Fautuaina Senatoa auala e fa’aaoga tatau ai meatotino a le malo

O se tasi o mataupu na tele i ai fautuaga mai afioga i Senatoa, ina ua latou fesiligia agava’a ma tomai o le tama’ita’i foma’i ia Dr. Oreta Mapu-Crichton i le lua vaiaso talu ai, ina ua toe filifilia o ia e le afioga i le ali’i kovana ia Lolo Matalasi Moliga e avea ma Fa’atonusili o le Ofisa e Pulea Oloa a le malo, o le mataupu e fa’atatau i le fa’aaoga tatau lea o ta’avale a le malo e ana tagata faigaluega.

Na taua e ni isi o afioga i Senatoa le tele o ta’avale a le malo o loo i ai, peita’i e le o lelei ona fa’aaoga ma tausi e tagata faigaluega.

Saunoa le afioga i le ali’i senatoa ia Paepae Faiai e fa’apea, tele naua ta’avale a le malo ua vaaia le tutu ua le toe aoga, ae o le tele o ia ta’avale o loo tutu solo i fale inisinia tua, ma ua i ai ta’avale ua oo i le tulaga ua le toe aoga ae o loo tutu ai lava e leai se gaioiga e faia i ai.

Sa ia fautuaina le tama’ita’i foma’i ia Dr. Mapu-Crichton, i le tatau lea ona aumai ta’avale uma lava a le malo o loo tutu i fale inisinia i se nofoaga e malupuipuia, ona e ui ua fa’aletonu ta’avale nei, ae o ta’avale uma nei sa alu ai tupe a le malo e fa’atau mai ai, o ni isi o ta’avale ua amata ona tatala ese e tagata isi totoga, e oo atu i le taimi e taunu’u mai ai totoga sa oka i fafo ua le toe aoga le ta’avale i le tele o totoga ua ave ese.

“E foliga mai e to’atele naua le au fa’atautala o loo i ai i ta’avale a le malo, o le fa’aletonu ua maitauina i le taimi nei, e oo atu i le taimi e fa’atautu’i ese atu ai ta’avale a le malo i tagata tua, ua uma ona tatala ese le tele o totoga o ta’avale”, o le saunoaga lea a Paepae, ma ia toe fautuaina ai le tama’ita’i fa’atonusili ina ia silasila toto’a i ta’avale o loo fa’aaoga e Fa’atonusili o Ofisa eseese a le malo, ina ia mautinoa e tumau pea le ta’avale sa fa’aaoga e le fa’atonusili tuai ua mavae atu, ma le ta’avale e alu atu le fa’atonusili fou fa’aaoga.

Na lagolagoina e le afioga i le ali’i senatoa ia Fa’amausili Mau Jr le mataupu sa fesiligia e Paepae, e le gata i le fesuisuia’i o ta’avale e fa’aaoga e fa’atonusili, atoa ai ma le ave o ta’avale a le malo i fale inisinia tua.

Saunoa Fa’amausili e fa’apea, e le tatau ona ave fua ta’avale a le malo i fale inisinia tua, aua o iina lea e mafua ai ona tula’i mai ni isi o fa’afitauli i meatotino a le malo, ae tatau lava ona ave tasi uma ta’avale a le malo pe afai ae moomia ni galuega toe fa’aleleia i le nofoaga e i ai le fale inisinia a le malo.

“O le isi lea tulaga ua maitauina i le taimi nei, e alu atu loa le fa’atonusili fou e le mana’o i le ta’avale sa fa’aaoga e le fa’atonsuili tuai, ona talosaga fo’i lea o ia mo sana ta’avale fou, ae ua le fa’aaoga le ta’avale tuai o loo i ai, o isi na tulaga e tatau ona silasila toto’a i ai lau afioga i le tama’ita’i fa’atonusili”, o le saunoaga lea a Fa’amausili ia Dr. Mapu-Crichton.

Na fesili le afioga ia Alo Fa’auuga i le tama’ita’i fa’atonusili poo fea ua ave i ai le ta’avale lea sa fa’aaoga e le fa’atonusili sa muamua atu ia te ia, ae na tali le tama’ita’i fa’atonu, o le ta’avale lena o loo fa’aaoga e le Ofisa o le Kovana e la’u ai malo mai fafo.

I le fa’aiuga o le iloiloga, sa fautuaina ai e afioga i senatoa le tama’ita’i fa’atonusili ina ia faia se faitauga o ta’avale uma a le malo o loo i ai, ina ia mafai ai ona iloa tonu le aofa’i sa’o o meatotino a le malo o loo alu ai tupe a le malo e fa’atau mai ai.