Fautuaina Leoleo fou ina ia fa’amaoni ma tausisi i le tulafono

O se tasi o fautuaga sa tuuina atu e le afioga i le Lutena Kovana, Lemanu Peleti Mauga, i le fa’auuga o le Vasega 26 o Leoleo fou a le malo i le vaiaso na te’a nei, o le lapataia lea o i latou ina ia fa’amaoni i le galuega ma ia tausisi i le tulafono ua filifilia i latou e fa’amalosia.

Na fa’atumulia le fale taalo o Tupulaga i Pago Pago i matua, aiga ma uo o alii’ ma tama’ita’i e to’a 27 na fa’au’u mai i le Vasega lona 26 a le Matagaluega o Leoleo a le malo, i le mae’a ai lea o vaiaso e 10 sa a’otauina ai i latou i le tulafono.

O Ta’ita’i o le malo na auai e aofia ai le afioga a Lemanu, lea na fai ma sui o le Kovana, o le afioga i le Fa’amasino ia Mamea Sala Jr na gafa ma le fa’atautoina o leoleo fou, o le afioga i le Senatoa ia Tuaolo Manaia Fruean sa avea ma komesina o Leoleo i tausaga ua mavae, o le afioga i le Sui Fofoga Fetalai ia Fetui Fetui Jr, o se tasi sa avea muamua ma Leoleo a le malo, o le afioga i le Maopu ia Soliai Tuipine Fuimaono, o le tofa a Leseiau Laumoli, sa avea muamua ma Sui Komesina o Leoleo, ao lea ua avea ma Fa’atonusili o le Ofisa e Tete’e atu i faiga fa’asolitulafono, o iina fo’i lea o lo o aumai ai le alagatupe o lo o fa’atupeina ai totogi o leoleo fou ua fa’auuinanei, ma le afioga i le Loia Sili a le malo, Talauega Eleasalo Ale.

O le susuga Dr. Rev. Faafetai Fuimaono na taitaia le sauniga i se tatalo atoa ai ma le upu fa’amalosi e lu’itau ai loto o le Vasega Fa’au’u. Na faaautu le feau filifilia mo le Vasega Faauu i le manatu, “Faalogo i le si’ufofoga o le Atua.”

Saunoa Dr. Rev. Fuimaono e fa’apea, afai e fa’alogo Leoleo fou i le ta’ita’iga a le Atua ma latou usita’i i ai, ona fai lea auala e manuia ai la latou fa’amoemoe.

I le saunoaga faapitoa o le aso, na faailoa ai e le afioga a Lemanu i le Vasega Fauu le le mafai lea ona oo atu le afioga i le ali’i Kovana, tofa Lolo Matalasi Moliga mo le molimauina o le latou aso fiafia, ona o lo o auai atu o ia i le faauuga a le Kolisi Tuufaatasi a le malo.

Na taua e Lemanu le tele o fa’afitauli ma lu’itau o lo o fetaia’i ma Amerika Samoa i le taimi nei, e le gata i le fa’afitauli o le tagofia e tupulaga talavou o le ‘ava malosi ma fualaau fa’asaina, ae o le lu’itau fo’i i le taumafai lea o le malo e saili auala e foia ai le tele o fa’afitauli ua tutupu mai i le atunu’u.

Sa ia faailoa i le vasega faauu, o le latou tiute na mafua ai ona aoaoina i latou, o le faamalosia o le tulafono ma ia mautinoa e puipuia le saogalemu o tagata lautele uma o le atunu’u, ae sili ai i lo ia mea uma, o le mafutaga vavalalata lea ma le Atua i soo se taimi.

“O la outou galuega o le auauina atu lea i soo se tagata, puipuia le saogalemu o le atunuu, ae sili ai le faamalosia o le tulafono ina ia mautinoa e savavali tagata uma i le tulafono. O mataupu sa aoaoina ai outou i totonu o le potu aoga mo le 10 vaiaso, o le a avea lea ma a’upega e manuia ai la outou fa’amoemoe,” o le saunoaga lea a Lemanu.

Sa ia faailoa i le au fa’auu e fa’apea, o le a tele lu’itau o le a latou fetaia’i i le taimi o le galuega, ae iloa gofie le Leoleo ua fa’atumuina o ia i le poto, o le tulafono ma le meaalofa mai le Atua, e mafai ona ia fa’atino lana galuega ma le fa’amaoni.

Sa ia fautuaina i latou ina ia maua le alofa i tagata uma, fa’amuamua le aganu’u ma tautala ma le fa’aaloalo, a ia sili ai le mata’u i le Atua ma tausisi i le tulafono.

Mai le to’a 27 o le vasega fa’au’u, o le to’a 24 o i latou ua fa’au’u e avea ma Leoleo a le malo, to’a 2 sui o le Matagaluega o le Puipuiga o le Saogalemu Lotoifale (DHS), ma le to’atasi mai le sui o le Ofisa o Tiute a le malo.

LISI O LE AU FA’AU’U.

Iulio Afoa (DPS); Epitacio Aguimabag (DPS); Ropati Alefosio (DPS); Forrest Ali’ilua (DPS); Sabrina Amosa (DPS); Sosene Faiai (DPS); Iosefa Fanolua (DPS); Leelynn Himphill (DPS) ; Daniel Letuli (DPS); Toia Levao (DPS); Joseph Liu Kuey (DPS); Patricia Murillo  (DPS); Faavae Papatu (DPS); Tuluiga Salanoa (DPS); Talitiga Schwenke (DPS); Hana Seafa (DPS); Theresa Setu (DPS); Mose Simi (DPS); Tulutuluitao Taliga (DPS); Marieta Teletolio (DPS); Meaalofa Tiatia (DPS); Imelda Tumanuvao (DPS); Lee Vaouli (DPS); Fiatuina Wilson (DPS); Taotofi Leota (Customs); Ripine Leasiolagi (DHS) and Valerie Fuimaono (DHS).