Fesiligia molimau fa’atatau mau fa’amaonia i le tagi faasaga ia Siaumau

E na o le to’atasi lava le molimau a le malo na mafai ona fesiligia i le aso lona tolu o le fa’amasinoga autu a Thomas Siaumau o loo fa’agasolo i le taimi nei, o le tama’ita’i Leoleo lea ia Zenopia Jennings o loo vaaia le potu e teu ai mau fa’amaonia i le Ofisa o Leoleo.

O Jennings, ua 15 tausaga talu ona avea ma Leoleo a le malo, ae ua 4 tausaga talu ona tofia o ia e vaaia le potu e teu ai mau fa’amaonia a le malo.

E 8 moliaga o lo o tu’uaia ai e le malo ia Siaumau, o ia moliaga e aofia ai moliaga mamafa e 5 ma moliaga mama e tolu.

O tam’aita’i loia sili lagolago e to’alua o loo fai ma sui o le malo i lenei mataupu e aofia ai Christy Dunn ma Laura Garvey, ae o ali’i loia e to’alua mai le RDA Law Firm o loo tula’i mo Siaumau e aofia ai Richard deSaulles ma Daniel Holladay.

Na taua e Jennings i lana molimau e fa’apea, o le aso 15 o Tesema 2017 na logoina ai o ia e Leoleo sa gafa ma le suesueina o lenei mataupu, ina ia oo sauni ane i le Ofisa Autu o Leoleo i Fagatogo, mo le taliaina o mau fa’amaonia ua mae’a ona ao mai le nofoaga sa tula’i mai ai le fa’alavelave i Tafuna.

“O se tasi o o’u tiute tauave i lenei tofiga ua ou galue ai, o le mautinoa lea e malupuipuia ma saogalemu le teuina o mau fa’amaonia e aoina mai e Leoleo mai soo se fa’alavelave, ina ia mautinoa e oo atu i le aso o le fa’amasinoga o loo malu puipuiia pea i totonu o le potu o lo o teuina ai,” o le saunoaga lea a Jennings.

Soo se taimi na te tauaaoina ai ni mau faamaonia mai Leoleo sa gafa ma le suesueina o ni mataupu, ona ia auina atu loa lea o ia mau fa’amaonia ma teu i totonu o le potu faapitoa o loo teu ai. E leai lava se isi Leoleo e mafai ona ulufale i totonu o lea potu, e na o ia lava e mafai ona ulufale i ai, e na o ia fo’i e i ai le ki o le potu.

Mo mau faamaonia i le mataupu a Siaumau, na taua e le molimau e fa’apea, ina ua mae’a ona aoina ma faailogaina mau, sa tuuina atu loa e le tama’ita’i Satini ia Sgt. Jackie Lagai ia te ia le atigi pusa o loo teu uma ai mau faamaonia nei, ma ia teuina ai loa le atigi pusa lea i totonu o le potu faapitoa.

O mau faamaonia sa tuuina atu ia te ia e aofia ai pulu fana e le’i faapapaina, atigi pulu fana ua uma ona faapapa, o se kilipa o se fana sa i ai pulu fana e le’i faapaina i totonu, faapea ai ma atigi apa pia.

O ituaiga pulu fana ma atigi pulu fana sa maua e aofia ai le ituaiga o le 9mm ma le 7.62mm - 39mm).

O nisi o mau faamaonia sa maua mai i le mataupu a Siaumau, sa ia faailoa ma teu malu i totonu o se atigi pusa, ona momoli lea e se tama’ita’i Leoleo i le Ofisa o Leoleo i Honolulu mo le faia i ai o ni suesuega.

O le masina o Iulai 2018 na ave ai mau faamaonia i Honolulu mo le suesueina, ae o le masina o Oketopa o le tausaga lava lea na toe fa’afo’i mai ai ia te ia.

Na faamaonia e Jennings i luma o le vaega iloilo iuga, talu mai le aso na tauaao atu ai ia te ia mau faamaonia o le mataupu a Siaumau, e leai se taimi na ia tuuina atu ai nei mau faamaonia i lalo o se vaavaaiga a se isi Leoleo, ae sa malu puipuia uma lava i lalo o lana vaavaaiga.

O le potu faapitoa lava e tasi lea na teu ai mau faamaonia i le taimi na tauaao atu ai ia te ia ia Tesema 15, 2017, o le potu lava fo’i lea e tasi na teu malu ai mau faamaonia seia oo i le taimi na auina atu ai i Honolulu mo suesuega, lea fo’i na toe fa’afo’i mai ma toe teuina lava i totonu o le potu faapitoa lea.

Ina ua maua le avanoa o le loia a Siaumau e fesiligia ai le molimau, na fia malamalama ai le ali’i loia ia deSaulles, pe sa i ai ni aoaoga faapitoa na a’otauina ai o ia ina ia avea ma tagata faapitoa e teuina mau fa’amaonia a le malo.

Na taua e Jennings, e tele aoaoga sa aoaoina ai o ia, e pei o le taimi na faatoa avea ai o ia ma Leoleo, atoa ai ma isi lava aoaoga ina ua amata lana tautua fa’a leoleo.

Sa fia malamalama deSaulles pe aisea na ese ai le auala na taulimaina ai e Leoleo mau faamaonia o le mataupu a Siaumau, ma le auala latou te taulimaina ai mau fa’amaonia mai isi mataupu latou te suesueina, ae na tali Jennings e fa’apea, e tutusa uma lava auala na taulimaina ai e leoleo mau faamaonia o isi uma mataupu ma le mataupu fa’asaga ia Siaumau.

Na toe fesili deSaulles i le molimau poo a uma mau faamaonia na ave i fafo mo suesuega. Saunoa Jennings, o mau faamaonia sa auina i fafo e aofia ai pulu fana e lei faapapaina, atigi pulu fana ua uma ona faapa, o le kilipa o le fana, faatasi ai ma atigi apa pia sa maua i le nofoaga na tula’i mai ai le fa’alavelave.

Na fesili deSaulle i le molimau pe sa toe faafo’i uma mai mau fa’amaonia na auina atu i Honolulu mo suesuega, na tali le molimau, “o lea lava.”

Na fesili deSaulles pe na toe fa’afo’i mai atigi apa pia sa auina atu i Honolulu mo suesuega. E tau tali atu le molimau ae fa’auilavea le loia a le malo, ma i’u ina le taliina ai le fesili a le loia a le itu tete’e.

O le itula e 9:00 i le taeao nei lea ua fa’atulaga e toe fa’aauau ai taualumaga o lenei mataupu i luma o le fa’amasinoga maualuga.

O le afioga i le ali’i faamasino sili lagolago ia Fiti Sunia o loo gafa ma le fa’afoeina o lenei mataupu, ae lagolagosua i ai afioga i Fa’amasino Lagolago ia Mamea Sala Jr ma Tunupopo Alalafaga Tunupopo.