Falepuipui mo le ta’i 10 tausaga Leoleo e to’a lua Falepuipui o Tamaiti

E ta’i 10 tausaga lea ua fa’asala ai e le Fa’amasinoga Maualuga ni Leoleo se toalua o le Falepuipui o Tamaiti i Tafuna (JDC), ina ua fa’amaonia e le fa’amasinoga moliaga mamafa ta’i lua na tu’uaia ai i laua e le malo.

O i laua ua fa’asalaina nei e le fa’amasinoga e aofia ai le tama’ita’i ia Alofagia Letuli ma Olafou Wilson. O le aso Faraile o le vaiaso na te’a nei na tutula’i ai i laua i luma o le fa’amasinoga maualuga mo le lauina o le la fa’asalaga. O le ali’i loia fautua ia Michael White na tula’i mo Letuli ma Wilson, ae o le tama’ita’i loia sili lagolago ia Christy Dunn na tula’i mo le itu a le malo.

Ina ua maua le avanoa o i laua nei mai le fa’amasinoga, sa la fa’atoese ai loa e tusa ai o le la solitulafono sa faia.

Na taua e Letuli e fa’apea, o lona fa’amatala i le fa’atinoina o ona tiute ua mafua ai ona saisaitia o ia i lalo o le tulafono.

“I le avea ai o a’u ma Ta’ita’i Uati i le Falepuipui o Tamaiti, atoa ai ma le avea ma Leoleo sa fa’atauto e puipuia le tulafono mo le 10 tausaga, ou te manatu ai ua ou fa’amatala e fa’atino lo’u tiute. Ua ou lagona ai lo’u salamo e tusa ai o lo’u le fa’amaoni. Fa’amolemole fa’amagalo mai so’u sese,” o le fa’amatalaga lea a le tama’ita’i Leoleo e 32 tausaga le matua.

Sa ia talosagaina le fa’amasinoga mo se avanoa e toe fo’i atu ai i lona aiga e tausi lona Tama.

Sa ia fa’atoese fo’i i si ona Tama sa i ai i totonu o le potu fa’amasino, i le fa’aauau pea lea o lona asia o ia i fa’aiuga o vaiaso ta’itasi, a o taofia ai o ia mo le 20 masina e fa’atalitali ai se fa’aiuga o lana fa’amasinoga.

Na maua fo’i le avanoa e molimau ai le Tama o Letuli e fa’atatau i lona afafine. Na taua e le Tama i lana molimau e fa’apea, e to’a 5 lana fanau tama, ae na o Letuli lava lona afafine, o le mafua’aga fo’i lea e pele ai o ia i loto o le aiga. Sa ia fa’atoese i le fa’amasinoga e tusa ai o le sese a lona afafine, ma ia talosagaina ai loa se avanoa e vave fo’i atu ai Letuli i tua e tausi o ia faapea lona atali’i tauaso o loo ia tausiaina i le taimi nei i lo latou aiga.

Na maua fo’i le avanoa e fa’atoese ai le ali’i Leoleo ia Wilson i le fa’amasinoga e tusa ai o lana solitulafono. Na fa’atoese Wilson e tusa ai o lona le fa’amaoni e fa’atino ona tiute fa’a Leoleo, a o avea ai o ia ma Leoleo o le toese mo le 6 tausaga. Na taua e le ali’i e 32 tausaga le matua e fa’apea, o lona le fa’amaoni lea ua mafua ai ona saisaitia lona olaga i le falepuipui. Na fa’ai’u lana fa’atoesega i lona talosagaina lea o le fa’amasinoga mo se isi avanoa e toe fo’i atu ai i tua e fa’aleleia mea ua sese o lona olaga ma tausi lona aiga.

A o le i tuuina mai e le afioga i le Fa’amasino Sili ia Michael Kruse lana fa’asalaga, na maua lona avanoa e toe fa’amanatu ai tulaga e uiga i lenei mataupu.

Saunoa Kruse e fa’apea, e 10 moliaga na ulua’i tu’uaia ai e le malo ia Letuli. O ia moliaga e aofia ai le umia faasolitulafono o fualaau fa’asaina, faia o gaioiga e lepeti ai le ola manuia of anau, fesoasoani e faasosola i tua pagota, atoa ai ma le fa’ataga o pagota e sosola.

Ae i lalo o se maliliega na sainia ma le malo, na tali ioe ai Letuli i moliaga mamafa e 2, o le umia faasolitulafono o vaega o le pauta fa’asaina o le aisa, atoa ai ma le fesoasoani e fa’asola se pagota i tua. O se tasi o tuutuuga o le maliliega a Letuli ma le malo, o lona malie lea e molimau ma le fa’amaoni i le fa’amasinoga autu a le ali’i Leoleo o Okesene Alo o loo molia fa’atasi i latou, lea na mana’o e fa’ataunu’u lana fa’amasinoga autu.

Mo le ali’i o Wilson, e 14 moliaga na ulua’i tu’uaia ai o ia e le malo. O ia moliaga e aofia ai le umia faasolitulafono o fualaau fa’asaina, gaoi, atoa ai ma le fa’atagaina o pagota e sosola i tua. Ae i lalo o se maliliega na sainia e Wilson ma le malo, na malie ai le ua molia e tali ioe i moliaga mamafa e lua o le umia faasolitulafono o vaega o le fualaau fa’asaina o le aisa faapea ai ma le gaoi. O se tasi o tuutuuga o le maliliega a Wilson ma le malo, o lona malie lea e molimau ma le fa’amaoni i le fa’amasinoga autu a le a Alo.

I le mae’a ai ona iloilo e ali’i Fa’amasino o mau fa’amaonia uma e fa’atatau i lenei mataupu, atoa ai ma le Ripoti sa saunoa e le Ofisa Fa’anofovaavaaia, na saunoa ai Kruse e fa’apea, o le Laulau a Fa’amasino lea na iloiloina le ripoti ma fa’afofoga i fa’atoesega a i laua ua molia, faapea ai ma fa’afinauga a Loia mai itu e lua o lenei mataupu, o le Laulau a Fa’amasino lava fo’i lea na latou iloiloina le mataupu a le ali’i o Alo, ma ua matua fa’amanuiaina ai Fa’amasino i le mafai lea ona maua le avanoa latou te fa’afofoga ai i mau fa’amaonia uma e fa’atatau i lenei mataupu.

Saunoa Kruse e fa’apea, mai le tele o tausaga ua mavae, o lo o silafia lelei e le fa’amasinoga le fa’aauau pea lea ona tula’i mai o le fa’aflitauli i le nofoaga o le toese i Tafuna, aemaise lava i le falepuipui o tagata matutua. O lea fa’afitauli e aofia ai le fa’ataga o pagota e o e fa’atau pia, poo le fa’ataga fo’i o pagota e o e asiasi i o latou aig ai le po. O le itu e fa’anoanoa ai, o nei faiga le manuia ua amata ona sosolo atu i le falepuipui o tamaiti.

Saunoa Kruse e fa’apea, o fanau ua ta’usala i solitulafono, sa auina atu i latou i le falepuiopui ma le fa’amoemoe ina ia latou aoaoina mai ai ni lesona taua. O le faanaunauga o le fa’amasinoga ia aveese mai fanau nei ae tuuina atu i se nofoaga e taofia ai ina ia latou aoaoina ni lesona aoga, peita’i e foliga mai o lo o atili ai ona a’afia i latou i uiga fa’a solitulafono e aofia ai lo latou fa’aaogaina o fualaau fa’asaina, ma o ni uiga ua tagia mai ai le le fa’aaloalo i le tulafono.

“O le atugaluga pito sili ona popole i ai le fa’amasinoga, o le fa’aauauina pea lea o faiga fa’a solitulafono nei i totonu o le toese, ma ua mana’omia ai ni suiga ina ia mautinoa e foia ai le alia’e mai o nei faiga le manuia,” o le saunoaga lea a Kruse.

Na taua e le afioga i le ali’i Fa’amasino Sili e fa’apea, ua tele tausaga o fautuaina e le fa’amasinoga le tatau lea ona vaavaai i auala o lo o masalomia le ofi atu ai o faiga faasolitulafono i totonu o le toese e pei o pagota o lo o tatala i tua e faigaluega ae toe fo’i atu i totonu, faapea ai ma aiga o pagota o loo autova’a atu e asiasi i faaiuga o vaiaso.

I lona talitonuga, o ni isi nei o auala o lo o mafua ai ona avatu fa’anana fualaau fa’asaina i totonu o le toese.

I le mae’a ai o le saunoaga fa’aumiumi a le ali’i fa’amasino, na ia faasalaina ai loa Letuli ma Wilson ina ia taofia i le toese i Tafuna mo le 10 tausaga. O lea fa’asalaga e tuli atoa lava.

O le afioga i ali’i Fa’amasino Lagolago ia Mamea Sala Jr ma Fa’amausili Pomele na lagolago i le Fa’amasino Sili i le tuuina mai o le fa’asalaga mo Letuli ma Wilson.

O isi Leoleo e to’alua na molia fa’atasi ma Letuli ma Wilson o loo fa’aauau pea a laua mataupu i luma o le fa’amasinoga, e aofia ai Okesene Alo, lea ua mae’a fo’i ona ta’usala i moliaga mamafa ma ua fa’amoemoe e tula’i i luma o le fa’amasinoga maualuga i le aso 2 o Novema mo le lauina o lana fa’asalaga.

O le ali’i Leoleo ia Junior Utuga o loo fa’agasolo pea i luma o le fa’amasinoga fa’aitumalo lana mataupu, ma ua fa’amoemoe o se taimi o le masina nei e toe valaau ai lana mataupu i luma o le afioga i le ali’i fa’amasino ia Fiti Sunia.