Fautua Faipule i le ASPA e saili auala e faataugofie ai tau o le eletise

Pago Pago - AMERIKA SAMOA

Ua tuuina atu se fautuaga malosi mai afioga i ali’i Faipule o le Maota o Sui i le Pulesili o le Pulega o le Eletise ma le Suavai i Amerika Samoa (ASPA), susuga Wallon Young, ina ia saili se auala e faaitiitia ai le tau o le eletise ua ova le maualuga.

O lea fautuaga na tuuina atu i se iloiloga sa faia i le vaiaso na te’a nei i luma o le Komiti o le Pulega o le Eletise a le Maota o Sui, i lalo o le taitaiga a le afioga i le ali’i Faipule ia Alumamalu Filoiali’i Ale. 

O le Pulesili o le ASPA ia Young ma nisi o sui sinia na auai i le iloiloga mo le taliina o fesili e faatatau i le tulaga maualuga ua i ai le tau o le eletise i le taimi nei, faatusatusa lea i isi masina ua tuana’i atu.

Na faamalamalama e Young i sui o le Komiti e faapea, o le mafua’aga autu ua ala ai ona maualuga le tau o le eletise i le masina o Iulai atoa ai ma le masina lenei o Aokuso, e mafua mai i le taugata o le tau o le suauu i soo se vaega o le lalolagi, ma, e le na o Amerika Samoa o lo o aafia i lenei faafitauli.

A o le i tula’i mai le tulaga pagatia i le taugata o le tau o le susuu ua i ai, e i lalo o le $100,000 e fa’aalu e le ASPA e faatau mai ai le suauu i le aso e tasi, peita’i o le suiga lea ua i ai talu ona sii maualuga le tau o le kalone suauu i maketi o le lalolagi, ua silia i le $150,000 ua fa’aalu e le ASPA i le aso e tasi e fa’atau mai ai le suau’u.

A tu’u i le fua faa le masina, e tusa ma le $1miliona sa fa’aalu e le ASPA e faatau mai ai le suauu i le masina, o le taimi nei i le suiga ua i ai ma le maualuga o le tau o le paelo suauu i maketi eseese o le lalolagi,  ua toeitiiti lava atoa le $5 miliona ua fa’aalu e le ASPA i le masina mo le suauu, tusa lea ua silia i le $2 miliona i le masina ua siitia ai le tupe fa’aalu mo na o le suauu lava.

O le afioga i le Tamaitai Faipule mai le Itumalo o Fofo ia Andra Tereise Samoa, o ia fo’i sa avea ma Pulesili o le ASPA mo le tele o tausaga ua mavae ao lei filifilia e lona itumalo e avea ma Faipule, sa ia fesiligia le Pulesili a le ASPA i le taimi nei i le mafua’aga e taugofie ai le totogi o le eletise i le kilouati mo kamupani tetele ae taugata mo tagata taitoatasi.

Na faamalamalama e Young e faapea, e mafua ona taugofie le tau o le kilouati mo pisinisi ma kamupani tetele ae taugata mo tagata taitoatasi, ona e tele atu kilouati o loo faaaoga e pisinisi ma kamupani tetele nai lo le tagata e toatasi.

E le gata fo’i i lea, o le mamao o le nofoaga e i ai le tagata o le taugata fo’i lena o le tau o le kilouati.

Mo se faataitaiga, e $0.896sene le tau o le kilouati mo pisinisi tetele, ae $0.0974 le tau o le kilouati mo tagata taitoatasi.

Na faamalamalama atili e Young e faapea, o le kamupani i’a a le StarKist Samoa, o le tau o loo latou faatauina ai le kilouati e tasi e tusa ma le $0.07sene, ma e tusa ma le $1 miliona le tupe e totogi e le StarKist mo le eletise i le masina, fuafua i le aiga e toatasi e nofo i le nu’u tulimanu lava o le itu i sisifo poo sasa’e, e i le va o le $30 - $40 le pili latou te totogiina i le masina.

Lona uiga, e fuafua le tau o le kilouati i le tau o le auaunaga o loo faatino e le ASPA.

Saunoa le afioga i le ali’i Faipule mai Sua, Lua’itaua Gene Pan e faapea, e tatau ona toe aumai e le ASPA le latou vaega tupe e $2 miliona lea na faaitiitia ai le latou paketi o le tausaga tupe na te’a nei, e toe faaopoopo i le latou paketi o le tausaga tupe fou lea ua faamoemoe e amata i le masina o Oketopa o le tausaga nei, ina ia fesoasoani ai i le fau faaitiitia o le tau o le eletise mo le atunu’u.

Saunoa Lua’itaua e faapea, e toatele tagata o le atunu’u ua pagatia ona o le faafuase’i o le siitaga maualuga i le tau o le eletise, ae le o se mea na fuafua pe mafaufauina e tagata. Sa ia fautuaina fo’i le susuga a Young ma le Pulega a le ASPA ina ia silasila i ni auala fou e fesoasoani i le aumaia i lalo o le tau o le eletise ua maualuga tele mo aiga lima vaivai faapea ai le atunu’u atoa.

Na lagolagoina e le Faipule mai le afioaga i Pago Pago, le afioga ia Vesi’ai Poyer Samuelu le fautuaga ina ia saili ni auala e faaitiitia ai le tau o le eletise.

Saunoa Vesi’ai e faapea, o le isi auala faigofie e mafai ai ona foia lea faafitauli, o le faaaoga lea o le eletise lea e maua mai i le la, e fesoasoani ai i le aumaia i lalo o le tau o le eletise. E talitonu le afioga a Vesi’ai, e le mafai lava ona toe suia le tau o le eletise mo Amerika Samoa i lenei vaitau, leaga o loo sii pea i luga le tau o le suauu i maketi o le lalolagi.

Ae pau le auala e faaitiitia ai le tau o le eletise ma maua ai se fesoasoani mo le atunu’u, o le faaaoga lea o le auaunaga e pei ona maua mai ai le eletise i le malosi o le la.

Saunoa le afioga i le ali’i Faipule ia Vailiuama Steve Leasiolagi e faapea, e le talitonu lona taofi i le faamatalaga a  Young e faatatau i le mafua’aga ua ala ai ona taugata le tau o le eletise, e mafua mai i le maualuga o le tau ua faatauina ai le suauu i maketi o le lalolagi.

Na faamanino e Vailiuama e faapea, i le tausaga tupe e 2020, na faamauina ai e le ASPA la latou tupe faasili e tusa ma le $2 miliona, ae o le taimi lea o loo matua maualuga ai le tau o le suauu i le lalolagi, ae ina ua taugofie le tau o le suauu i maketi o le lalolagi, na toe faaitiitia ai loa le tau o le eletise, ma maua ai e le ASPA nao le $600,000 i a latou tupe faasili.

I le talitonuga o le afioga a Vailiuama, a maualuga le tau o le eletise i Amerika Samoa, o le tele fo’i lena o tupe a le ASPA e maua.

I lona talitonuga i le tulaga lea ua i ai le tau o le suauu i le taimi nei, o le a matua maualuga tupe maua a le ASPA i masina taitasi, aua o lea ua tele tupe ua maua i pili o le eletise a le atunu’u.

E lei ioe i ai Young i le manatu lea a Vailiuama.  Saunoa Young e faapea, e le o tele se tupe maua a le ASPA o loo i ai i le taimi nei, o le mafua’aga fo’i lena na faamalolo ai e le ASPA le toatele o ana tagata faigaluega ia ni nai tausaga e lei mamao atu, e mafua mai ina ua le gafatia e le ASPA ona totogi i latou.

Soo se taimi lava e maua ai tupe faasili a le ASPA e pei ona molimau Young, latou te faaalu ai e fausia ai nisi atina’e ma inivesi i ai tupe ma le faamoemoe e alu aoga ma toe maua mai ai isi seleni a le ASPA, e pei o le fausiaina o fale mo galuega, atoa ai ma le faatauina mai o masini e fa’aaoga i galuega.

E lei talitonu Vailiuama i le saunoaga lea a Young. Na taua e Vailiuama e faapea, e le sa’o le saunoaga a le alii Pulesili fai mai e tau leai ni tupe a le ASPA, ao lea na te molimauina le tele o ta’avale a le ASPA o loo i ai, o le ata vaaia lea ma le faamaoniga o le tupu manuia o se atina’e poo se ofisa a le malo.

O le popole e pei ona saunoa Vailiuama, o le toatele o aiga lima vaivai, latou te le gafatia ona totogi le pili o le uila, peita’i, ua leai lava sa latou alofaga ae totogi ina ia mafai ai ona ola manuia aiga ma tagata taitotasi.

Na taua atili foi e Vailiuama le tele o tupe fesoasoani a le ASPA e maua mai i le feterale e fesoasoani ai i le manaoga, peita’i na saunoa Young e faapea, e leai ma se tupe fesoasoani mai le feterale e pule ai le ASPA.

O tupe uma lava a le ASPA e maua mai i alaga tupe fesoasoani mai le feterale, e alu sa’o lava e fausia ai galuega tetele e pei o fale. Sa ia taua atili foi e faapea, e le pulea e le ASPA le faaaogaina o alagatupe nei, ae pulea lava ma faatonutonu mai e le malo feterale.