Falepuipui se tamaloa ma molia i lona fa’ao’olima i lona to’alua

Pago Pago - AMERIKA SAMOA

E tusa ai ma fa’amaumauga a le Ofisa a Leoleo, o lo o ua ta’ua ai le vala’au atu a se tina i lo latou ofisa i Tafuna, ma lipotia atu ai le fa’ao’olima o lona to’alua ia te ia, ona ua masalosalo lona toalua ia te ia.

Ina ua taunu’u leoleo i le maota a lenei ulugalii, sa fa’asino iai e le tina le mea o lo o lafi ai lona to’alua.  Na lokaina mai ai e leoleo ia le tama o le aiga, ma tu’uina o ia i totonu o le ta’avale a leoleo.

Na mafai ona talatalanoa leoleo ma le tina i lona fale, ma sa faamatala e le tina, sa fai se la taugaupu ma lona to’alua, ona ua masalosalo lona to’alua, ua toe fai seisi ana uo.

Sa faamatala foi e lenei tina i leoleo, le tau fa’afefe o ia e lona to’alua, e faapea, o le a na ia (tamaloa) tuia o ia (tina) i se naifi, o le mafua’aga lea na ia valaauina ai loa le ofisa a leoleo, mo se fesoasoani.

Sa faamatala foi e le tina e faapea, e na te le o toe mana’o e toe fo’i atu lona to’alua i le latou fale.  Ma e ui ina sa iai ni manu’a i foliga ma le lima tauagavale a le tina, ae peitai, sa musu e alu i le falemai pe vala’au foi le EMS.

Ina ua fa’atalanoa e leoleo le ua molia, sa ia faamatalaina e faapea, sa agai atu sana uo e momoli o ia i le fale i lana ta’avale, ma sa ia vala’au i lona to’alua pe manao e la te o atu ma lana uo e piki mai o ia, ae peitai, na fa’ailoa mai e le tagata sa taliina le telefoni, ua leva ona manava lona toalua.  

O lea na agai sa’o ai loa le ua molia i le fale, e fa’atali mai ai lona to’alua.

Sa faamanino e le ua molia e faapea, ina ua taunu’u atu lona to’alua, sa amata ai loa ona tau upu ma sa ia faamaonia lona titina ina o lona to’alua, ma lona taumafai e ta lona to’alua i se ato ta lavalava, a’o la iai i totonu o le la potu.

Ua molia nei le susuga ia Paeaia Isaako i moliaga e tolu, e aofia ai le Faatupu Vevesi i totonu o lona aiga, o le Fa’ao’olima i lona tulaga e tolu faapea ma le Taofiofi Fa’apagota o se tagata.

I le moliaga muamua i le faatupu vevesi, e mafai ona nofosala ai se tasi i le falepuipui mo le sefululima aso, po o se sala tupe e $300; ia po o fa’asalaga uma e lua.

I le moliaga lona lua i le fa’ao’olima, e mafai ona nofosala ai se tasi i le falepuipui i le tausaga atoa, po o se sala tupe e $1,000; po o faasalaga uma e lua.

Ae i le moliaga lona tolu, o le taofiofi faapagota o se tagata, e mafai ona faasala ai foi se tasi i le falepuipui, i le 12 masina, po o se sala tupe e $1,000 po o faasalaga uma e tolu.

E $2,000 le tupe faatulagaina e mafai ona tatalaina ai Isaako mai i le falepuipui, e faatalitali ai lona fa’amasinoga.