Falesala i le Toese mo le 28 masina le ta’ita’i o le au talepe fale

Pago Pago, AMERIKA SAMOA

E 28 masina lea ua faasala ai e le  Fa’amasinoga Maualuga le alii na taitaia le au gaoi oloa mai se tasi o Faleoloa i Tafuna, e nofosala ai i le Toese i Tafuna, ina ua ta’usala o ia i le moliaga mamafa o le gaoi, e mafua mai i le fa’alavelave lea na latou osofaia ma nisi o ali’i talavou se faleoloa ae ave faagaoi le tele o oloa sa i ai.

O isi tuutuuga o le nofovaavaaia e 7 tausaga a le susuga a Emuelu Alatini na tuuina atu e le Fa’amasinoga i le vaiaso na te’a nei, e lona tuua lea o Amerika Samoa ae toe fo’i atu i lona atunu’u o Samoa na malaga mai ai mo le umi o lana nofovaavaaia.

O lea tuutuuga a le Fa’amasinoga, o le a taofi lona fa’atinoina, ae se’i vaavaai pe usita’i le ua molia i poloaiga ua tuuina atu e le Fa’amasinoga e usita’i ma savali ai.

O le vaiaso na te’a nei na tula’i ai Alatini i luma o le Fa’amasinoga Maualuga mo le tuuina atu o lana fa’asalaga. O le ali’i sa avea ma Loia Fautua lagolago ia Rob McNeill na tula’i mo ia, ae o le tamaitai loia sili lagolago ia Laura Garvey na tula’i mo le malo.

Na ulua’i tu’uaia e le malo le susuga a Alatini i moliaga mamafa e 2 o le gaoi; 2 moliaga mamafa o le talepe fale i le tulga lua; faapea ai ma moliaga e 2 o le ave faagaoi o ni meatotino sa tuuina atu i lalo o lana vaavaaiga. 

Ae i lalo o se maliliega na sainia e Alatinio ma le malo, lea fo’i na talia e le Fa’amasinoga Maualuga i le masina na te’a nei, na malie ai loa le malo latou te toe faia se teuteuga i le tagi sa latou fa’aulu fa’asaga ia Alatini, ina ia fa’ailoa ai le moliaga o le gaoi, o le vaega C lea o solitulafono mamafa, lea e mafai ona faasala ai se tasi i le Toese mo le umi e le silia i le 7 tausaga, pe faasala i le salatupe e le silia i le $5,000, poo le faasala fo’i i faasalaga uma ia e lua.

I le tali ioe ai o Alatini i le moliaga e pei ona toe teuteuina e le malo, sa ia ta’utino ai e fa’apea, i se taimi o le amataga o le tausaga na te’a nei, na ia taitaia ai se vaega o alii talavou sa latou galulue i le Kim Store i Tafuna, lattou te osofa’i ma ave faagaoi oloa mai totonu o le faleoloa.

Na taua atili e Alatini i le Fa’amasinoga, e fa’alua ona latou osofaia le faleoloa ae ave faagaoi le tele o oloa sa i totonu. O nisi o oloa sa latou tufatufa mo i latou lava, ae o isi oloa na faatau atu i isi tagata e masani ai.

O le gaioiga sa latou faia e aofia ai lo latou la’uina lea o pusa pisupo, pusa Lialia, o pusa mea’ai tuuapa e pei o pisupo ma supokeli, atoa ai ma isi lava oloa i soo se ituaiga i luga o se ta’avale ma le fa’amoemoe e le mafai ona toe maua e le Pule o le Faleoloa ana oloa. O le tau aofa’i o oloa sa latou gaoia pe a faatupeina e tusa ma le $1,813.04.

Ina ua maua le avanoa e fa’aleo ai le talosaga a le ua molia ma lana loia, sa talosagaina ai loa e lana loia fautua ia McNeill le Fa’amasinoga mo se fa’asalaga faanofovaavaaia mo le ua molia.

Na taua e McNeill e fa’apea, ina ua tatala le ua molia i tua e fa’atatalitali ai le faaiuga o lana fa’amasinoga, sa alu o ia ma saili lana galuega e tausi ai lona to’alua ma lana fanau faapea ai lona aiga atoa. O le taimi nei, o lo o galue o ia i lana galuega fou i se tasi o konekarate fau fale, ma ua faamoemoeina fo’i o ia i lana galuega talu mai le 10 na tatala ai o ia i tua e faatalitali ai taualumaga o lana mataupu.

O ia o se Tama e galue malosi mo le tausiga o lona to’alua aemaise si ana fanau e to’atolu, o lo o tulaga lelei pea fo’i lona ID mai le Ofisa o Femalagaaiga. Na talosaga McNeill i le Fa’amasinoga ina ia talia le fautuaga a le Ofisa Faanofovaavaaia, mo se fa’asalaga mama mo le ua molia e aunoa ma le tuuina atu o se isi taimi na te tuliina i le Falepuipui.

Na faailoa fo’i e McNeill i le Fa’amasinoga le sauni o le ali’i ua molia e toe totogi le tupe mo oloa sa ia ave faagaoi mai lana gaioiga sa faia faatasi ma nisi o le aufaigaluega.

Na lagolagoina e le loia a le malo le folasaga a McNeill, ma ia talosagaina ai fo’i le Fa’amasinoga ina ia faasala le ua molia i se fa’asalaga faanofovaavaaia. E talitonu le malo, ua matua salamo le ua molia e tusa ai o lana solitulafono.

Na taua e le loia a le malo i le Fa’amasinoga e faapea, na pau lava le itu o lo o naunau i ai le pule o le Faleoloa na a’afia, o le toe totogi atu lea o le tupe mo le tau o ana oloa na gaoia e le ua molia ma ana uo e to’a tolu.

Na taua atili e le malo le tatau lea i le ali’i ua molia ona ia totogi atoa le tupe lea sa ia malie ai i totonu o le maliliega aufaatasi ma le malo. Ae afai e leai, e ono avea lea ma itu na te le usitaia ai tuutuuga o le latou maliliega ma le malo.

A o le i tuuina mai le faaiuga a le Fa’amasinoga, na toe faatepa ai e le Fa’amasinoga i itu e lua mau faamaonia na sauni le malo e folasia i luma o le vaega iloilo iuga, pe ana faapea e tofu atu lenei mataupu i luma o le vaega iloilo iuga.

O lenei mataupu e pei ona saunoa le Fa’amasinoga, na alia’e mai i le nofoaga o le Faleoloa a le Kim Store in Tafuna, ina ua taupulepule le ua molia ma nisi o ana uo talavou e ave faagaoi ni pusa oloa mai totonu o le Faleoloa ma le fa’amoemoe e le toe maua e le Pule o le Faleoloa.

A o la’u e i latou pusa oloa ma tu’u i totonu o se ta’avale, na i ai se taimi na manino lelei ai i le masini pu’eata a le Faleoloa le itu sa tu ai nisi o alii na aofia i le solitulafono, ma faigofie ai loa ona iloa o ia. Ina ua suesueina e le Pule o le Faleoloa i latou nei, sa latou ta’utino ai loa i le moni o tu’uaiga.

Na taua e le Fa’amasinoga e fa’apea, e le gata na molia le ua molia i lana vaega sa faatinoina i lenei solitulafono ae na molia ai fo’i ma ana uo talavou e to’atolu na latou auai faatasi i le faatinoina o lenei solitulafono.

Na faamanino e le Faamasinoga Maualuga e fa’apea, ua talitonu le Fa’amasinoga i fa’amatalaga uma ma folasaga sa tuuina atu e Loia e itu e lua e fa’atatau i lenei mataupu. E le gata fo’i i lea, ua fa’amalieina le Faamasinoga i faafinauga atoa ai ma itu lelei e fa’atatau i le ua molia, faapea ai ma se fa’asalaga e ono tatau ona tuuina atu ia te ia.

Na pau lava le itu na taua e le Fa’amasinoga e fai ma faamama avega mo se fa’asalaga mo le ali’i ua molia, o lona ta’utino lea i le Ofisa Faanofovaavaaia, o le a ia toe totogiina uma le tupe mo le taui o mea na ave faagaoi. O lea ta’utinoga e pei ona taua e le Faamasinoga Maualuga, o lea fa’amatalaga mai le ali’i ua molia ua atagia mai ai lona salamo faamaoni mai lana solitulafono sa faia.

E 7 tausaga na manatu le Fa’amasinoga e faasala ai Esau i le Falepuipui i Tafuna, faapea ai ma lona totogiina o le salatupe e $5,000. O ia fa’asalaga uma o le a faamalumalu, ae o le a nofovaavaaia o ia mo le 5 tausaga i lalo o tuutuuga e ao ona ia usita’i i ai.

O ni isi o ia poloaiga e aofia ai lona tuliina o masina e 28 i le toese i Tafuna e aunoa ma le tatalaina o ia i tua. Ua manatu a maea loa ona tuli e le ua molia le faasalaga faa falepuipui ua tuuina atu, ona ia tuua loa lea o le atunuu ae toe foi atu i Samoa mo le umi o lana nofovaavaaia.

O lea poloaiga o le a taofi lona faataunuuina, fuafua lava i le usita’i e le ua molia i isi uma tuutuuga o lana nofovaavaaia.

Ua poloaina fo’i o ia na te toe totogi le tupe e $1,813.04. i le Faleoloa a le Kim Store mo le totogi o oloa na gaoia.

O moliaga faasaga i uo talavou e to’atolu a Alatini, o lo o fa’agasolo pea a latou iloiloga i luma o le Faamasinoga mo Fanau Talavou.