Fesiligia pea le mataupu e fa’atatau i “Rapiscan” a le malo

O se tasi o mataupu na fesiligia i le taimi o le iloiloga a le maota o sui ma le Teutupe filifilia a le malo, o le mafua’aga ua le mafai ai ona fa’aaoga masini “Rapiscan” ia na fa’atau mai e su’e ai uta o oloa mai fafo.

O le vaiaso muamua ina ua fa’atoa tatala galuega a le Fono Faitulafono, na fesiligia ai e le afioga i le ali’i faipule mai Aua ia Faimealelei A. Fu’e Allen le mataupu lenei, i le mafua’aga ua ta’atitia ai masini e le fa’aaogaina, ae faitau miliona ma miliona tupe a le malo na fa’aalu e fa’atau mai ai, ma le fa’amoemoe e fa’aaoga e su’e ai oloa mai fafo ina ia mautinoa e le o toe aumaia fa’anana i le atunu’u le tele o oloa mai fafo e aofia ai fualaau fa’asaina ma fana.

O le taeao o le aso Lua na te’a nei na fesiligia ai loa e Faimealelei le Teutupe filifilia o le malo ia Ueligitone Tonumaipe’a e uiga i lenei mataupu.

Na taua e Tonumaipe’a e fa’apea, o le aso Gafua o le vaiaso fou lea ua fa’amoemoe e taunu’u mai ai i le atunu’u ali’i inisinia o loo malaga mai fafo mo le fa’apipi’iina o vaega o masini e pei ona fesiligia.

O masini ia sa fuafua le malo e fa’atau mai, na toe fa’afo’i e le kamupani sa oka mai ai ma fa’atau atu i isi atunu’u o loo latou mana’omia vave nei masini mo le fa’aaogaina, ina ua maua e le kamupani ripoti ua le pasia le $10 miliona sa fuafua le malo e fa’atau atoa mai ai masini sa fuafuaina muamua.

Na fa’amanino atili e le Teutupe filifilia e fa’apea, i le maua ai e le ali’i kovana o fa’asea mai afioga i Senatoa i le tele naua o le tupe ua fuafua le malo e fa’aalu mo masini nei, ae o loo pagatia le falema’i i le fia maua o se tupe fesoasoani, na taofi ai loa e le afioga i le ali’i kovana ia Lolo Matalasi Moliga le fa’aaogaina o le $10 miliona e fa’atau mai ai masini - ae fesiligia muamua le pulega o le Falema’i i Faga’alu i se vaega tupe o loo latou mana’omia, ma fa’amatu’u atu ai loa e le malo le $2.9 miliona mai le tupe o le Pone e tali ai manaoga a le falema’i, ae fa’aaoga ai loa le tupe na totoe ai e fa’atau mai ai masini.

O le afioga i le ali’i faipule mai Manu’a #1 ia Vesi Talalelei Fautanu Jr na ia fesiligia le mafu’aaga ua le mafai ai e le malo ona totogi fa’amae’a tupe fesoasoani ua mae’a ona fa’atulafono mo Ofisa Tumaoti a le malo (subsidy).

Saunoa Tonumaipe’a e fa’apea, tusa lava poo tupe ua uma ona fa’atulafono, e fuafua le totogiina atu i tupe maua a le malo.

Afai e le lava tupe maua a le malo, e le totogiina fo’i se vaega o tupe ua uma ona fa’atulafono, ae ave le fa’amuamua a le malo i le totogiina muamua o isi manaoga taua e pei o le totogi o tagata faigaluega a le malo ma isi manaoga taua.

E mafua ona le lava tupe ao a le malo i ni isi o taimi e pei ona molimau le Teutupe filifilia, ona e fuafua lava i tupe o loo totogi e pisinisi ma tagata i le malo. Sa ia taua atili fo’i e fa’apea, e masani lava i tausaga uma le laititi o tupe e ao a le malo i le Kuata 1, ae fa’atoa feololo lava ma tele mai i le Kuata 2.

Na faamanino atili e le Teutupe filifilia ina ua fesiligia o ia e Faipule e fa’apea, soo se taimi lava e talanoaina ai tulaga tau tupe a le malo, o lana matafaioi o le puipui o le malo i le itu tau tupe, ma ia mautinoa e le mumu le paketi a le malo i le fa’aiuga o le tausaga tupe.

Na fa’afetaia e Faipule le Teutupe filifilia e tusa ai o lana tautua mo le malo i tausaga ua mavae, ma ua latou sauni fo’i latou te galulue fa’atasi i lenei nofoaiga a le Fono ua amatalia.