faatula’i ai loa e Tuiagamoa le suafa o Satele mo le tofi Peresetene o le Senate.

Na tula’i le afioga a Satele ma faafetai ia Tuiagamoa e tusa ai o le fa’aaloalo maualuga mo ia. Sa ia taua e faapea, o le tofi Peresetene, e manaomia ai se tagata e vae mama toe vae tamo’emo’e i le faatinoina o galuega a le Maota. I lona taofi, ua talafeagai i ai le tofa a Tuaolo i lea tofiga, ma ia saga faamausaliiina ai le mau e filifilia ai Tuaolo e avea ma Peresetene o le Maota.

Na tula’i le afioga i le ali’i Senatoa ia Togiola ma ia saunoa e faapea, o le mea e ta’u o le fa’aaloalo moni lava i le tupu poo le tamali’i, o le tu’u lea o le avanoa e fa’amaepaepa ai le tupu poo le tamali’i, ae tu’u le galuega e fa’atino e i latou e tatau i ai. I lona taofi e pei ona saunoa Togiola, o le tofiga o le Peresetene, o le tofi galue, e mana’omia ai fo’i se tagata e fai ma auauna a le maota. Sa ia toe faamausaili le mau e filifilia ai Tuaolo e avea ma Ta’ita’i o le Maota, ma faamaonia ai loa e ala i le palota na fulisia uma i ai afioga i Senatoa.

Na faafetaia e Tuaolo afioga i Senatoa e ala i le fa’aaloalo maualuga ua tofia ai o ia e fai ma Ta’ita’i o le Maota. Na tutulu le afioga i le ali’i Peresetene filifilia ao saunoa e faaleo ona lagona faagaeetia ma le fiafia ina ua tafa le finagalo o le maota e fai o ia ma o latou ta’ita’i.

Saunoa Tuaolo e faapea, e ui i lona fa’atauva’a, ae faafetai i le Atua ua auala mai lona finagalo e ala i le tofa saili o afioga i Senatoa. 

Na mae’a le sauniga o le faatautoina o Senatoa, ma sosoo atu ai lava ma le nofoai o le ulua’i Fono Faapitoa na valaauina e le afioga i le ali’i Kovana ia Lemanu Palepoi Peleti Mauga mo le umi e 5 aso, e talanoaina ai le i’ugafono malilie faatasi a le Fono Faitulafono e pasia ai le Paketi e fa’aauau ai galuega faatino a le malo mo le Tausaga Tupe lenei 2021.

Ua mae’a nei ona pasia e maota e 2 le iugafono ma ua mae’a fo’i ona tauaao atu i le Ofisa o le ali’i Kovana mo le sainia ma faamaonia.

O le itula e 10:00 i le taeao o le aso Gafua o le vaiaso fou, Ianuari 11, 2021 ua faamoemoe e tatala aloaia ai le Tauaofiaga a le Fono Faitulafono mo lana Nofoaiga lona 37, e ala i se sauniga faapitoa e faia lea i le Fale Laumei i Utulei, ma faagasolo ai loa galuega faatino a maota e 2 mo galuega masani mo le ulua’i 45 aso o lana ulua’i tauaofiaga.