Fesili ma Tali mo sui tauva o le tofi Kovana ma le Lutena Kovana

Pago Pago - AMERIKA SAMOA

O le lua vaiaso talu ai sa fa’atautaia ai e le Asosi a Loia o le teritori (ASBA), ia se Fonotele mo sui tauva o lo’o tausinio i le tofi Kovana ma le Lutena Kovana, aua le palota tele o lo’o loma nei ia Novema 5, 2024.

E lua itula o lenei fonotele sa faia, ma sa maua ai le avanoa e fa’afofoga ai le mamalu o le atunu’u i manatu fa’aalia, o lagona faapea ma fuafuaga fa’ata’atia a paga sui tauva e tolu.

E pei ona sa ta’ua i le tala na lomia i le vaiaso ua mavae e uiga i lenei mataupu, e 200 ni fesili sa aoina e le ASBA mai i le mamalu lautele, o ni mataupu o lo’o fia fa’afofoga iai le mamalu o le atunuu, po o fea o iai le tofa ma le fa’autaga a nei sui tauva.

Ae sa filifilia e le ASBA tau lava o ni fesili e 87, e fa’aaogaina i le lua itula.  Ma na’o le 12 fesili na mafai ona tali e sui tauva.

O le tamaitai loia ia Sharron Rancourt sa na fa’afoeina le polokalama o le afiafi.  O ia o se loia ua loa ona tautuaina le teritori ma ona tagata.  Ae o le Failautusi a le ASBA, ia Julia Furlong, sa fesoasoani, e ala i le mataituina o le taimi, po o le ta’i 2 minute, sa tu’uina atu i sui tauva, e tali mai ai a latou fesili.

FESILI MUAMUA:  O le toatele o tagata palota, e le o mautonu lava po o ai e palota ai, ma o lo’o latou tau saili ni mafua’aga maumaututu, po o ai le sui tauva e ao ona o latou filifilia.  O le a se mea e ‘ese mai ai lou sui tauva, mai i isi sui tauva?

TALI:  Ua talitonu sui tauva a Lemanu ma Laapui, o le le mautonu o nisi o tagata palota, o se tulaga lelei.  Aua e ta’u mai ai, o lo’o latou sailiili po o ai ua sili e na te ta’ita’i ina le atunu’u, i isi tausaga o i luma.  Na saunoa L&L, o palota i Samoa e tulaga ‘ese, aua o se tulaga e mamafa tele i tagata o le atunuu.  Ae a mae’a le palota, e toe fo’i lava Amerika Samoa, i le lanu e tasi.

Na fa’aalia e le tofa ia La’apui, lona fiafia tele o lo’o iai ni isi o lo’o fia tausinio mo nei tofiga ma o se fiafiaga ia te ia, lo la toe paga ma le afioga i le Kovana Lemanu, ina ia mafai ona fa’aauauina lenei galuega, e pei ona sa faia i le fa tausaga ua tuanai atu.

I le tali mai e le afioga Pula, mo le paga sui tauva a Pula ma Pulu (P&P), sa ia faapea mai ai “E le falala fua lau o le niu, ae falala ona o le matagi.”  Ma sa fa’aalia mai e Pula le mafua’aga ua o la manatu ai ma le faioga Pulu, e tausinio mo le tofi Kovana ma le Lutena Kovana, i lenei tausaga.

Na saunoa Pula le toatele o tagata ua o la talatalanoa ai, ua fa’aalia le le fiafia ma le manana’o ia iai se suiga i totonu o le malo.

Ma o le mafua’aga lea, e pei ona sa saunoa Pula, ua o la manana’o ai e ofoina mai le la tautua, ina ia mafai ona u’una’i aga’i i luma le teritori.

Na saunoa Pula, e le o fia faasinosino lima pe tu’ua’ia, ae o se mea lelei le suia o taitai.  Ma e mafau ona faia lea tulaga, ona o le alofa ma le agaga fia tautua i totonu o le tatou teritori, lea ua mafua ai ona a’e so la manatu, ina ia avea ma paga sui tauva, o lenei tausaga palota.

I le tali mai a le susuga ia Maefau Dr. Mary Taufete’e, o le mafua’aga ua ‘ese mai ai le la paga sui tauva, ona o lo’o ia i la’ua le poto masani e mafai ai ona u’una’ia le malo agai i luma, i le auala sa’o.  I se tulaga e mafai ai ona maua uma e tagata ia avanoa ma auaunaga tutusa.  

Na saunoa Taufete’e, o le a mafai e le paga a V&T ia ni suiga lelei, i totonu o le atunu’u, e taitaia i le alofa, loto gatasi ma le fa’amaoni.

Sa ta’ua foi e Taufete’e e faapea, o le a galulue malosi le la paga ina ia fa’amalosia ma fa’amautuina ia le tulafono, aua e leai seisi e sili atu i luga o le tulafono.

Na saunoa foi Taufete’e, e mafai e i la’ua ona aumaia le loto gatasi i tagata o Amerika Samoa ina ia mafai ai ona fausia lenei malo o se aiga, pe afai e tu tu faatasi ina ia faia se suiga.

FESILI LONA LUA:  O lo’o fa’aauau pea ona molimauina le fa’aitiitia o fuainumera o tagata i totonu o Amerika Samoa, ona o le to’atele ua faigamalaga atu ma fa’amautu i atunu’u i fafo, aemaise ai fanau talavou.  O le a sa lua fuafuaga ua fa’atulagaina e mafai ai ona iai ni galuega i totonu o Amerika Samoa, fa’aleleia tulaga o le soifuaga ma taumafai e taofi mai taleni ma le malosi o le atunu’u, e aofia ai tagata faigaluega i totonu o le malo?

O le avanoa muamua sa tu’uina atu i le ‘au sui tauva a P&P ma sa fa’amaonia e le afioga Pula le to’atele o tagata o le atunu’u ua faimalaga atu ma fa’amautu i atunu’u i fafo.

Sa saunoa Pula, o le malo, e tatau ona inivesi i pisinisi tua.  Na ia saunoa e faapea, o le taimi nei i le malo, ua pei o se ‘improper fraction’, ua tele le malo i le pito i luga, ae laititi le vaega a pisinisi tua, i lalo.

Na fa’aalia e Pula, i so’o se setete po o teritori, e fia mana’o e agai i luma, e tatau ona tele ia pisinisi tua, aua o iina e toatele ai tagata totogi lafoga.

Sa ta’ua e Pula, le tatau ona fa’atulagaina se fuafuaga e faia ai ni fefa’atauaiga, e le gata mo na o Samoa ae faapea foi isi motu o le pasefika.  

E le gata i lea, o le a’apa atu i le malo feterale mo se fesoasoani aua tagata faigaluega a le atunu’u, ina ia mafai ona aga’i i luma.

I le faasoa mai a V&T, na saunoa ai Vaitautolu, ua le o toe gafatia e le na o le malo ma kamupani i’a ona tauaveina ia Amerika Samoa.  Ma na ia fa’ailoa mai le iai o sa la fuafuaga ma Taufete’e e galulue ai ma pisinisi tua aua le gaosia o ni galuega ma fa’amalosia ai le tuputupu a’e o fefa’atauaiga.

Ua folafola mai Vaitautolu, o le a la atina’eina tulaga o fefa’atauaiga i totonu o le malo, galulue faatasi ma pisinisi laiti, nu’u ma pisinisi tua, ina ia mafai ona fa’alelei atili tulaga o le tamaoaiga.

Na saunoa Vaitautolu, ua tatau ona tagai i tulaga o aoaoga ma tu’u iai ni aoaoga (training) ina i mafai ona iai se tomai faapitoa mo tagata faigaluega.

I le manatu fa’aalia a le afioga i le Kovana Lemanu, e tusa ai ma lenei mataupu, sa ia saunoa ai, “O leisi mea e tupu, o le le malamalama i le Faigamalo ma le atunu’u.  E tele gaioiga a le malo na fai e ‘promote’ ai pisinisi laiti ae o le le lava o galuega e fai e pisinisi.  O le mea lena e manaomia ai le fesoasoani a le malo.  E taumafai ai e galue seisi o le aiga, ia iai se tamaoaiga mo aiga.”

Na saunoa Lemanu, o lea o le a mae’a le la fa tausaga, ma na la o mai ma le faamoemoe ua tele tele le malo, mae’a le la tausaga muamua, alu lona lua, ua la malamalama, ua fiu e taumafai pisinisi, e mafai.  Ana le si’ia totogi o le malo, e le si’ia totogi o pisinisi.

Sa ta’ua e Lemanu le iai o se finauga ma pisinisi, ina ia aua le si’ia totogi, ae sa le’i faatali ai le malo.

(O le a toe fa’aauauina atu i le tatou lomiga a taeao ia isi fesili ma tali.)