Fesiligia pea e ni isi Senatoa le mafua’aga o le Fono Fa’apitoa

O tulaga fa’aletonu e pei ona maitauina i le taimi o iloiloga a ni isi o Komiti a le maota maualuga i le taeao ananafi, ina ua le atoatoa atu molimau sa tatau ona oo atu mo le iloiloina o tofiga a le afioga i le ali’i kovana ia Lolo Matalasi Moliga, e pei ona filifilia ai i latou e avea ma totino o ni isi o Komiti Fa’afoe a Ofisa o le malo, na mafua ai loa ona fesiligia e ni isi o Senatoa le mafua’aga o ia fa’aletonu, atonu e mafua mai i le toe valaau fua o lenei fono fa’apitoa.

O le taimi o le iloiloga a le Komiti o Mataupu Tau Tulafono a le maota maualuga e fesiligia ai sui o le Komiti Fa’afoe a le Ofisa o Femalagaaiga, na maitauina ai le le atoa atu o totino o le Komiti, ina ua fa’atasi atu na o totino e to’afa, mulimuli ane fa’atoaa oo atu le isi sui e to’atasi e atoa i ai totino e to’alima a le komiti o loo i ai i le atunu’u, ae o isi sui e to’alua o loo malaga i fafo.

Na toe fa’aauau lea lava fa’aletonu ina ua valaau le iloiloga e fa’amaonia ai sui o le Komiti Fua Fanua sa tofia e le kovana, ae uma ane e na o le to’atasi le sui o lea komiti na oo atu, ae tusa ai o ripoti sa maua e ni isi o sui o le komiti a le senate, o le fa’aletonu i fesootaiga le mafua’aga o le le atoatoa atu o molimau i le taimi o le iloiloga.

I le iloiloga a le Komiti Fuafanuaa le malo, e na o le afioga ia Taulapapa Willie Sword na oo atu i le iloiloga, o le mafua’aga lea na fa’atula’i ai e le afioga i le ali’i senatoa ia Tuaolo M. Fruean le mau ina ia toe taoto le iloiloga seia aulia le aso Faraile.

Na fa’ailoa e Tuaolo i luma o le komiti le isi sui o le Komiti Fa’afoe Fuafanua sa valaau atu ia te ia i le taeao ananafi, ma fa’ailoa atu lona fa’atoa maua o le telefoni mai le ofisa o le Kovana i le taeao lava ananafi e fa’atatau i le iloiloga, i le taimi na usu mai ai e faigaluega, ma ua faigata ai ona toe alu i lona fale i Pava’ia’i e toe sui mai ona laei mo le iloiloga.

“O le fa’afitauli la lea o loo tupu, e le ona o lea ua valaau le fono fa’apitoa, ae foliga mai e to’atele naua tagata faigaluega o loo i luga ae leai ma se isi o fai sana galuega, e tatau ona logo vave le ofisa o le kovana e tusa ai o iloiloga e pei ona talosagaina, ina ia tusa ai ma tulafono o loo lima ta’ita’iina ai galuega fa’atino a le maota”, o le saunoaga lea a Tuaolo.

Saunoa le afioga i le ali’i senatoa ia Tuiagamoa Tavai e fa’apea, e i ai lona talitonuga ua mafua ona fa’aletonu le oo atu o molimau, ona o lea sa latou fa’afofoga ua taofia uma iloiloga a le maota maualuga seia aulia le masina o Iulai o le tausaga nei, pe afai ae toe a’e mai le fono i lana tauaofiaga lona lua o lenei nofoaiga, ae ona la o lea ua toe nofoia galuega a le fono, atonu o le mafua’aga lea o le le oo atu o isi molimau, ona ai ua malaga i latou i fafo, poo tuatuagia fo’i i ni galuega masani.

Na fa’ateia le maota ina ua si’isi’i i luga le si’ufofoga o le afioga i le ali’i senatoa matua ia Muagututia Tauoa ma ia fa’aleo lona le fiafia i tulaga fa’aletonu ia ua maitauina i iloiloga a komiti a le maota.

“E le matagofie i lo’u tagata matua le tulaga lea ua tula’i mai, ailoga o silafia e le ali’i kovana tulaga fa’aletonu e pei ona tula’i mai, o la’u la fautuaga, ave se tusi i le kovana e fa’ailoa i ai tagata sa ia tofia e le o oo mai i luma o le maota mo iloiloga, e foliga mai ua latou le amanaiaina le Fono, ae o le Fono lenei a le atunu’u, o lea fo’i sa tula’i mai i le iloiloga a le Komiti o Femalagaaiga na muamua atu, i le le atoatoa mai o molimau i le taimi o le iloiloga, ae sili ona fa’ailoa i le kovana tulaga fa’aletonu nei, ina ia silafia ai e le ta’ita’i o le atunu’u e le o amanaia e i latou sa ia tofia le Fono a le atunu’u, e le o se maota lenei o tamaiti e le fia sau lava lea molimau ua le sau, ua tupu soo lenei fa’afitauli, lona uiga afai e le taofia i le taimi nei e oo mai lava le iuga o le lalolagi o loo tupu pea”, o le saunoaga lea a Muagututia na lagolagoina e Alo Fa’auuga ma Satele Galu Satele, i le manatu mama o molimau i tofiga a le kovana atoa ai ma le va nonofo ma le Fono a le atunu’u.

Na fa’amanino e le afioga i le ali’i peresetene o le Senate ia Gaoteote Palaie Tofau e fa’apea, e ui ua mae’a ona faia le fa’aiuga a le maota maualuga e tolopo ai le faia o ana iloiloga mo tofiga a le ali’i kovana, seia aulia le masina o Iulai o le tausaga nei pe afai e toe a’e mai galuega a le Fono, e le mafai ai ona taofia le kovana mai lona fa’aaogaina o lona malosi i lalo o le Tulafono, na te valaauina ai le Fono Fa’apitoa pe afai na te silafia o loo i ai ni mataupu e tatau ona fa’amae’a ma talanoaina.

E pei ona manino i le fa’aaliga sa tu’uina atu e le afioga i le ali’i kovana i ta’ita’i o le fono, o lana ulua’i fono fa’apitoa e pei ona valaauina i le nofoaiga lona 35 lenei a le Fono Faitulafono, e amata i le aso 18 Aperila mo le umi e le silia i le 5 aso, mo le fa’apasiaina o totino o Komiti Fa’afoe a Ofisa eseese a le malo ua ia tofiaina, atoa ai ma le fa’amae’aina o ni isi o galuega a le Fono e mana’omia le fa’amae’aina.

O le kalena fou la a le senate mo ana iloiloga i le vaiaso nei, e aofia ai le iloiloga lea ua fa’atulaga i le itula e 8:00 i le taeao nei mo le fa’amaoniaina o sui o le Komiti Fa’afoe o le Falema’i, sosoo ai loa ma le iloiloga a le Komiti o Sikolasipi i le itula e 9:00, ae fa’ai’u i le iloiloga o le Komiti o le Litaea i le itula e 9:30 i le taeao lava a taeao.

O le aso Tofi lea ua fa’atulaga e fesiligia ai sui o le Komiti Faafoe o Fua Fanua a le malo i le itula e 8:00, sosoo ai atu ai ma le iloiloga a le Komiti o Aoga Maualuluga i le itula e 9:00 i le taeoa lava.

ILOILOGA KOMITI FA’AFOE AOGA MAUALULUGA

O le iloiloga a le Komiti o Aoga a le maota o sui i le vaiaso na tea nei, i lalo o le ta’ita’iag a le afioga i le ta’ita’i komiti ia Vaetasi Tuumolimoli Sane Moliga, ma totino o le Komiti Fa’afoe o Aoga Maualuluga na tofia e le kovana i le vaiaso na te’a nei, na fautuaina ai e ni isi o faipule sui o le Komiti ina ia silasila toto’a i le fa’afitauli o loo tula’i mai

E 12-0 le palota na pasia ai e le maota o sui sui e to’afa o le Komiti o Aoga Maualuluga na tofia e le Kovana, ina ua mae’a le iloiloga e fesiligia ai o latou agava’a, lea sa fa’atautaia e le Komiti o Aoga sa taitaia e le afioga i le ali’i faipule ia Vaetasi Tuumolimoli Saena Moliga.

O sui o le Komiti o Aoga Maualuluga ua pasia e aofia ai Moseniolo Viane Etuale, Dr. Annie Fuavai, Tauiliili Lauifi ma Rev. Dr. Siulagi Solomona.