Fautuaina afioga i Faipule ina ia tausisi i tulafono a le Maota

O le alia’e mai ai o ni isi o fa’aletonu i le fa’atinoina o galuega a le maota o sui i nai vaiaso ua tuana’i atu, na fautuaina ai loa e le afioga i le Sui Fofoga Fetalai o le maota afioga i Faipule, ina ia tausisi i Tulafono a le Maota o lo o fa’afoe ai le fa’atinoina o a latou galuega.

O ia tulafono e aofia ai le fa’aaloalo i le va o afioga i Faipule i taimi o iloiloga ma tauaofiaga, atoa ai ma ituaiga mataupu e tatau ona folasia i totonu o le maota. Sa fautuaina fo’i afioga i Faipule i lo latou va feagai ai ma le atunu’u i soo se taimi e fa’atinoina ai a latou galuega.

“E tatau i a outou afioga i Faipule ona fa’aalia amioga fa’aaloalo i taimi uma tou te saunoa ai i luma o le maota lenei, o iina e atagia mai ai le maualuga o le va feagai o le isi faipule i le isi faipule,” o le saunoaga lea a le afioga i le Sui Fofoga Fetalai ia Fetu Fetui Jr, o ia fo’i o le Ta’ita’i o le Komiti o Tulafono a le maota.

“O le fa’aaloalo, e le o se mea faatoa maua ina ua avea oe ma faipule, ae o le mea sa a’oa’oina mai ai tatou ao tatou talavou i totonu o aiga, nu’u ma itumalo. A faapea la e mana’o le faipule ia fa’aaloalogia o ia e tagata, e tatau i lea faipule ona fa’ailoa muamua atu ona uiga fa’aalalo i tagata ma le atunu’u.”

O le fautuaga a le afioga i le Sui Fofoga Fetalai, na tuuina atu lea ina ua mae’a ona fa’aalia e le afioga i le ali’i Faipule mai le Itumalo o Sua #1 ia Gene Luaitua Pan i le taimi o folafolaga a le maota i le vaiaso na te’a nei, se mataupu sa le fiafia ai i le auaunaga a le Ofisa o Fesootaiga a le malo (ASTCA).

Saunoa le ali’i Faipule ia Luaitua e fa’apea, o ia sa telefoni i le Ofisa o le ASTCA e fesili i ai i le mafua’aga ua motusia fa’afuase’i ai lana fesootaiga tau initaneti (internet) i luga o lana telefoni, peita’i o le itu na lagona ai lona le fiafia, ina ua tape mai e le tagata faigaluega a le ASTCA le telefoni ma fa’afuase’i ai ona motusia le la talanoaga.

Ae ina ua toe telefoni i ai i le tuana’i ai o aso e 2, sa fautuania ai loa o ia e le tagata faigaluega sa la talanoa e avatu lana telefoni se’i siaki ma vaai le mafua’aga o le motusia o lana internet.

“O le tali lea sa tatau ona latou aumaia ia te a’u i le taimi muamua sa ou telefoni atu ai, ae le o le tape mai o le telefoni,” o le saunoaga lea a Luaitua ma ia togi i lalo lana telefoni sa uu i lona lima. Sa ia talosagaina ai loa fo’i le Ta’ita’i o le Komiti o Fesootaiga a le maota, ina ia fa’atulaga se iloiloga e aami ai sui o le ASTCA se’i fesiligia i le mafua’aga sa tali mai ai faapea le tagata faigaluega i le taimi na valaau atu ai.

Na lagolagoina e le afioga i le ali’i faipule ia Gafatasi Afalava le finagalo o Luaitua, ma ia taua le tatau lea i soo se tagata faigaluega a le malo ona fa’aaloalo i afioga i Faipule, o i latou o sui filifilia o itumalo ta’itasi.

Saunoa Fetu e faapea, o iloiloga a komiti e valaau pe a i ai ni manaoga taua mo le manuia o le atunu’u, ae le o ona ua tula’i mai se manaoga faapitoa i se faipule poo se tasi fo’i o lona aiga.

Sa fautuaina e Fetu le afioga i le ali’i faipule ina ia lava pea lona onosa’i, ae le tatau ona fa’ataunuuina le iloiloga ona o se fa’aletonu sa tula’i mai i lana telefoni.

I le tulaga o le va fealoa’i o afioga i faipule, sa toe fautuaina ai e Fetu le tatau lea ona faamamalu saunoaga e lafo i totonu o le maota i taimi o iloiloga atoa ai ma taimi o tauaofiaga. Sa ia toe faamanatu i afioga i faipule, ua i ai aulape ua mae’a ona faataoto i tulafono a le maota.

Na lagolagoina e le afioga i le ali’i faipule ia Larry Sanitoa le saunoaga a le Sui Fofoga Fetalai i tulaga o le fa’amalosia lea o tulafono a le malo.

Saunoa Sanitoa e faapea, ua maea ona taoto i luma o le maota le iugafono sa faaulufaleina mo le toe teuteuina o Tulafono a le maota, peita’i e le o i ai lava se tulaga e atagia mai ai se galuega e fa’atinoina i lea iugafono.

“Ou te talitonu lava e aoga le iugafono lea ua faaulu mo teuteuga i Tulafono a le maota, ma ua tatau fo’i ona tuuina mai lea iugafono e talanoaina e le maota, pe afai ua leai ni galuega a le maota e fa’atinoina i nai vaiaso o loo totoe o la tatou nofoaiga,” o le talosaga lea a Sanitoa.

O teuteuga i le iugafono mo Tulafono a le maota e pei ona saunoa Sanitoa, e le gata o lo o fa’amanino mai ai tulaga i galuega fa’atino a komiti ma afioga i faipule, ae o lo o fa’amanino mai ai fo’i le tulaga o le fa’asalalauina tu’u sa’o lea o tauaofiaga a le maota i luga o le alaata fa’asalalau a le malo, le KVZK-TV.

O le mataupu i le fa’asalalauina o tauaofiaga a le maota, o se tasi lea o mataupu ua leva ona lalafo i ai ni isi o faipule mai le tele o nofoaiga talu ai, mo se avanoa lea e mafai ai ona fa’asalalau tuu sa’o galuega a le Fono ina ia mafai ai e le atunu’u ona fa’afofoga i galuega fa’atino a faipule.

I le vaiaso na te’a nei, na laga ai e le afioga i le Sui Fofoga Fetalai le mataupu lenei e faatatau i le auala o lo o fa’atino ai e le au fa’asalalau a latou tusitusiga i nusipepa ma leitio e tusa ai o taualumaga o galuega a le maota.

Saunoa Fetu e fa’apea, e lagona lona fa’anoanoa ona o le auala o lo o fa’atinoina ai e le leitio o le KHJ Radio ana fa’asalalauga, ona e na o le to’alua lava faipule o lo o fa’asalalau a la mataupu, o le faipule lea ia Larry ma Andra Samoa, ae fa’atuatuana’i le tele o isi mataupu taua o lo o laga e le to’atele o faipule o le maota.

Saunoa Sanitoa e fa’apea, o le taua lena o le iugafono lea ua i luma o le maota e toe teuteu ai Tulafono a le maota, ona o le isi lea mataupu o lo o faamamafaina ai, o le fa’asalalauina tu’u sa’o lea o taualumaga o galuega a le maota o sui.

Na fautuaina e le afioga i le Fofoga Fetalai ia Savali Talavou Ale le maota, ina ia fa’atino pea galuega mo le manuia o le atunu’u. Sa ia taua e fa’apea, e le taitaia galuega a le maota i ripoti a leitio ma nusipepa, ae o le maota e ta’ita’i i tulafono ua mae’a ona pasia ma fa’ataoto e le Fa’avae o Amerika Samoa.