Falepuipui mo le 5 tausaga le ali’i na faaoolima i lana uo tama’ita’i

E 5 tausaga lea ua fa’asala ai e le Fa’amasinoga Maualuga le ali’i e 50 tausaga lea na tausala i lona faaoolima lea i lana uo tama’ita’i poo le Tina o lana fanau, e ala i lona tu’u o le naifi o le ua o le tama’ita’i.

O Aukusitino Fanene, lea na taofia i le toese i Tafuna talu mai le taimi na pu’e faapagota ai o ia e Leoleo i le tausaga ua te’a, ina ua le mafai ona ia totogi le $10,000 e tatala ai o ia, na tula’i i luma o le fa’amasinoga i le vaiaso nei mo le lauina o lana fa’asalaga.

Na ulua’i tu’uaia o ia e le malo i le moliaga mamafa o le faaoolima i le tulaga muamua, o se solitulafono mamafa.

Ae i lalo o se maliliega na sainia e le ua molia ma le malo, na sui ai e le malo le mamafa o le moliaga e tali ioe ai Fanene, ina ia fa’ailoa ai le moliaga o le faaoolima i le tulaga lua.

I le tali ioe ai o Fanene i le moliaga e pei ona ta’usala ai o ia, sa ia ta’utino ai e fa’apea, i le aso 20 o Me 2018, sa ia faatupu ai ni manu’a i le tino o lana uo tama’ita’i, e ala i lona faaoolima ia te ia, faapea ai ma lona tu’u o se tama’i naifi i lona ua ina ia fa’afefe ai o ia.

E pei ona taua e le malo i le latou tagi, o lenei fa’alavelave na tofu atu i le Ofisa o Leoleo ina ua talosagaina e le aiga o le tama’ita’i na a’afia se fesoasoani, ona o le fa’alavelave e pei ona faaoolima ai le ua molia ia te ia.

Ina ua maua le avanoa a Fanene mai le fa’amasinoga, sa ia fa’atoese ai loa e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai i tua i lona aiga e mafuta ma lana fanau.

Sa ia ta’utino i le fa’amasinoga lona matua salamo moni e tusa ai o lana solitulafono sa faia, ma ua ia lagona fo’i le toe fia fo’i i lona aiga.

Sa ia faatoese i le fa’amasinoga, o le malo o Amerika Samoa, aemaise ai o lona aiga e pei o lana fanau ma lana uo tama’ita’i na a’afia, ina ia latou fa’amagalo o ia. Sa ia faatoese fo’i i lana Faifeau ma lana Ekalesia i lona faia o amioga ua ta’uvalea ai le igoa o le Ekalesia faapea ai ma le nu’u.

I le faaiuga o le talosaga a Fanene, sa ia talosagaina ai ali’i Fa’amasino mo se avanoa e fa’amama ai sana fa’asalaga, ona ua toe fia fo’i i tua i lona aiga.

Na talosaga le loia a Fanene ia Michael White i le fa’amasinoga, mo se fa’asalaga faanofovaavaaia, ina ia maua ai le avanoa e vave ai ona fo’i atu i tua le ua molia e mafuta i lona aiga. Na taua e White e fa’apea, o taimi uma lava la te talanoa ai ma Fanene a o fa’agasolo mai taualumaga o lana mataupu, sa ia faailoa atu ia te ia le tatau lea ona sui lona olaga, ma taofi lona soli o le tulafono.

Faailoa atili e White i le fa’amasinoga e fa’apea, e ui sa i ai solitulafono na ta’usala ai Fanene i tausaga ua mavae, peita’i ua i ai le suiga i lona olaga, ma ua avea fo’i o ia ma tagata matua.

Na faailoa fo’i e White i le fa’amasinoga tusitusiga sa tuuina mai i nisi o le atunu’u e lagolago ai se faasalaga mama mo Fanene, e pei o le tusi mai lana faifeau faapea ai ma le tusi mai le Faifeau o le Toese i Tafuna. I totonu o ia tusi, o lo o fa’ailoa mai ai suiga lelei i le olaga o Fanene.

Na talosaga le loia a le malo ia Laura Garvey i le fa’amasinoga e fa’asala le ua molia i se fa’asalaga talafeagai ma lana solitulafono.

Saunoa le afioga i le ali’i Fa’amasino Sili lagolago ia Fiti Sunia e fa’apea, o le mataupu e pei ona ta’usala ai Fanene, na alia’e mai i se vevesi i totonu o lona aiga, ma i’u ai loa i lona fa’atinoina o le tulafono i ona lava lima, ma ia faaoolima ai loa i lana uo tama’ita’i.

O le itu sa pito sili ona talia gata ai e le fa’amasinoga lenei mataupu e pei ona saunoa Sunia, o le matuia o le gaioiga sa faia e Fanene, ina ua ia tuuina le naifi i le ua o lana uo tama’ita’i.

“E matuia tele le gaioiga sa e faia i le aso na tula’i mai ai le fa’alavelave. O lau gaioiga sa faia, sa leai se mamao mai le fa’ataunu’uina o le maliu i le tama’ita’i na a’afia,” o le saunoaga lea a Sunia ia Fanene.

Na faamanatu e Sunia ia Fanene le mamafa o le moliaga na ulua’i molia ai o ia e le malo, le moliaga o le faaoolima i le tulaga muamua, lea e mafai ona fa’asala ai o ia i le toese mo le olaga atoa.

“Sa ta’usala oe e le fa’amasinoga i tausaga ua mavae i le tele o solitulafono e aofia ai ma le faaoolima, sa tuuina atu e le fa’amasinoga avanoa e tele mo oe ma le talitonuga, o le a fai se suiga i lou olaga ma avea ai oe ma tagata suia, peita’i, e foliga mai e le o i ai lava se suiga i lou olaga.”

“Sa faanofovaavaaia oe ma le manatu e te aoaoina se lesona aoga, sa tuuina atu fo’i fa’asalaga mama mo oe ma le manatu e suia ai lou olaga, ao lea e foliga mai e leai ma se lesona aoga sa e aoaoina mai nei tausaga e tele.”

E pei ona taua e Sunia, o le tausaga e 2000 e oo mai i le 2017 na aafia ai le ua molia i solitulafono eseese.

O se tasi o solitulafono e pei ona ta’usala ai o ia e le fa’amasinoga, o le fa’alavelave lea na tula’i mai i Pago Pago, lea na ia sasa fa’amo’amo’a ai se isi ali’i i se nofoa faamoe, ma manu’a tigaina ai lea ali’i.

Talu ai faamaumauga a le fa’amasinoga fa’asaga ia Fanene, na manatu ai loa Sunia e fa’asala le ua molia i le toese mo le 5 tausaga. Ua tuu atu fo’i e le fa’amasinoga le talosaga a Fanene mo se avanoa e vave ai ona tatala o ia i tua i le Komiti Faafoe a le Palola, latou te iloiloina lea talosaga ma fai i ai se faaiuga tatau.