Falepuipui se ali’i i lona fa’aoo o manu’a tuga i se tamaititi 15 tausaga

O le ali’i e 48 tausaga le matua lea na ta’usala i lona fa’aaoga o se aupega malo e fa’aoo ai manu’a i le ulu o se tamaititi e 15 tausaga le matua i le tausaga na te’a nei, ua poloaina e le Fa’amasinoga Maualuga le taofia o ia i le falepuipui i Tafuna mo le umi e 20 masina, o se tasi lea o tuutuuga o lana nofovaavaaia e 5 tausaga.

O le isi tuutuuga o le nofovaavaaia a le ali’i o Ropeti Muao, o lona totogi lea o le tupe e $5,000 i le ali’i na a’afia, e le gata e totogi ai lana pili falema’i, ae fesoasoani ai fo’i i le fa’atupeina o mea e mana’omia e le tamaititi na a’afia pe a atoa lona 18 tausaga.

Na ulua’i molia e le malo ia Muao i le moliaga mamafa o le faaoolima i le tulaga muamua, le moliaga e mafai ona fa’asala ai o ia i le falepuipui mo le olaga atoa, poo le fa’asala i le umi e le sili atu i le 30 tausaga. Ae i lalo o se maliliega na sainia e le ua molia ma le malo ma talia fo’i e le Fa’amasinoga, na ia tali ioe ai i le moliaga feololo o le faaoolima i le tulaga lua, lea e mafai ona fa’asala ai o ia i le falepuipui mo le umi e le sili atu i le 5 tausaga, poo le salatupe e le silia i le $5,000.

I lona tali ioe ai i le moliaga e pei ona ta’usala ai o ia, na ta’utino ai Muao e faapea, sa ia fa’aaoga se sele ulu malo e sasa ai le ulu o le ali’i na a’afia, e mafua mai i lona ita ina ua ia lafo ni upu e fa’alumaina ai se tasi o ona tei laititi.

Na faatoese le ua molia i le fa’amasinoga e tusa ai o lana solitulafono, ma ia talosagaina ai se isi avanoa mo ia. Sa ia faatoese foi i le alii na aafia ma ona matua, ina ia fa’amagalo lana gaioiga sa faia ua mafua ai ona manu’a le na a’afia.

Na talosaga Muao i le fa’amasinoga mo se avanoa e toe fo’i atu ai i lona aiga e tausi si ona Tina matua o loo i ai. Sa ia taua e fa’apea, o le fa’alavelave na tula’i mai e le o se gaioiga sa ia mafaufauina, ae na tula’i mai ina ua televave lona ita.

Na talosaga lana loia fautua ia Douglas Fiaui ina ia fa’asala le ua molia i se fa’asalaga fa’anofovaavaaia, ina ia mafai ai ona toe fo’i o ia i lona aiga e fa’aauau lana tautua i lona Tina matua. Na taua atili e Fiaui e fa’apea, ua lava masina e 10 lea na taofia ai le ua molia e avea ma ana fa’asalaga i lenei mataupu.

O le ali’i na a’afia, o ia o se ali’i fusu mo Amerika Samoa. Na taua e Fiaui e fa’apea, atonu o aafiaga e mafua mai i le ta’aloga fusu lea ua mafua ai ona tau a’afia le ali’i na manu’a i manu’a tumau o le ulu, ae le mafua mai i le fa’alavelave e pei ona ta’usala ai Muao.

Na lagolagoina e le loia a le malo ia Woodrow Pengelly le fa’asala o Muao i se fa’asalaga faanofovaavaaia, e aofia ia ma lona tuliina o masina e 12 i le toese. Na finau le loia a le malo ma ia faailoa i le fa’amasinoga le matuia o le gaioiga sa faia e Muao, lea ua mafua ai ona oo manu’a tuga i le ulu o le ali’i na a’afia.

Saunoa le fa’amasino sili ia Michael Kruse e fa’apea, tusa lava poo le ali’i na aafia o se tagata fusu, ma, e ono i ai fo’i le avanoa e aafia ai o ia i manu’a tuga o le ulu, ae i le silasila a le fa’amasinoga, o manu’a lea o loo talanoaina i lenei mataupu, o manu’a na mafua mai i le gaioiga a Muao, ina ua ia fa’aaoga le sele ulu e sasa ai le ulu o le ali’i na a’afia ma manu’a tigaina ai o ia.

E 5 tausaga na manatu le fa’amasinoga e faasala ai Muao i le toese, peita’i ua faamalumalu lona tuliina o lea faasalaga, ae ua faanofovaavaaia o ia mo le 5 tausaga i lalo o poloaiga e ao ona ia usita’i i ai.

O ni isi o ia poloaiga e aofia ai lona tuliina o masina e 20 i le toese, ma ia totogi le tupe e $5,000 i le ali’i na a’afia.

O le totogiina lenei o le tupe, o le $1,022.58 o le a totogi muamua mo le pili a le falema’i, ae o le tupe e totoe ai, o le a totogi sa’o atu i le Failautusi a le Fa’amasinoga e taofi ai, fa’atoa tuuina atu i le ali’i na manu’a pe a atoa lona 18 tausaga le matua.