Fesiligia Faimealelei mafua’aga tuai ai ona fa’aaoga scanner

O le tauaaoina ai e le Fono Faitulafono o tusitusiga mai le afioga i le ali’i Kovana i le amataga o le vaiaso nei, e fa’ailoa mai le avea ma tulafono o le pili lea sa pasia e le Fono i le tausaga na te’a nei, e tu’u atu ai le malosi i Ofisa o le Tiute e su’e ai ma sili uta e ulufale mai i le atunu’u i luga o va’alele, va’a ma tagata e fa’aaoga ai masini fa’aonapo nei (X-Ray Scanners), na tula’i ai le afioga i le ali’i faipule ia Faimealelei Anthony Fu’e Allen ma fesiligia le mafua’aga ua tuai ai ona fa’aaoga masini ua silia i le 4 masina talu ona taunu’u.

Na taua e le afioga i le ali’i faipule mai Aua lona lagolagoina malosi o fuafuaga a le kovana ma le faigamalo, e fa’aaoga ai se vaega tupe tele e fa’atau mai ai masini nei e su’e ai oloa o loo aumai fa’anana i le atunu’u, aemaise fo’i i tulaga o fualaau fa’asaina, ae o le fa’afitauli ua tula’i mai, o lea ua taunu’u masini ae ua le fa’aaogaina.

“O le fesili e fia malamalama ai lo’u sui faipule, aisea ua atoa ai le 4 masina o ta’atitia masini i le Ofisa e le o fa’aaogaina, ae na mafua ona naunau le malo e vave pasia lenei tulafono ona o le manatu ia vave loa ona tu’u atu le avanoa e fa’atino ai galuega a le Ofisa”, o le saunoaga lea a Faimealelei.

Saunoa atili le ali’i faipule e fa’apea, ua ia maua ripoti e fa’atatau i le fa’afitauli o loo tula’i mai, e le tutusa le malosi o le eletise o lo o fa’aaoga i Amerika Samoa ma le malosi e tatau ona fa’aaoga i ai masini na aumai, o le mafua’aga lena o le fa’atuai ona fa’aaoga.

Sa ia talosagaina le sui fofoga fetalai sa ta’ita’ia galuega a le maota o sui i le taeao ananafi, afioga Fetu Fetui Jr ina ia silasila toto’a i le mataupu ua ia fa’aalia, ina ia mautinoa e vave faia i ai se fuafuaga.

O le vaiaso nei na fa’atoa tauaao aloaia ai e le Fono Faitulafono tusitusiga a le afioga i le ali’i kovana sa sainia i le aso 4 Oketopa 2016, e fa’ailoa ai lona sainia o le tulafono sa pasia e le Fono e avea ma tulafono.

I le sainia ai e le ali’i kovana o le tulafono sa pasia e le fono mo le fa’aaogaina o masini e su’e ai oloa mai fafo e avea ma tulafono, sa ia taua ai i lana tusitusiga sa tauaao atu i Ta’ita’i o le Fono lona fa’afetaia o maota e lua e tusa ai o lo latou naunau e fa’atino vave galuega o lo o galulue i ai le faigamalo, mo le fa’anaunauga ina ia vave ona pasia ae tu’u atu loa le avanoa i tagata faigaluega a le malo mo le fa’atinoina o a latou galuega.

Ua fautuaina e le afioga a Fetui Jr le ta’ita’i o le Komiti o Pulega o Uafu ma Malaeva’alele ia Kitara Vaiau ina ia silasila toto’a i le mataupu e pei ona atugalu i ai le afioga i le ali’i faipule ia Faimealelei.