Fesiligia Loia mafua’aga ua umi ai ona toso mataupu a Siaumau

Ua fesiligia e le ali’i Loia ia Richard deSaulles le mafua’aga ua ala ai ona toso toso umi e le malo le fa’agasoloina o le mataupu fa’asaga i le ali’i o Thomas Siaumau.

Na taua e le susuga a deSaulles e fa’apea, o lea ua silia i le 10 masina talu ona faila e le malo le tagi fa’asaga ia Siaumau i luma o le fa’amasinoga, a o lenei lava e lei maua e le latou itu se ripoti e uiga i lenei mataupu.

O le vaiaso na te’a nei na toe valaau ai le mataupu a Siaumau i luma o le Fa’amasinoga Maualuga.

Ina ua valaau le mataupu, na vave lava ona talosaga le loia a le malo ia Woodrow Pengelly e finau i le Fa’amasinoga, mo se avanoa e toe tolopo ai le mataupu a Siaumau mo se isi 30 aso, se’i fa’atali le taunu’u mai o mau fa’amaonia sa auina atu i le Fale Suesue a le DEA (Drug Enforcement Administration) i Kalefonia.

Na taua e Pengelly e fa’apea, i le iloiloga sa faia i lenei mataupu i ni nai masina ua mavae atu, sa fa’ailoa ai e le malo le tauaao aloaia lea e tagata suesue faapitoa o le DEA mau faamaonia uma sa auina atu i Amerika Samoa nei e fa’atatau i lenei mataupu.

O le taimi nei, o lea ua fa’amaonia mai e se sui sooupu o le DEA, lo latou tauaao aloaia lea o mau faamaonia sa auina atu, ma ua amata ona fa’agasolo a latou suesuega e fa’atatau i nei mau faamaonia.

Sa ia talosagaina le Fa’amasinoga ina ia talia le talosaga mo se avanoa e toe tolopo ai le iloiloga o le mataupu a Siaumau, e fa’atali ai le toe fa’afo’iina mai o mau fa’amaonia o loo i ai i Kalefonia i le taimi nei.

Na matua tete’e malosi le loia a Siaumau i le talosaga a le malo.

Na taua e deSaulles e fa’apea, na amata mai lava i le masina o Ianuari o le tausaga nei o latou talosagaina le malo ina ia fa’asoa atu mau faamaonia o lenei mataupu, e aofia ai ma le ripoti a Leoleo.

E oo mai lava i le taimi nei, e leai ma se ripoti ua latou tauaaoina e uiga i lenei mataupu. E oo lava fo’i i ni mau faamaonia e lagolago ai le latou tagi, e leai ma se mea ua tauaaoina e le itu tete’e.

Na taua atili e deSaulles e fa’apea, o le tagi fa’asaga ia Siaumau, o loo faavae i luga o faamatalaga a ni molimau se to’alima e aofia ai ni fanau e laiti i lalo o le tulafono. E oo mai fo’i i le taimi nei, e le o iloa e le itu tete’e poo ai nei molimau.

“E mamafa molimau o lo o tu’uaia ai e le malo ia Siaumau. O ni isi o ia moliaga e aofia ai le moliaga A o solitulafono mamafa, ae oo mai lava i le taimi nei, matou te lei mauaina lava se laupepa se tasi o se ripoti a Leoleo,”

Saunoa deSaulles e fa’apea, afai e talia e le fa’amasinoga le talosaga a le malo, e sili ai loa ona tuu mai e le Fa’amasinoga se tapula’a e fa’amuta ai le tuuina mai e le malo o mau faamaonia faasaga i lenei mataupu. Afai e oo atu i lena aso faatapula’a e le i mafai lava e le malo ona tuuina mai a latou mau fa’amaonia, ona vaavaai loa lea o le itu tete’e i se isi a latou gaioiga e faia.

Na fautua e le afioga i le ali’i Fa’amasino Sili ia Michael Kruse le susuga a deSaulles, e sili pe a faila sana talosaga tusitusia i le fa’amasinoga, ina ia mafai ai ona aloaia lana fa’afinauga.

O le iloiloga sa faia i le masina o Me o le tausaga nei, na taoto atu ai i se faaiuga a le fa’amasinoga se talosaga sa faila e le malo, e taofia ai le fa’ailoaina o igoa o molimau a le malo, se’i vagana lava ua oo i le aso o le fa’amasinoga autu.

E mafua lea tulaga, ona sa taua e le malo e fa’apea, e tatau ona puipuia molimau mai le a’afia lea o lo latou saogalemu.

O lo o taofia pea Siaumau i le toese e aunoa ma se tupe e tatala ai o ia i tua, e fa’atali ai le isi ana iloiloga.