Fesiligia Senatoa le to’atele o Pulenu’u e le o faia a latou galuega

Na fa’aaoga e afioga i Senatoa le avanoa na latou fesilafa’i ai ma le afioga i le Kovana o le Falelima i Sasa’e ia Alo Dr. Paul Stevenson i le taeao ananafi, e fa’aoo atu ai ni isi o a latou atugaluga i le le fa’amaoni o ni isi o Pulenu’u i le fa’atinoina o a latou tiute fa’a Pulenu’u, e ui o lo o totogi pea lava i latou e le malo.

O le afioga ia Alo ma le Pulesili o le Ofisa o le Pulega o le Eletise ma le Suavai (ASPA), afioga i le matua ia Utu Abe Malae, o molimau ia a le malo i le pili e fa’aopoopo ai Ofisa latou te fa’amalosia le tulafono o le fa’a lapisi, lea sa iloiloina i luma o le maota maualuga i le taeao ananafi.

O lagona o afioga i Senatoa e fa’atatau i galuega fa’atino a Pulenu’u, na amata mai ina ua talosaga le afioga a Alo i luma o le komiti a le senate sa iloiloina le tulafono, ina ia tu’u i ai ma le Ofisa o Mataupu Tau Samoa e atoa i ai le 7 o Ofisa o le malo latou te fa’amalosia le tulafono, ma tu’uina atu ticket i tagata e maua o fa’alapisi i vaega eseese o le atunu’u.

O Ofisa e 6 a le malo o le a fesoasoani i le Ofisa o Leoleo i le fa’amalosia o le tulafono e aofia ai le Ofisa e Puipuia le Siosiomaga (AS-EPA), Pulega o le Eletise ma le Suavai (ASPA), Matagaluega o le Soifua Maloloina, Ofisa o Alamanuia o le Sami ma le Vaomatua, Matagaluega o Paka ma Malaetaalo, ma le Ofisa o Leoleo.

Saunoa Alo e fa’apea, e taua tele le sao o Pulenu’u i le fa’amalosia o le tulafono lenei, ae le o manino i totonu o le tulafono le matafaioi tonu e tatau ona fa’atino e Pulenu’u, aemaise lava le malosi e tu’uina atu ai ticket i tagata e maua o soli le tulafono e ala i le fa’alapisi.

Saunoa le afioga i le ali’i senatoa ia Tuiasina S. Esera e fa’apea, o le tiute tauave o Pulenu’u uma i le atunu’u, o le fa’amalosia lea o tagatanu’u ina ia fa’amama totonu o nu’u, ae o le fa’afitauli ua maitauina i le taimi nei, to’atele naua Pulenu’u e le o fa’atinoina a latou tiute na mafua ai ona totogi i latou e le malo.

Na lagolagoina e le afioga i le ali’i senatoa ia Avegalio Aigamaua le finagalo o Tuiasina e fa’atatau i le fa’atamala o ni isi o Pulenu’u i le fa’atinoina o a latou tiute tauave.

Saunoa Avegalio e fa’apea, sa masani lava le tele o afioaga i le atunu’u, o le aso Lulu lava e fai ai galuega a nu’u e ta’ita’ia e Pulenu’u, mo i latou uma e le faigaluega, ona aga’i uma lea i uta e fa’amama auala galue ma fa’atino isi galuega lelei mo le fa’amatagofieina o nu’u ma afioaga, ae o aso nei, ua foliga mai ua “mata nanana” ni isi o Pulenu’u ma ua mumusu e toe fa’atino la latou matafaioi.

Saunoa atili Avegalio e fa’apea, na mafua ona totogi Pulenu’u, ina ia galulue e fesoasoani i aiga mo le fa’amamaina o nu’u.

Na ioeina e Alo le saunoaga a Avegalio e fa’atatau i le tatau lea ona galulue Pulenu’u e tusa ai o galuega ua tofia i latou e galulue ai.

“O le mea moni lava, e tutusa galuega a Pulenu’u ma isi uma tagata o lo o galulue i le malo mo le 8 itula, e totogi tagata faigaluega a le malo mo le fa’atinoina o galuega i le 8 itula, e tatau fo’i la ona galulue Pulenu’u mo le 8 itula i aso ta’itasi”, o le saunoaga lea a Alo, ma ia talosagaina ai le maota ina ia taoto atu le mataupu e fa’atatau i fa’aletonu o ni isi o Pulenu’u, o le a ia fautuaina ai le afioga i le Failautusi o le Ofisa o Mataupu Tau Samoa.

Na fesiligia e le Samoa News le afioga a Alo mo sana saunoaga e fa’atatau i Pulenu’u e le o fa’amaoni i le fa’atinoina o a latou tiute, e pei o Pulenu’u e le o nonofo i totonu o afioaga o lo o avea ai i latou ma Pulenu’u, ae o lo o fa’aauau pea ona maua a latou totogi, peita’i e le i mafai e le afioga i le Kovana o le Falelima i Sasa’e ona ia tali lenei fesili, ae sa ia fautuaina le fesiligia o le Kovana o le Falelima a Manu’a, atoa ai ma le afioga i le Maoputasi ia Mauga Tasi Asuega mo se fa’amalamalamaaga e uiga i lea mataupu.

Ae na taua e ni isi o tagatanu’u mai ni afioaga se tolu i le atunu’u i le Samoa News e fa’apea, talu ona tofia a latou Pulenu’u i lenei tofiga, e le o o atu lava e fa’atino ona tiute fa’a Pulenu’u i totonu o le afioaga, ae o lo o fa’aauau pea ona maua o latou totogi.

E ui i fa’asea e fa’atatau i le le fa’amaoni o ni isi o Pulenu’u i le fa’atinoina o latou tiute, ae na talosagaina e ni isi o senatoa le toe fa’aopoopo o ni Pulenu’u ma ni Leoleo mo a latou afioga, ona o lo o tele naua galuega e moomia le fia fa’atinoina.

O le afioga i le ali’i senatoa ia Gaea P. Failautusi ma le afioga i le ali’i senatoa ia Fuiava Avaloa na la talosagaina ni Pulenu’u ma ni Leoleo nu’u e fa’aopoopo mo la itumalo.

E pei ona manino i le paketi a le malo mo le tausaga tupe fou 2017, e ta’i $12,000 totogi o Pulenu’u i le tausaga, ae to’a 61 le aofa’i o Pulenu’u o lo o galulue mo afioaga ta’itasi uma i Falelima e 3 i le atunu’u, e aofia ai ma ni isi o afioga e ta’i 2 a latou Pulenu’u o lo o i ai.

O le vaiaso na te’a nei na pasia ai e le maota o sui la latou tulafono e fa’amalosia ai le fa’alapisi, ma ua taoto atu nei i luma o le maota maualuga mo sa latou fa’aiuga.