Filifilia Kovana afioga Fuamatu avea ma Kovana Itumalo Falelima i Sisifo

Ua filifilia nei e le afioga i le ali’i kovana ia Lolo Matalasi Moliga le afioga i le Fa’asisina ia Fuamatu J.V Fuamatu, e avea ma Kovana Itumalo o le Falelima i Sisifo.

I se poloaiga a le ali’i kovana sa tu’uina mai i le amataga o le vaiaso nei, sa ia taua ai lona filifilia o Fuamatu na te fa’aauauina le tofi Kovana Itumalo o le Falelima i Sisifo, sa tauave mai e le afioga i le Tama a Aitu ma Tagata ia Lualemaga E. Faoa ua tuumalo.

E pei ona manino i lalo o le Fa’avae Toe Teuteu a Amerika Samoa, o lo o taua ai le tofiaina lea ma filifilia e le kovana o Kovana Itumalo, i le mae’a ai lea ona tu’uina atu o se fautuaga mai le Failautusi o le Ofisa o Mataupu Tau Samoa, ae maise o itumalo.

“I le avea ai o a’u ma Kovana, ua ou faia ai lenei fa’aiuga ina ia tusa ai ma le tulafono, e ala i lo’u filifilia o le Kovana Itumalo mo le Falelima i Sisifo, na te fa’ataunu’u ma fa’aauau tiute tauave sa tauave mai e le afioga a Lualemaga ua tu’umalo”, o se vaega lea o le saunoaga a le ali’i Kovana i lana poloaiga.

Na taua atili e le ali’i Kovana lona taulimaina o suafa e 3 mai le fonotaga a le Falelima i Sisifo sa usuia, ina ia filifilia mai ai se tasi na te nofoia le nofoa ua avanoa, atoa ai ma le fautuaga sa tu’uina atu e le Failautusi o le Ofisa o Mataupu Tau Samoa e fesoasoani i lana fa’aiuga.

“Ou te matua talitonu atoatoa o le Kovana Itumalo fou mo le Falelima i Sisifo lea ua ou filifilia nei, o le a ia fa’ataunu’uina tiute tauave uma e tusa ma le tulafono, ma ou te talosagaina ai le tu’uina atu o la outou lagolago ia te ia”, o le fa’aiuga lea o le poloaiga a le ali’i kovana.

O le fa’aiuga e pei ona filifilia ai e le kovana ia Fuamatu e avea ma Kovana Itumalo o le Falelima i Sisifo, na faia lea ina ua le maua se tasi i fonotaga e 2 sa faia a le Falelima e filifilia ai so latou Kovana Itumalo.

O le fonotaga muamua sa usuia lea i le maota o le afioga i le Fa’asuaga o le Falelima i Sisifo i Asotau, le afioga i le ali’i Senatoa ia Satele Galu Satele, lea na fesiligia e le to’atele o le Falelima ina ua tofia e Satele le afioga i le Sa’o ia Tuiasina Esera e avea ma Kovana Itumalo, i le mae’a ai lea ona tu’uina atu o le finagalo o Satele i le taimi o le fonotaga, e taoto atu ai le tofi i lona itumalo o Tualatai.

O le fesiligia e le to’atele o le tofiaina o Tuiasina e avea ma Kovana Itumalo, aemaise ai le na o le to’a 5 na sainia le pepa e fa’amaonia ai le filifilia o Tuiasina, na talo ai loa e le afioga i le Failautusi o le Ofisa o Mataupu Tau Samoa ia Mauga Tasi Asuega le fonotaga lona lua a le Falelima i Sisifo, mo le toe sailiina o le tofa i se tasi na te fa’aauauina le nofoa.

O le fonotaga lona lua sa usuia i le Ofisa o Mataupu Tau Samoa, lea fo’i na le maua ai se tasi ina ua finau pea le afioga a Satele e aloaia le fa’aiuga ua ia faia, e avea ai Tuiasina ma Kovana Itumalo, peita’i sa finau isi Itumalo ina ia tu’u atu le tofi latou te tauaveina, e pei o le itumalo o Alataua ma le itumalo o Leasina/Aitulagi.

Talu ai e lei maua se tasi i le fonotaga lona lua a le Falelima i Sisifo, na faia ai loa le fa’aiuga e sili pe a taoto atu loa se fa’aiuga o le mataupu i le afioga i le ali’i kovana, fa’atasi ai ma le tu’uina atu o suafa e to’atolu e filifili mai ai o ia mo se tasi e avea ma Kovana Itumalo.

O suafa e to’atolu sa tu’uina atu i le ofisa o le ali’i kovana e aofia ai Fuamatu, Tuiasina ma LeAtualevao Asifoa.