Fesiligia le “Tusi Fa’alupega” sa tuufaatasia e le Ofisa o Mataupu Tau Samoa

Pago Pago - AMERIKA SAMOA

Ua fa’atulaga se iloiloga a le Komiti o Mataupu Tau Samoa a le Maota Maualuga i le taeao nei, e fofogaina ai se molimau ma se fa’amatalaga mai le Ofisa o Mataupu Tau Samoa e uiga i ripoti e fa’atatau i le “Tusi Fa’alupega” o Amerika Samoa, ua o’o atu i potuaoga mo le fa’aaogaina e fanau aoga e ui lava i le tete’e ma valaau e le Senate ina ia aua ne’i tufaina le tusi, lea sa faia e aunoa ma faamaoniga ma upu mai ta’ita’i o itumalo eseese o le teritori.

O lea iloiloga na mafua mai i se talosaga a le afioga i le ali’i senatoa ia Soliai Tuipine Fuimaono i le tauaofiaga a le Senate i lee aso Faraile na te’a nei, lea na ia saunoa ai e uiga i le “Tusi Fa’alupega” ua saunia e le Ofisa o Mataupu Tau Samoa mo le tufatufaina atu ma na ia toe manatua ai le fa’aalia o le tete’e o le Senate i lea tusi.

Peita’i, na ta’ua e Soliai o ripoti o lo’o fa’ailoa mai ai ua mae’a ona aga’i i luma le malosi atoa o Mataupu Tau Samoa i le tufatufaina atu o le tusi. Fai mai a ia, sa tete’e afioga i senatoa i lenei tusi ona o atugaluga o le fa’amae’aina e aunoa ma le silafia ma le fa’atonuga a ta’ita’i fa’aleaganu’u mai itumalo eseese.

Fai mai a ia, sa tatau ona fesiligia ta’ita’i o le itumalo mo le sa’o o le “fa’alagiga” o itumalo ta’itasi. 

O le mea e sili atu ona mamafa ma taua i le taimi nei, fai mai Soliai, o le tusi ua tufa atu i aoga mo le faaaogaina e tamaiti aoga i aoaoga Samoa.

Ae o le mea lea e tupu ai le tele o fa’afitauli pe a le sa’o le fa’afeiloa’iga ma fa’alagiga a itumalo, e pei ona saunoa le afioga i le ali’i senatoa ia Ituau.

Na finau Soliai e tatau i ta’ita’i fa’aleaganu’u a itumalo ona tu’uina atu le fa’alupega sa’o ma talafeagai e lolomi i totonu o le tusi ma fa’aoga i totonu o aoga ae le o mea sa aoina e Mataupu tau Samoa.

Na ioe eing le afioga i le ta’ita’ifono o le Komiti o Mataupu Tau Samoa a le Maota Maualuga, senetoa Muagututia Tauoa le saunoaga a Soliai, i lona fa’apea mai, e le o malamalama fo’i o ia i mea o lo o fa’asalalauina i totonu o le tusi, ma o le Ofisa o Mataupu Tau Samoa ma le komiti fa’apitoa a le ASG e nafa ma le galuega o le tusi, e vala’au atu e tali fesili ma tu’u atu se fa'afouga.

O le Failautusi o Mataupu Tau Samoa ia Mauga T. Asuega o se tasi lea o molimau o lo o faamoemoe mo le iloiloga a le komiti a taeao.

O le lona lua o aso talu ona tauaofia le Fono Faitulafono lona 37 talu ai nei, ia Ianuari 11, 2021, na toe lagona ai e afioga i Senatoa na saunoa le afioga i le ali’i senatoa ia Tuiagamoa Tavai e fa’apea, ua ia fa’alogo ua mae’a le tusi lenei fa'alauiloa ma fa'aavanoaina e aunoa ma se fa'asoa mai nisi o ta'ita'i fa'aleaganu'u o le teritori.

Ma i le taimi o le iloiloga a le komiti a le Senate i lea taimi, ma mulimuli ane ai, na taua ai e ni isi o senatoa lo latou atugaluga i le faauigaina o le Tusi Fa’alupega, lea ua te’ena e ni isi o ta’ita’i fa’aleaganu’u, e le atoatoa pe le sa’o.

O le faaiuga o Ianuari 2021, na talosagaina ai e senatoa – e ala i se I’ugafono a le Senate – le afioga i le kovana sili Lemanu Peleti Palepoi Sialega Mauga faapea ai ma le Failautusi o Mataupu Tau Samoa ia Mauga T. Asuega ina ia toe aumai kopi uma o Tusi Fa’alupega po o vaega o le tusi fa’alupega po’o vaega o le tusi sa tuuina atu i le lautele.

O le i’ugafono sa talosagaina ai fo’i e le kovana, ma Mataupu Tau Samoa, ina ia maua le komiti sa vaaia le galuega o le tusi, ina ia taofia le toe fa’asalalauina o le Tusi Fa’alupega ma aumai tusitusiga uma e fa’amoemoe e fa’asalalau i le Senate mo le iloiloga, faasa’oga ma faamaoniga.

O le galuega o le tusi, o se fuafuaga a le faigamalo a kovana Lolo Matalasi Moliga, faatasi ai ma le faatupeina mai le Matagaluega o le Initeria a le fetarale na faalauiloa aloaia i le aso 31 o Tesema, 2020. Na faatonuina e le kovana sa i ai i lena taimi, Lolo Matalasi Moliga, le tuuina atu o kopi muamua lava o le tusi Edition i le Kolisi Tuufaatasi o Amerika Samoa ma le Matagaluega o Aoga a le malo e fa’aaoga mo faiaoga ma fanau aoga.