Fesopoa’i saunoaga a ni isi o Faipule i le taimi iloiloga a le Komiti

Na fesopoa’i saunoaga a ni isi o afioga i Faipule i le taimi na faia ai se talanoaga puupuu a le Komiti o le Puipuiga o le Saogalemu Lautele i le taeao ananafi, e talanoaina ai suiga a le komiti i le tulafono lea sa talosagaina e le faigamalo a Lolo ma Lemanu, e tu’u atu ai le malosi i le Ofisa o lo o Puipuia Aia tatau o tagata e a’afia i le gasegase o le tino ma le mafaufau (OPAD), e mafai ai ona latou fa’asalaina ave ta’avale e maua a latou ta’avale o lo o paka i avanoa ua fa’apitoa mo tagata e i ai manaoga fa’apitoa o le tino e paka ai a latou ta’avale.

O le vevesi na tula’i mai ina ua fa’alavelave le afioga i le ali’i faipule ia Fatulegae’e Palepoi Mauga, i le saunoaga a le afioga i le tama’ita’i faipule ia Vui Florence Saulo.

I le mae’a ai o le folasaga a le afioga i le ta’ita’i komiti ia Manumaua Wayne Wilson e fa’amalamalama ai suiga e tatau ona talanoa i ai le komiti, na fa’atula’i ai loa e le afioga i le ali’i faipule ia Vesi Talalelei Fautanu Jr suiga, ina ia aveese mai le ofisa o le OPAD mai lo latou tu’uina atu o ticket i ave ta’avale e solia le tulafono, ae tu’u tasi pea le galuega i le Ofisa o Leoleo mo le fa’amalosia o mataupu tau soligatulafono i luga o le alatele, o le latou matafaioi tausi lea i lalo o le tulafono, lea fo’i na vave ona fa’alua e le to’atele o faipule le mau.

E ui ua mae’a ona fa’alua e le komiti le mau mo suiga e pei taua, ae na finagalo lava le afioga ia Manumaua e tu’u pea le avanoa i le afioga ia Vui mo lana saunoaga, ona ua leva ona si’i atu lona aao.

E le i lagolagoina e Vui suiga ua faia e le Komiti, ina ia aveese mai ai le malosi lea ua tu’u atu i le ofisa o le OPAD latou te fa’asalaina ai ave ta’avale e solia le tulafono.

Saunoa le tama’ita’i faipule e fa’apea, e i ai le mafua’aga na ala ai ona finagalo le faigamalo e fa’aulu le tulafono taua lenei, ona o le manatu ia mafai e le Ofisa o le OPAD ona fesoasoani i Leoleo i le fa’amalosia o le tulafono.

“E le o i ai tui valea i le faigamalo, o lo o manino le tulafono, o le vaega e fai e le OPAD, o le fesoasoani lea i Leoleo i le fa’amalosia o le tulafono, ona o lo o tele fo’i isi tulafono e le mafai ona fa’amalosia i le taimi nei, e mafua mai e le o lava leoleo, o le mafua’aga autu lena o le tulafono lenei, se’i tau saili se fofo ma se fesoasoani, e to’atele naua tagata e i ai manaoga fa’apitoa o le tino ma le mafaufau o lo o alala i lo’u itumalo, ma ua talafeagai ai le tulafono lenei”, o le saunoaga lea a Vui, ae fa’auilavea loa le afioga i le ali’i faipule ia Fatulegae’e ma ia talosaga i le ta’ita’i komiti e fa’amuta le saunoaga a Vui ae aloaia loa le mau.

“Aua e te fa’alavelave, onosa’i mai le sui lea, o a’u lea o lo o i ai le avanoa”, o le saunoaga lea a Vui ia Fatulegae’e, ae na tali ia Fatulegae’e, “lau afioga i le ta’ita’i komiti, ua tatau ona fa’amuta le saunoaga a le sui lea, o lea ua mae’a ona pasia le mau”.

Na toe saunoa Vui ia Fatulegae’e e fa’apea, “fa’amolemole lau afioga i le ta’ita’i komiti, fautua i le sui mamalu lea e taofi lona le mafaufau, ua tele naua lou le mafaufau, fa’atoa uma nei lava fo’i ona a’oa’i oe ae e te le iloa lava le mea e fai”, o le saunoaga lea a Vui na toe tali mai ai fo’i Fatulegae’e e fa’apea, “aua fo’i e te le mafaufau, ma aua le fa’avalevalea le gutu o oe”.

Na fa’aoloolomaau le afioga ia Manumaua ia Fatulegae’e, ina ia taoto atu lona fa’atuatuaga i le ta’ita’i komiti mo le fa’afoeina o le iloiloga a le komiti.

E fesopoa’i saunoaga i le va o afioga i faipule, ae o le taimi lea ua vaaia ai le to’atele o ni isi o tagata faigaluega o le Fono Faitulafono ua lolofi mai ma laulaututu i isi vaega i totonu o le maota o sui, ma fa’alogologo i saunoaga o lo o felafoa’i a afioga i faipule, ae o le taimi fo’i lea o lo o tu’u alalo atu pea le to’atele o afioga i faipule matutua aemaise ai le sui fofoga fetalai i faipule e to’alua sa vevesi, ina ia lava le tofa ma le fa’autaga e fa’ato’ato’a ai galuega a le komiti.

I le mae’a ai o le vevesi i le va o faipule, na fautua ai loa le sui fofoga fetalai ia Fetu Fetui Jr ina ia “maua pea e afioga i faipule le loto maualalo ma le onosa’i, o le losilosi o le mea a le tiapolo”.

O le taeao nei lea ua fa’amoemoe e tu’uina atu ai le tulafono a le maota o sui mo lona faitauina fa’alua, fa’atasi ai ma suiga e pei ona pasia i le aso ananafi, o le aveese lea o le malosi sa manatu le malo e tu’u atu i le Ofisa o le OPAD latou te tusia ai ticket mo ave ta’avale e le usitaia le tulafono.