Fesoasoani le Kalapu a le Liona i polokalama faitasu tusi i le teritori

Ua galulue fa'atasi nei le Kalapu a le Liona i Pago Pago, le faletua o le Kovana Sili, Cynthia Malala Moliga, ma le Aoelua Family Reading Program lea sa fa'aa'e i le tu'uaga umi o a'oga i le tausaga ua mavae, ina ia fa'aleleia atili le polokalama faitau tusi i lenei fo'i taumafanafana ua to'ai taunu'u mai i ai.

O le fa'amoemoe ua i ai nei o le Matagaluega o A'oga, ia toe u'una'i le faitau tusi ina ia to'aga i ai le fanau e faia. O le aoga e le tau fa'amatalaina, aua e lelei ai le olaga a'oa'oina o fanau i le faitau ma le malamalama lelei o tala ua latou faitau i ai i le gagana peretania.

O nisi o fanau, ua faitau fo'i i le Gagana Samoa, ae ua le malamalama lelei fo'i i ai, ona ua le tautala ai i aso ta'itasi ma taimi uma.

Ona o su'ega uma e ao ina ulufale ai i a'oga maualuluga i fafo, e sailia lea i le gagana peretania, o lea e ao ai ona fa'amalosi fo'i matua uma, ia faitau tusi latou fanau, faitau ma le malamalama atoatoa i tusitusiga ua faitau i ai.

"O le Kalapu a le Liona fa'avaomalo, o lo'o latou una'ia fo'i Polokalama Faitau Tusi e ta'ua o le ‘Reading is Fundamental to Education’ po'o le Faitau Tusi o le Fa'avae lea o le Olaga A'oa'oina! O lea la ua manatu ai fo'i le Kalapu i Amerika Samoa nei, o le a susu'e le itulau lea e i tatou, aua ua mautinoa lava, ua matua mana'omia ona una'ia mai le faitau tusi ia matua lelei mo tatou fanau laiti se'ia o'o i le vasega o talavou i totonu o a'oga maualuluga ma Kolisi fo'i,” o se tala lea a le tama'ita'i Peresetene o le Liona, Lisa Tuato'o.

O se saunoaga fo'i a le fa'atina o le atunu'u, Cynthia Moliga, sa ia saunoa ai e tusa o le so'otaga ma le Aoelua Reading Program ma le latou taumafaiga, "E mafai ona tatou una'ia fa'atasi le Faitau tusi, pe afai e tou te fa'ailoa atu i le atunu'u atoa le mana'oga tupito ua i ai nei, ia lelei le faitau tusi a fanau ma le malamalama a'ia'i i tusitusiga ua latou faitau i ai. Afai e te faia na'o sina potu la'ititi, ae le fa'atele le avanoa mo le to'atele o isi fanau uma i le atunu'u, e itiiti fo'i le fua e selesele mai i le taumafaiga."

Peita'i e le'i ave'esea ai le taua tele o le galuega ua amata mea ai lenei vasega o faia'oga o se 'au uso i latou, Aoelua/Fanene Sisters mai Nuuuli ma Afonotele.

"O le taumafaiga ua outou mafuli e faia, ua matua sili ona taua ia tatou fanau ua maua avanoa e faitau tusi ai, ma tusia ata o tala ua latou faitauina, e toe fa'ailoa mai ai so latou malamalamaga ua maua, talu ai ua faitau i le tusi. Mai lenei potu la'ititi o faitauga tusi, ua fa'alautele ai le lalolagi atoa o le atamai mo i latou ua auai,” o se isi lea fa'aopoopo a le tina o le atunu'u.

O le foa'i fo'i a le faletua o Cynthia Moliga e 500 tusi mo lea polokalama aoga. O lea foa'i e afua mai le fesoasoani mai le Rotary Club of Pago Pago lea sa latou fa'asoaina le 50,000 tusi mo atunu'u o lo'o avea le fa'aperetania ma gagana lona lua e faitau ai ma le malamalama i totonu o latou a'oga uma.

E ese mai lea foa'i taua a le Tina o le atunu'u, ua fa'apea fo'i ona fa'atupe e le Kalapu a le Liona le polokalama Faitau Tusi lenei a le Aoelua Family lea ua afuafua e fa'atino i Afonotele ia Iulai 2018, e fa'aleleia atili ai le faitau a le fanau i lena fo'i itu o le atunu'u.

E ese lea faitauga ma le latou Polokalama fo'i lea e fa'atautaia pea i Nuuuli i le Faletele o Fanene Aoelua lea sa tatala ai le polokalama faitau tusi lenei i le tu'uaga umi o a'oga i le taumafanafana 2017.

E ese mai nei nofoaga e lua, ua agaga fo'i le tama'ita'i Peresetene o le Liona i le taumafaiga lenei ina ia matua saoasaoa ma aoga i olaga taumafai o fanau talavou a Amerika Samoa, lea ua fa'aa'e ai fo'i lana Potu Faitau Tusi i le Laoa o Tuato'o i le afio'aga o Alofau, ma ua amatalia lea fa'amoemoe.

"O lea ua saosaoa le taumafaiga, ia le toe fa'atali tagata uma, o i latou e fia auai, fa'atino loa. O lo ua fa'atula'ia la'u potu faitau tusi, e le na'o matou fanau, ae mo so'o se tasi o fanau a'oga ua alaala i lea afio'aga ma afio'aga tulata atu i ai, e fia auai. Amata mai fo'i i le fanau iti se'ia o'o i a'oga maualuluga ma Kolisi lea fa'amoemoe. O le faitau tusi, ua mana'omia ona fa'aleleia atili,” o se tala lea a Tuato'o

O lea potu faitau tusi i le Tuato'o Family i Alofau, ua fa'atino lea e manatua ai pea le tama o Tautalatasi Tuato'o, o se tasi o faia'oga, ma sa avea fo'i ma Fa'atonusili o A'oga a le malo i ni tausaga ua mavae.

"Ou te manatua pea le agaga o lea tama, ia lelei le faitau tusi a i matou le fanau, ia fa'afaigofie ai ona malamalama i a'oa'oga o fa'atino e faia'oga, ae maise o le faitau ma le malamalama i so'o se mataupu aua o lo'o fa'aperetania lomiga uma o tusi e fa'aaogaina ai,” o  sana tala fiafia lea.

Ua fa'ailoa mai le lagona lea o nei sui iloga o le atunu'u, ua latou faia fo'i le faiva o le o atu i a'oga ua fa'atautaia ai polokalama "Faitau ma le Malamalama" ua latou fa'aalu so latou taimi e faitau ai i le fanau a'oga, ia fa'aosofia lagona fiafia e faitau tusi ia i latou le tupulaga o a taeao o le atunu'u.

O le pule a'oga i Fagaitua High ua ia fa'ailoa mai, "O se tasi o fa'atonuga ua tamau mai a le WASC, po'o le Komiti o Sailia Agava'a mo Fagaitua High, ua latou fa'ailoa mai ai - Ia fa'amalosi le una'iga o fanau ia iloa ona faitau tusi ma le malamalama i le gagana peretania. O lenei, o lea se lu'iga ua i o tatou luma, ia tatou taumafai fa'atasi e alo fa'atasi lenei fautasi, ‘Faitau ma le malamalama’."