Falepuipui mo le 7 tausaga i le faia o uiga mataga i lona niece

Pago Pago - AMERIKA SAMOA

E 7 tausaga lea ua faasala ai i le Toese i Tafuna e le Fa’amasinoga Maualuga se Tama e 58 tausaga le matua mai Tafuna, ina ua ta’usala o ia i le solitualfono o le faia o uiga mataga i se tamaitai e 16 tausaga le matua e aiga i ai.

A mae’a ona tuli le faasalaga faa falepuipui e 7 tausaga a le ua molia, ona ia tuua lea o le teritori ae toe fo’i atu i lona aiga i Samoa ma aumau ai, e le toe faatagaina o ia ona toe ulufale mai i le atunu’u.

O le afioga i le ali’i Fa’amasino ia Fiti Sunia na iloiloina lenei mataupu, lagolagosua i ai afioga i ali’i Fa’amasino Lagolago ia Mamea Sala Jr ma Tunupopo Alalafaga Tunupopo.

O le ali’i Loia Fautua ia Ryan Anderson na tula’i mo le Tama ua nofosala ae o le tamaitai Loia Sili lagolago ia Kristine Soule’e na tula’i mo le malo.

E tele moliga mamafa na tu’uaia ai e le malo le Tama ua molia, o ia moliga e aofia ai le faamalosi teine, faiga o uiga mataga faafeusuaiga, faiaiga i se tagata e aiga i ai, tagofie o itutinosa o se tamaitai e laititi i lalo o le tulafono, atoa ai ma lona taofia faapagota o se tamaitai i se auala faasolitulafono.

A e i lalo o se maliliega na sainia e le ua molia ma le malo, lea fo’i na talia e le Fa’amasinoga Maualuga i le masina o Novema o le tausaga na te’a nei, na malie ai le Tama ua nofosala e tali ioe i le solitulafono o lona faia lea o uiga mataga faafeusuaiga i se tamaitai e aiga i ai toe laititi i lalo o le tulafono.

I le tali ioe ai o le ua molia i le solitulafono e pei ona ta’usala ai o ia e le Fa’amasinoga, sa ia ta’utino ai e faapea, i se taimi o le masina o Fepuari o le tausaga e 2020 i lo latou aiga i Tafuna, sa la feusua’i ai ma lona niece i se auala faasolitulafono.

Na ta’utino atili le ua molia e faapea, i totonu o le umi e 5 masina e oo mai i le masina o Fepuari o le 2020, sa la faia ai ma lona niece se mafutaga faaleulugalii e aunoa ma se isi na iloa. Sa ia taua fo’i e faapea, o lana gaioiga sa faia, ua le tusa lea ma ala o le tulafono.

Ina ua maua le avanoa o le alii ua molia ma lana Loia, na talosaga ai loa lana loia mo se faasalaga faanofovaavaaia e aofia ai ma le umi e 20 masina lea ua mae’a ona tuli e le ua molia i le Falepuipui a o faatalitali ai taualumaga o lana mataupu. 

Sa ia taua atili e faapea, e ui i le matuia o le solitulafono sa faia e le ua molia, ae o le ulua’i taimi lenei ua aafia ai o ia i se solitulafono talu mai le lata i le 60 tausaga o lona olaga. 

Sa avea o ia o se Tama e faalagolago i ai lona aiga i soo se mea, sa tautua fo’i ma le faamaoni i le nu’u ma le Ekalesia. Ae o le sese o lana filifiliga na mafua ai loa ona tula’i mai le faaletonu ma aafia ai o ia i le Tulafono.

Na finau Anderson i le Fa’amasinoga e fa’aaoga le umi lea ua mae’a ona tuli e le ua molia i le Falepuipui a o taofia ai o ia e faatali ai se faaiuga o lana mataupu, e fai ma ana faasalaga i lenei mataupu. Sa ia taua e faapea, ua lagona e le ua molia le sese o lana gaioiga sa faia ma ua ia salamo moni foi e tusa ai o lana solitulafono.

Na tete’e malosi le Loia a le malo ia Soule’ i le talosaga a le itu tete’e mo se faasalaga faa nofovaavaaia mo le ua molia. Na taua e Soule’ e faapea, a faatusatusa i tausaga o le alii ua nofosala ma le tamaitai na aafia, e 42 tausaga e valavala ai i laua. 

O le gaioiga sa faia e le ua molia, o se gaioiga ua aveesea ai le talitonuga sa tuuina atu e le tamaitai na aafia ia te ia, e avea ai o ia o se Tama e puipuia le saogalemu i totonu o le aiga. Ua le toe malu ni fanau tamaitai i lalo o lana vaavaaia, ina ua ia naunau e faamuamua lagona tu’inanau ae galo ai ona tiute faa Tama.

Na finau le itu a le malo i le Fa’amasinoga ina ia faasala le ua molia i le faasalaga pito maualuga o lo o faatulaga mai e le Fa’amasinoga, o le 7 tausaga i le Toese. Ae afai e finagalo le Fa’amasinoga e faasala o ia i se faasalaga nofovaavaaia, na finau le itu a le malo ina ia faasala o ia i le taimi pito maualuga o loo faatulaga e le Fa’amasinoga, e 28 masina i le Toese.

E talitonu le itu a le malo, e le tatau ona mama le silasila a soo se tasi i ituaiga tagata e faia amioga faapenei, ae tatau lava ona faasala i se faasalaga talafeagai, ina ia momoli atu ai le feau i le atunuu aemaise ai i latou o lo o faia lenei amio, e le mama i le Fa’amasinoga ituaiga mataupu mataga faapenei.

E umi se taimi na iloilo ai e afioga i ali’i Fa’amasino sa latou faaiuga, ae fofogaina loa e le afioga i le Fa’amasino Sili lagolago ia Sunia.

Saunoa Sunia e faapea, o le alii ua ta’usala e le Fa’amasinoga, o se tagatanu’u o le malo Tutoatasi o Samoa, ae faaipoipo atu o ia i se tagatanu’u o Amerika Samoa, ma ua tele tausaga o aumau o ia i le atunu’u. 

O ia o se tagata sa tautua i lona aiga ma tipi fo’i lana lafoga i le malo, aemaise ai o le tele o tausaga na mulimulita’i ai o ia i le tulafono. Peita’i, e le avea ia tulaga ma auala e mama ai le silasila a le Fa’amasinoga i le matuia o le solitulafono sa ia faia, o lona faatamaia lea o le saogalemu o se tamaitai e talavou i lalo o le tulafono.

O le faia o uiga mataga i se tamaitai talavou sa vaai maualuga ia te ia ma avea o ia o se tagata e faalagolago i ai le ola saogalemu, o se tulaga lea e pito sili ona mamafa i le silasila a le Fa’amasinoga. 

O aso uma o le a ola ai lenei tamaitai talavou i lenei olaga, o le a ia tauaveina pea lenei tiga ma le faalumaina. I faamaumauga a le Fa’amasinoga, o le tausaga na te’a nei na mae’a ai le aoga o le pepa nofomau a le ua molia a o taofia ai o ia i le Toese i Tafuna.

E le o i ai se gaioiga a lana sponsor e toe faafou lona ID.

O ia o se tagata ua matua, ma ua lava le matua o lona mafaufau na te faia ai faaiuga tatau ma talafeagai mo le saogalemu o fanau laiti.

Ua manatu le Fa’amasinoga, e le agava’a se faasalaga faanofovaavaaia, ae talafeagai i ai se faasalaga faa falepuipui ina ia a’oa’oina ai lona mafaufau mo le lumana’i.

Ua faamaonia le solitulafono o le faia o uiga mataga faafeusuaiga, ma ua poloaina o ia e tuli tausaga e 7 i le Toese i Tafuna, o le a aofia ai ma masina e 20 ua mae’a ona ia tuliina i le Toese i Tafuna. 

A mae’a ona tuli lana faasalaga, ona ia tuua lea o le teritori ae toe fo’i atu i Samoa ma nofomau ai mo le olaga atoa, e le faatagaina o ia ona toe ulufale mai i le atunu’u. 

Afai ae toe taumafai e ulufale faamalosi mai i Amerika Samoa i soo se auala, o le a toe molia o ia ma taofia e le malo, ona sili atu ai lea o le mamafa o se faasalaga o le a tuuina atu ia te ia. Ua poloaina fo’i o ia poo lana sponsor e totogi le salatupe e $2,000 aga’i i le Fa’amasinoga.

Na faailoa e le Fa’amasinoga i le alii ua molia e faapea, ana faapea e faatulaga mai e le Fa’amasinoga, o le faasalaga e aofia ai le soloatoa i le Toese, se manu e talosagaina e le Fa’amasinoga le faasalaga soloatoa.

E pei ona taua e le malo i le latou tagi e faapea, o le tamaitai na aafia e nonofo faatasi ma le alii ua molia i le fale e tasi. O le tamaitai na aafia ma lona uso matua e 25 tausaga, latou te nonofo faatasi ma le latou grandmother ua 87 tausaga.

I le aso na tula’i mai ai le faalavelave, na toe fo’i atu ai le tamaitai na aafia i le fale ua le aoga, ina ua ia faalogoina e le o atoatoa lona malosi. 

Na taunuu le tamaiti na aafia i le fale ma ia iloa ai lona uncle o le a sauni e tuua le fale mo galuega, peita’i e le i leva ona alu ese atu lona uncle ae vaai ua toe fo’i atu i le fale ua le alu e faigaluega, fai mai e le o atoa lona malosi.

A o taoto le tamaitai na aafia i luga o lona moega i totonu o lona potu, na faateia o ia ina ua alu atu lona uncle ma tatala atu le faitoto’a ma taoto atu i ona tafatafa. Sa faateia le tamaitai ina ua tago atu lona uncle i lona fatafata ma amata ona tago atu i vaega eseese o lona tino.

Na taumafai le tamaitai na aafia e tete’e ese lona uncle peita’i na fiu ae ua atili ai lava ona tago atu ia te ia. O le aso lava lea na faamalosi ai e le ua molia lona niece i totonu o lona potu. 

O le isi vaiaso e sosoo ai ina ua le aoga le tamaitai na aafia, na nofo ai fo’i le ua molia i le fale ma ia faia fo’i uiga mataga lava nei e tasi ia ia te ia. 

Na tete’e malosi le ua molia i Leoleo e le sa’o tu’uaiga faasaga ia te ia, peita’i na faailoa manino e le tamaitai na aafia le moni ma le faamaoni o le faalavelave sa tula’i mai.