Filifili taitai fou a le Asosi o Faamasinoga/Loia a Amerika Samoa

Pago Pago - AMERIKA SAMOA

O le aso 9 o Me, sa filifilia ai ni taitai fou a le Asosi o Faamasinoga/Loia a Amerika Samoa (ASBA) mo le faafoeina o gaioiga faaletausaga a le Asosi, atoa ai ma fesoasoani i le Asosi ina ia ausia la latou misiona, mo le atina’eina o le faamasinoga tonu, aiaiga o le tulaga ma matafaioi faaletulafono.

Ma o i latou ua filifilia, ua aofia ai le Peresetene fou, lea ua filifilia ai le faletua ia Mitzie Jessop-Taase, sui Peresetene ia Aaron Thomas, o Julia Furlong ua avea ma Failautusi, o le faletua ia Lornalei Meredith Fanene e avea ma Tausitupe fou faapea ma James McGuire le Sui Filifilia Lautele.

O Lornalei Meredith Fanene sa avea ma peresetene o le Asosi, lea ua fa’ato’a malolo.

O le loia a le Asosi, o Sharron Rancourt.

O se faafitauli tumau o lo’o feagai ma lenei Asosi, e o’o mai lava i le taimi nei, o le sailiga lea o ni loia e mafai ona galulue i totonu o le teritori.

Sa fa’alauiloa mai e le sui Peresetene fou, a le Asosi, le susuga ia Aaron Thomas, e mafua lenei faafitauli, ona o le le toatele o ni fanau aoga, e fia auai i aoaoga fa’aleloia po o le fia galue i totonu o ofisa loa po o le fia avea ma Faamasino. 

Po o le le toe fo’i mai o fanau a’oga e malaga atu i atunu’u i fafo, e fa’aauau a latou a’oa’oga faaloia, ona o le maualuga atu o totogi mo galuega i atunu’u i fafo, i lo Amerika Samoa.

Sa fa’asoa mai foi e Thomas, o lona foi lea malamalama i lenei faafitauli, ae e le tutusa uma o latou manatu ma isi totino o le Asosi.

Sa saunoa Thomas, o se tasi mafuaaga e fiafia ai loia mai i atunu’u i fafo, e malaga mai e galulue i totonu o le teritori, ona o le tulaga ese o le soifuaga i totonu o le teritori, e le gata i le matagofie o le siomaga ae faapea foi le aganu’u.

Ae mo nisi o fanau aoga o le teritori, e mafua ona toe fo’i mai, ona o le alolofa i matua ma aiga ma le mana’o e toe foi mai e tautua i totonu o nu’u ma afioaga, e ui lava i le sili atu ona maualuga o totogi i atunuu i fafo.

Sa ta’ua e Thomas, le tatau i fanau a’oga ona nofo malamalama i le taugata o le fitu tausaga o a’oa’oga mo se tasi e fia avea ma loia, e le gata i le fa tausaga i totonu o kolisi ma iunivesite, ae faapea tausaga e tolu faaopoopo i totonu o se aoga fa’aloia.

Ae o lana fautuaga i alo ma fanau a le atunu’u, ia aua le avea lea tulaga ma mafua’aga e taofia ai lo latou tausinioga pe afai o le galuega lea o lo’o latou naunau iai.  Ma o lo’o iai le tele o polokalama, e mafai ona fesoasoani ia i latou, aemaise lava i latou e filifili e galulue i totonu o le malo po o faalapotopotoga ‘non-profit’.

Na fesiligia foi le sui Peresetene, pe alagatatau ona inivesi ia le malo i lumanai o fanau a’oga, e ala i ni sikolasipi po o le faatupeina o a latou a’oga.

Ae peitai, sa faamanino mai e Thomas, o le tulaga lena, e le o’o iai sona manatu.  Ae o se mataupu taua lenei, ua leva ona soalaupuleina i totonu o a latou fonotaga, ma ua tasi ai la latou Asosi, i le tatau lea ona o latou galulue malosi, e fa’aleleia atili a latou polokalama e fesoasoani i fanau a’oga a le teritori.

O se tasi o manatu ua o latou soalaupuleina, o le auai atu lea o loia a le teritori i ‘Career Fairs’ a a’oga, po o ni isi ituaiga gaioiga a a’oga, ina ia mafai ona fa’asoa atu, a’oa’o, ma u’una’ia alo ma fanau a’oga, ina ia agai o latou manatu i lenei ituaiga galuega.

O seisi manatu na folasia ma soalaupuleina, o le faia lea o se tauvaga o faamasinoga faata’ita’I (Mock Trial Competition) mo fanau aoga, ma o lea fuafuaga o lo’o faamoemoe e faia i le amataga o le tausaga fou.

Na fa’asoa mai foi Thomas, afai ae tulaga lelei tala o le tupe, o le a faapea ona o latou iloiloina ni sikolasipi e mafai ona fa’amanuiaina ai nisi o fanau aoga, aua le aga’i i kolisi.  Saunoa Thomas, e le gata i loia, ae e mana’omia foi ni tagata su’esu’e, o ‘paralegals’, o vaega fa’amaumau, mo le fa’agaioia lelei o lenei galuega.

Aemaise ai, o le fa’amautuina o se latou feso’ota’iga maumaututu ma faiaoga o le Kolisi a Amerika Samoa (ASCC), aua le faatulagaina o ni gaioiga e atina’eina ai, u’una’ia ai, ma sauniuni ai fanau aoga a le teritori, o lo’o fia galue i totonu o ofisa o faamasinoga ma ofisa loia, ina ia o latou nofo malamalama i mea e feagai ma i latou pe a malaga atu i atunu’u i fafo mo le fa’aauauina o a latou a’oa’oga.

Ma sa va’aia le tino mai o lea galulue faatasi ia Me 1, 2024, ona o taumafaiga a taitai o le Asosi lea ua malolo atu.

O le aso muamua o Me o tausaga taitasi, ua ta’ua o le ‘Aso Faaletulafono (Law Day)’, e pei ona aloaia ai i totonu o le Iunaite Setete, ma o se aso e toe tomanatu ai ma toe faamanatu ai, le vaega o le tulafono i totonu o le faavae o le atunu’u ma aloaia ai lona taua i totonu o le sosaiete.

O lenei tausaga, i le faamanatuina ai o lenei aso taua, sa fa’aautuina ai taumafaiga ma gaioiga o lea aso, o le “Leo o le Temokarasi”, ma fa’ataua ai le taua o manatu ma faaiuga a tagata, i totonu o se atunu’u faatemokarasi.

Sa faapea ona faia ai se fa’atasiga tele a le ASBA i le fale’aiga a le DDW, e feiloai ma soalaupule ai ma ni isi o fanau aoga, ua iai le naunautaiga e galulue faaloia, faamasino po o ni isi o galuega i totonu o fale faamasino ma ofisa loia, i le lumanai.

Na fa’aalia e le faletua ia Lornalei Meredith Fanene, lea na avea ma Peresetene, le i’u lelei o lea fuafuaga i lea afiafi ma sa to’atele ni isi, na aofia ai ma fanau aoga a le ASCC, na mafai ona auai mai i lena afiafi.

O se faamoemoega maualuga i le Asosi, e pei ona sa faaleoina e Meredith Fanene, o le a mafai ona faamautu ai lagona ma naunautaiga a i latou sa auai i lea afiafi, ina ia se aso i le lumanai, o le a avea ai i latou ma totino o le latou Asosi.  Sa ta’ua foi e le Peresetene malolo le mana’omia o ni loia i totonu o le teritori, aemaise o ni loia e mafai ona fa’auauina le galuega, o le fa’aleleia atili o tulaga o le tulafono faapea ma faamasinoga tonu, i totonu o le teritori.

Na ia ta’ua le faalototeleina o le latou Asosi i tulaga ua o latou vaai iai, e pei ona sa faaleoina e polofesa po o faiaoga mai i le ASCC, le avea o lea polokalama sa faatinoina e le Asosi ma se a’oa’oga maoa’e mo fanau aoga.