Fesiligia mafua’aga o le Pili a le malo e sui ai le Tulafono

Pago Pago - AMERIKA SAMOA

E to’atele afioga i Faipule sa latou fesiligia sui o le malo i le mafua’aga ua ala ai ona manatu le Faigamalo e sui le Tulafono mo tagata faigaluega, ina ia tuuina atu ai le malosi ma le faitalia i le Fa’atonusili o tagata faigaluega a le malo na te faia ai faaiuga e aunoa ma le toe i ai o se isi tagata na te faalavelaveina lana pule.

O le vaiaso na te’a nei na talanoaina ai i luma o le Komiti o le Faagaioiga o le malo le Tulafono poo le Pili tau faaofi a le faigamalo a Lemanu ma Talauega, ina ia fai se suiga i le tulafono ma avatu ai le malosi i le Faatonusili na te faia ai faaiuga mo le manuia o lana matagaluega aemaise tagata faigaluega a le malo.

O molimau na auai i le iloiloga, lea na taitaia a le afioga i le ali’i Faipule ia Vailiuama Steve Leasiolagi e aofia ai le Tamaitai Faamasino o Mataupu tau Pulega, Marie Alailima, o le Loia Fautua a le Kovana, Jason Mitchell ma le Faatonusili o Tagata Faigaluega a le malo ia Lynn Pulou-Alaimalo.

O le faaiuga o le iloiloga na pasia ai loa e afioga i Faipule le mau ina ia toe taatia le Tulafono, ae sei fesiligia muamua se finagalo o le Loia Sili ia Fainu’ulelei Falefatu Alailima Utu e faatatau i lenei tulafono, ona e tele itu o lo o atugalu ma fiamalamalama i ai afioga i Faipule.

Na taua e le Faatonusili o Tagata Faigaluega i lana folasaga e faapea, ua mae’a ona latou soalaupule ma Taitai o le malo atoa ai ma Loia e faatatau i lenei tulafono, ma ua ia lagolagoina le tatau lea ona faatino lea tulaga, ina ia faaleleia atili ai tulaga i tautua ma auaunaga mo tagata faigaluega.

Sa ia taua atili e faapea, ua ese fo’i taimi na fausia ai lenei tulafono i tausaga ua mavae, ese fo’i le tulaga ua i ai lenei vaitaimi, aemaise ai lava le tele o tulafono ua moomia le tatau ona suia ina ia penefiti ai tagata faigaluega o loo galulue i le malo.

Sa ia faamanino foi i luma o le Komiti lona tu’u fesili fo’i e faatatau i lenei tulafono, ma lona fesiligia o Loia fautua a le Kovana ina ia faamanino le aano tonu o le tulafono, ae ina ua manino i lana faalogo, sa ia manatu ai loa o se pili aoga.

Na teena e le Tamaitai Faatonusili nisi o finagalo e faapea, ua ia mana’o e avatu le pule ma le malosi’aga ia te ia na te faia to’atasi ai faaiuga e faatatau i tagata faigaluega a le malo. I lona talitonuga, e le o le agaga lena o le tulafono, aemaise ai fo’i, o lo o manino le Tulafono, o le kovana lava na te aumaia le faaiuga mulimuli mo soo se mataupu e faatatau i le faigamalo.

Na taua e le ali’i Loia Fautua a le kovana ia Mitchell e faapea, o le agaga atoa o le tulafono e pei ona tuuina atu i luma o le Fono, ia tuu atu ai le malosi i le Faatonusili o Tagata Faigaluega a le malo na te faia ai faaiuga mo le manuia o tagata faigaluega a le malo.

Ina ua fesiligia se finagalo o le afioga i le Tamaitai Faamasino, sa ia taua ai lona lagolagoina o le Tulafono Taufaaofi, e ui e leai se sootaga o lona Ofisa ma lenei Tulafono. Sa ia taua e faapea, o lo o manino le Tulafono i le Komiti Faafoe e fautuaina le Faatonusili mo ana faaiuga fai, peita’i o le tulafono lea, e atili faamautu ai tiute tauave o le Faatonusili i le va feagai ai ma le Komiti Faafoe.

O le Komiti Faafoe e pei ona fesiligia, o lo o faaauau pea ona galulue i le taimi nei - e to’a 8 ona sui o lo o i ai.

E le i lagolagoina e le Sui Fofoga Fetalai o le maota, afioga Fetui Fetu Jr le agaga o le Tulafono Taufaaofi a le faigamalo. Sa ia taua e faapea, o lo o lelei ma atoatoa le Tulafono o loo i ai i le taimi nei, atoa ai ma le malosi o loo i ai i le Komiti Faafoe latou te fautuaina ai le Faatonusili mo nisi o mataupu e moomia le faaleleia atili.

Na taua atili fo’i e Fetui e faapea, afai o lo o i ai le Komiti Faafoe o le latou galuega o le fautuaina lea o le Faatonusili mo ana faaiuga fai aua le manuia o tagata faigaluega, aisea la ua manatu ai le faigamalo e tui le tulafono o loo lelei ma atoatoa, ae tu’u tasi atu lava le malosiaga i le Faatonusili na te faia to’atasi ai faaiuga?

Na faamanino e Mitchell, e le o i ai se Taitai o le Komiti Faafoe latou te fautuaina le Faatonusili i le taimi nei, o le Faatonusili, o ia lea o le Failautusi o le Komiti Faafoe.

“E le o manino lelei lo’u mafaufau i le agaga o le Tulafono Taufaaofi lenei, ona o lea e fai mai le Tulafono, e avatu le malosi ia te oe e te faia ai faaiuga, ae o lea o loo i ai le Komiti Faafoe o le latou matafaioi lea i lalo o le Tulafono, o le faia o faaiuga e manuia ai tagata faigaluega a le malo,” o le saunoaga tu’u sa’o lea a Fetui i le Faatonusili o Tagata Faigaluega a le malo.

Sa ia taua atili fo’i e faapea, e le mafai ona palota ioe i le Tulafono Taufaaofi, se’i vagana ua malamalama atili lona mafaufau i le mafua’aga tonu lava ua manatu ai le faigamalo e sui le tulafono.

Na lagolagoina e le afioga i le ali’i Faipule mai le Itumalo o Tualauta ia Larry Sanitoa le finagalo o le Sui Fofoga Fetalai. 

Saunoa Sanitoa e faapea, o loo manino i le Ulutala 4 ma le 7 o le Tulafono Toe Teuteu a Amerika Samoa, le tuu atu o le malosi i le Faatonusili na faia ai soo se faaiuga mo le manuia o tagata faigaluega a le malo. E le o manino la i lona mafaufau i le mafua’aga e ala ai ona toe manatu le malo e sui le Tulafono.

O lo o manino fo’i i le Tulafono o loo i ai nei tiute tauave o le Komiti Faafoe Faufautua, latou te fautuaina le Faatonusili mo faaiuga e manuia ai tagata faigaluega a le malo.

Sa naunau le afioga i le ali’i Faipule ia Sanitoa e fia malamalama i le mafua’aga autu ua ala ai ona manatu le faigamalo e faia se suiga i le Tulafono o loo i ai nei o loo lelei ma atoatoa.

Na tali le alii Loia ia Mitchell, o le Tulafono Taufaaofi, ina ia mafai ai ona faaleleia atili le auaunaga a le Faatonusili o Tagata Faigaluega a le malo, ma maua le malosi na te faia ai faaiuga mo le manuia o tagata faigaluega a le malo.

Na faauilavea Fetui ma ia saunoa e faapea, o lo o i ai le malosiaga i le Faatonusili na te faia ai faaiuga i le Tulafono o loo i ai nei.

Na toe faaopoopo atu le afioga a Sanitoa ma ia taua e faapea, o le suiga e pei ona tuuina mai e le malo, o le a faaleaoga ai loa le tiute na filifilia ai le Komiti Faufautua mo tagata faigaluega e pei ona faatulaga mai i lalo o le Tulafono.

Saunoa le afioga i le ali’i Faipule ia Avagafono Tuavao Vaimaga Maiava e faapea, na te lagolagoina le tulafono, pau le itu e mana’omia, ia toe faamanino atili ma tuu atu nisi mafua’aga tatau e ala ai ona manatu le malo e faatino lenei suiga i le tulafono.

E le i lagolagoina e le Faipule mai Manu’a #1, afioga Alumamalu Filoiali’i Ale le agaga o le Tulafono Taufaaofi. Sa ia taua e faapea, afai o le Tulafono o loo i ai, e na o le Fono Faitulafono latou te fausia tulafono, aisea la ua manatu ai e tuu atu le malosi i le Faatonusili na te faia ai tulafono mo tagata faigaluega a le malo?

Saunoa le isi Faipule mai Manu’a #2, afioga Tiaolii Fau Sai, o lona popole o loo i ai i le Tulafono Taufaaofi lenei, o le a mafai ai e le Faatonusili ona faa faigaluega tagata mai fafo e le agavaa i lalo o le Tulafono ona galulue i le malo, atoa ai ma le toe faa faigaluegaina o tagata ua mae’a ona faamaonia i suiga lo latou faaaogaina o fualaau faasaina.

Saunoa le afioga i le ali’i Faipule ia Mike Asifoa e faapea, o lona popolega o loo i ai, ina ne’i avea le suiga o le Tulafono lenei ma auala e tele ai mataupu e faila i luma o le Fa’amasinoga o Mataupu Tau Pulega, ma aafia ai fua ma le malo.

Na lagolagoina e Fetui le finagalo o le afioga a Tiaoali’i ma ia taua ai e faapea, e i ai nisi o tagata na faamaonia i suega lo latou faaaogaina o fualaau faasaina, a o lea ua toe faa faigaluega e le malo. Sa ia taua e faapea, e le o se tulaga lelei lea i lana vaavaai, o le mafua’aga fo’i lea e ala ai ona ia le lagolagoina le Tulafono Taufaaofi e pei ona talanoaina.

Na faailoa e Fetui ia Pulou Alaimalo lona sauni e ta’u atu le igoa o se tasi o tagata o loo aafia i le faafitauli lea. Sa ia fautuaina malosi le Tamaitai Faatonusili ina ia fai le amiotonu ma faatino lana galuega a le faamaoni e ala i lona usitaia o le tulafono.

Saunoa Pulou Alaimalo, o le tiute tonu lava lea a lona Ofisa, ia mautinoa e le toe faigaluega le tagata ua faamaonia se solitulafono mamafa poo le faamaonia foi i suega lona tagofia o fualaau faasaina.