Fesiligia le mafua’aga maua ai Konekarate e tasi tele o galuega malo

Pago Pago, AMERIKA SAMOA

O le iloiloga a le Komiti o le Faagaioiga o le malo a le Maota o Sui i le vaiaso na te’a nei, na fesiligia ai e afioga i Faipule le mafua’aga ua tele ai galuega faatino a le malo ua tuuina atu i le Konekarate e tasi, ae ua le faasafua i isi uma Konekarate o loo pulea e tagatanu’u a Amerika Samoa.

Na taua e le Faatonusili o le Ofisa e Pulea Oloa a le malo ia Ti’amasunu Dr. Mikaele Etuale i lana molimau e faapea, o galuega uma lava a le malo o loo faagasolo le faatinoina i le taimi nei, na pasia ma faamaonia tauofoga i le tausaga na te’a nei, a o lumana’i ai le avea o ia ma Ofisa Sili o le Ofisa e Pulea Oloa a le malo i le tausaga nei.

Mai le aofaiga e $76 miliona o le tau mo galuega faatino uma lava o lo o faagasolo a le malo i le taimi nei, o le $61.8 miliona o nei galuega faatino ua maua e le konekarate e tasi o le Paramount Builders, ae o le $15.4 miliona o loo alu i isi konekarate uma i le atunu’u.

Na fesili le afioga i le tamaitai Faipule mai le Itumalo o Fofo ia Andra Tereise Samoa i le mafua’aga ua maua ai e le Paramount Builders le tele o galuega faatino a le malo ae le tu’u le avanoa i isi konekarate lotoifale e atina’e mai ai a latou galuega.

Na saunoa Ti’amasunu e faapea, e leai ma sana vaega na faatino i tauofoga o galuega e pei ona faagasolo i le taimi nei. O tauofoga uma mo galuega e pei ona faagasolo i le taimi neilona fausiaina na faatinoina uma lea i le nofoaiga ua mavae atu.

Na toe fesili Samoa poo fa’agasolo uma lava i le taimi nei galuega nei a le Paramount Builders. Na tali le susuga Ti’amasunu, “O lea lava.”

Na laga e le Sui Fofoga Fetalai ia Fetu Fetui Jr se tasi o mataupu e sili ona taua i tulaga o le fausia leleia o auala i le atunu’u. Saunoa Fetu e faapea, o se tasi o faafitauli ua maitauina, o le mae’a lea ona fausia se aualatele fou a le malo ae le umi lava ni nai vaiaso ae vaaia ua toe tipi se vaega o lea auala fou.

O le taimi lava e toe tipi se vaega o le auala fou sa fausia, e le mafai ona toe lelei ona o lea ua mae’a ona tipi ma ua le toe maua le malosi ma le lelei sa i ai i le taimi na faatoa mae’a ai ona fausia. E talitonu Fetu, e tatau ona silasila toto’a le malo i faafitauli faapenei ina ia taofia ai le faaletonu o galuega o auala i le taimi e mae’a ai ona fausia.

I lona talitonuga, o le isi lea mafua’aga e ala ai ona toe faaletonu galuega i auala tetele a le malo ma mafua ai loa ona faitio le atunu’u, ona o le toe ta tipi o vaega o le auala i le taimi e mae’a ai ona faata. Sa ia taua e faapea, e tatau ona mae’a muamua galuega e moomia le faatino ao lei faata le auala, e pei o le tosoina o paipa, uaea eletise faapea ai ma isi lava gaioiga e faia i le vaega o loo laasia e le auala.

Saunoa le susuga a Ti’amasunu e faapea, ua manino lava fo’i tulaga nei i le taimi e sainia ai le maliliega i le va o le malo ma le konekarate ua sauni e fausia le galuega. E pau lava i le malo tulaga faapea ona o i latou ia na faia maliliega ma konekarate sa fausiaina le auala.

O se tasi o galuega na fesiligia e le Sui Fofoga Fetalai o le galuega mo le toe faalolotoina o le Uafu i Faleasao, lea o loo faagasolo i le taimi nei lona faatinoina e le konekarate a le Paramount Builders i le aofa’i e $2.7 miliona.

Saunoa Fetu e faapea, o le autu tonu lava o le galuega mo le uafu i Faleasao, o le toe faalauteleina lea o le auala e ulufale atu ai le va’a i totonu, faapea ai ma le toe faalolotoina o le alava’a. O le faafitauli ua maitauina, o loo tuai le faagasoloina o le galuega ae o loo faaauau pea tulaga pagatia o le itumalo i Manu’a.

O le tulaga pagatia o le itumalo e pei ona saunoa Fetu, a oo i le taimi e le gafatia ai e le va’a o le Manu’atele ona ofi i totonu o le uafu pe a pe le tasi, ona taula lea o le va’a i tai i le moana ae fa’aaoga va’a alia e la’u ai uta ma tagata i uta i le uafu. O se faiga e le saogalemu ma ua tele fo’i tausaga o pagatia ai pea le itumalo.

Na faamanino e Ti’amasunu e faapea, o le galuega mo le uafu i Faleasao na pasia le tauofoga i le tausaga ua mavae, ao lei avea o ia ma Pulesili o le Ofisa. 

Na lagolago le afioga i le ali’i Faipule ia Vesiai Poyer Samuelu i le saunoaga a le Sui Fofoga Fetalai e faatatau i le tuai ona faagasolo o galuega tetele a le malo. Sa ia taua e faapea, o le galuega mo le fausiaina o le Uafu i Malaloa ua mae’a ona faia le sauniga e faapaia ai le eleele mo le amataina o le galuega, ao lea e le o aofia i le lisi o galuega o loo faagasolo a le malo i le taimi nei.

Na taua e Ti’amasunu e faapea, ua mae’a ona pasia le fausiaina o le galuega o le uafu i Malaloa, peita’i o le faafitauli e pei ona ia faalogo i ai, o loo faatali le pemita mai le feterale e faatino ai le galuega. O le pemita e tatau ona aumai e inisinia a le feterale o loo gafa ma le pasiaina o le fausiaina o galuega tetele.

Saunoa le afioga i le ali’i Faipule ia Faimealelei Anthony Fu’e Allen, o ia fo’i lea o le Taitaifono o le Komiti e faapea, o le galuega tonu lava lea a le Ofisa o Galuega a le malo, o le talosaga o pemita e faatino ai galuega tetele nei a le malo.

O le mataupu i le fausiaina o le uafu i Malaloa, na fesiligia fo’i e le afioga i le ali’i Faipule ia Vailiuama Steve Leasiolagi i se taimi o iloiloga a le Maota o Sui ma le Faatonusili o le Pulega o Uafu ma Taulaga, le susuga a Christopher King.

Saunoa Vailiuama e faapea, o lea ua mae’a ona pasia le alagatupe e faatino ai le galuega, ua mae’a fo’i ona fausia pou sima e tetele e 2 mo le amataina o le galuega, ae o le faafitauli ua tu le galuega ua le gaioi.

LISI O FANUA A AIGA MA LE MALO

O le isi mataupu sa fesiligia e Faipule i le iloiloga, o le mataupu i lisi o fanua a aiga ma le malo. 

I le ripoti na mafai ona tauaao mai e le susuga Ti’amasunu o loo taua ai le tele o fanua o loo lisi e le malo mo le fausiaina o ofisa atoa ai ma atina’e a le malo.

E silia i le $80,000 le tupe o loo totogi atu e le malo i masina taitasi mo le lisiina mai o fanua i nisi o aiga o le atunu’u i Tutuila ma le motu o Manu’a. Mai lea aofaiga, e silia i le $23,000 o lo o alu mo le totogiina o lisi o fanua i Manu’a i le masina e tasi, ae silia i le $58,000 o loo totogi atu mo lisi o fanua i Tutuila i le masina e tasi. 

Na fia malamalama le afioga i le ali’i Faipule ia Alumamalu Filoiali’i Ale pe moni faamatalaga e faatatau i le faafitauli o loo maitauina i lisi a le malo, e pei o le tala lea e le Sa’o o le totogi o le lisi mo le tausaga atoa i le taimi e tasi. E fia malamalama Alumamalu poo soli ai le tulafono i lenei ituaiga gaioiga.

Na faamaonia e Ti’amasunu le soli o le tulafono i le ituaiga gaioiga lea, ma o se gaioiga fo’i ua tele tausaga o faagasolo mai. 

O le faafitauli lea ua tele tausaga o faaauau mai pea ma ua i ai fo’i aiga ua aafia ai. Mo se faataitaiga e pei ona saunoa Ti’amasunu, e i ai aiga ua tala e le Sa’o o le aiga le tupe mo le lisi o le tausaga atoa, peita’i ina ua faafuase’i ona maliu le Sa’o o le aiga, o iina na faatoa iloa ai e le aiga atoa ai ma le Sa’o fou ua tula’i mai, e mae’a ona tala e le Sa’o ua maliu le tupe mo le lisi, ma tu ai loa le aiga i se tulaga faaletonu.

O le isi lea mafua’aga e ala ai ona tumu tumu tagata i luga o le Ofisa o le Kovana i le tele o aso e tau saili se avanoa e feiloa’i ai ma le Kovana, ona o le tuuina atu o a latou talosaga mo le talaina mai i tua o le tupe mo le lisi.